އަންހެން ވޮލީ ބޯޅައިގައި ވެސް ދިވެހި ރާއްޖެ އަށް ރަން މެޑަލް ކާމިޔާބު ކުރެވޭނެ ކަމަށް، ކުޅިވަރާއި ހަށި ހެޔޮ ކަމާ ބެހޭ ވަޒީރު ޢަބްދުﷲ ރާފިޢު (ރާއްޕެ) ވިދާޅުވެއްޖެ އެވެ.

ވަޒީރު މިހެން ވިދާޅުވީ ބޫޓާންގައި ކުރިއަށް ދިޔަ ސެންޓްރަލް އޭޝިއަން ވޮލީ ބޯޅަ އެސޯސިއޭޝަން (ކާވާ) ބީޗު ވޮލީ ބޯޅަ ޗެލެންޖް ކަޕްގެ ރަން މެޑަލް ހޯދި ފިރިހެން ޓީމަށް މަރުޙަބާ ކިޔުމަށްޓަކައި، ޓީމުތަކާ ބައްދަލު ކުރެއްވުމަށްފަހު އެވެ. މިއަހަރުގެ މުބާރާތުގައި ރާއްޖޭގެ އިސްމާއީލް ސާޖިދު (ކުޑަ ކާއްޓޭ) އާއި އާދަމް ނަސީމް (އެޑަމް) ވަނީ ރަން މެޑަލް ކާމިޔާބު ކޮށްފަ އެވެ.

މިއަހަރުގެ މުބާރާތުގައި ވާދަކުރި ރާއްޖޭގެ އަންހެން ޕެއާ ތަކުގެ ތެރެއިން، ހައްވާ ރާޝިދާ (ހައްވަ) އާއި ޢައިޝަތު މާޖިދާ (މާޖީ)ގެ ޕެއާ އަށް ވަނީ ގްރޫޕް ސްޓޭޖުން ނާކާމިޔާބުވެފަ އެވެ. ދެން ވާދަކުރި ޕެއާ އަކީ ރާއްޖޭގެ އައިމިނަތު އަރީޝާ (އަރީ) އާއި ފާތިމަތު ޒީނިޔާގެ ޕެއާ އެވެ. މި ޕެއާ އިން ވަނީ މުބާރާތުގެ ސެމީ ފައިނަލްގައި ވާދަކޮށްފަ އެވެ. ސެމީ ފައިނަލްގައި ރާއްޖޭގެ ޕެއާ ވަނީ އުޒްބަކިސްތާންގެ ޕެއާއާ ވާދަކޮށެވެެ. ސީދާ ދެ ސެޓުން ބަލިވީއިރު، މެޗުގެ ސެޓުތައް ދިޔައީ 21-17 އަދި 23-21 އިންނެވެ.

އާދިއްތަ ދުވަހުގެ ރޭ ވެލާނާ އިންޓަނޭޝަނަލް އެއާޕޯޓުގައި ޤައުމީ ބީޗު ވޮލީ ޓީމުތަކާ ބައްދަލު ކުރައްވައި ވާހަކަ ދައްކަވަމުން ވަޒީރު ރާފިޢު ވިދާޅުވީ، ރާއްޖޭގެ އަންހެން ވޮލީ ޓީމުތަކުން ވެސް ފަޚުރުވެރި ރަން ވަނަތަކެއް ހޯދައި ޤައުމަށް އައުމަކީ މާ ދުރުގައި އޮތް ކަމެއް ނޫން ކަމަށެވެ. ވޮލީ ބޯޅައިގައި ރަން މެޑައްޔެއް ހޯދުމަށް ބޭނުންވާ ހުނަރާއި، ފެންވަރު ޤައުމީ އަންހެން ޓީމުތަކުގައި ހުރި ކަމަށް ވެސް ވަޒީރު ވަނީ ވިދާޅުވެފަ އެވެ.

އަންހެން ވޮލީގައި ރާއްޖެ އިން ވަނީ މީގެ ކުރިން ރިހި މެޑަލް ކާމިޔާބު ކޮށްފަ އެވެ.