ނ.ހެނބަދޫގައި ފުލުހެއްގެ ސައިކަލުގައި ރޯކޮށްލި މައްސަލަ އާއި ގުޅިގެން ދެމީހެއްގެ ވަނަވަރު ދިވެހި ފުލުހުންގެ ޚިދުމަތުން އާންމުކޮށްފިއެވެ.
ނ.ހެނބަދޫގައި 2 ފުލުހެއްގެ ސައިކަލަށް ގެއްލުންދިންކަން ފުލުހުން ހާމަކުރީ އޮގަސްޓް މަހުގެ 2 ވަނަ ދުވަހުއެވެ.
ފުލުހުން ވަނީ ނ.ހެނބަދޫ ޕޮލިސް ޕޯސްޓްގައި މަސައްކަތްކުރާ ފުލުހުންނާއި ފުލުހުންގެ އާއިލާތަކާއި މުދަލަށް ގެއްލުންދޭނެ ކަމަށްބުނެ އިންޒާރުދީ، ފުލުހެއްގެ ސައިކަލަކަށް ގެއްލުންދީ އިތުރު ފުލުހެއްގެ ސައިކަލު ރޯކޮށްލި މައްސަލައިގެ ތަޙްގީގަށް ހައްޔަރުކޮށްފައިވާ 2 މީހުންގެ ވަނަވަރު ހާމަކޮށްފައެވެ. އެމީހުން ހައްޔަރު ކޮށްފައިވަނީ އާދިއްތަ ދުވަހު ކޯޓު އަމުރެއްގެ ދަށުންނެވެ.
މި މައްސަލައިގައި ހައްޔަރު ކޮށްފައިވަނީ ސެލްވިޔޯ، ނ ހެނބަދޫ އިލްޔާސް އިބްރާހިމް (33އ) އަދި ހުދުތަރި ނ ހެނބަދޫ (33އ) މުޙައްމަދު އިރުޝާދުއެވެ.
ނ. ހެނބަދޫގައި 2 ފުލުހެއްގެ ސައިކަލަށް ގެއްލުންދީފައިވަނީ އޮގަސްޓް މަހުގެ 1 ވަނަ ދުވަހާއި އެ ދުވަހުގެ ރޭގެ ދަންވަރުގެ ވަގުތެއްގައެވެ.
