ސަރުކާރުގެ މައި ހޮސްޕިޓަލް އައިޖީއެމްއެޗްގައި މަސައްކަތް ކުރާ ނަރުހެއް މަސްތުވާތަކެތި ބޭނުންކުރާ މައްސަލައެއް ތަހުގީގު ކުރަން ފަށައިފިއެވެ.
ރާއްޖެއެމްވީއަށް ފުލުހުންގެ މީޑިއާ އޮފިޝަލް ވިދާޅުވީ އައިޖީއެމްއެޗްގައި މަސައްކަތް ކުރާ ނަރުހެއް މަސްތުވާތަކެތި ބޭނުންކުރާ މައްސަލައެއް މީގެ ދެހަފްތާ ކުރިން ހުށަހަޅާފައިވާ ކަމަށާއި، އެމައްސަލަ ތަހުގީގު ކުރަމުންދާ ކަމަށެވެ. އަދި އެ މައްސަލަ ހުށަހެޅީ އެ ހޮސްޕިޓަލުން ކަމަށެވެ.
މިމައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައިނުވެއެވެ.
މައުލޫމާތު ލިބިފައިވާ ގޮތުގައި މިމައްސަލަ ފެންމަތިވެ، ހޮސްޕިޓަލުން މިމައްސަލަ ހުށަހަޅާފައިވަނީ އެ ނަރުސްމީހާ މަސްތު ހާލަތުގައި ހުރެ ޑިއުޓީއަށް ނުކުތުމުންނެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
މަސްތުވާތަކެތީގެ މައްސަލަތަކަކީ ރާއްޖޭގައި ހައްލުވެފައިނުވާ ބޮޑު މައްސަލައެކެވެ. ދޭތެރެދޭތެރެއިން މިފަދަ މައްސަލަތައް ފެންމަތިވަމުންްދާއިރު، ބޮޑެތި އޮޕަރޭޝަންތައް ހިންގާ ގިނަ އަދަދެއްގެ މަސްތުވާތަކެތި އަތުލާގަނެފައިވެއެވެ.
