އައްޑޫގައި ސައިކަލެއް ވެލި ފުންޏެއްގައި ޖެހި އެކްސިޑެންޓެއް ހިނގައިފިއެވެ.

ދިވެހި ފުލުހުންގެ ޚިދުމަތުން ބުނީ، އެކްސިޑެންޓު ހިނގާފައިވަނީ ހުކުރު ދުވަހުގެރޭ 23:49 ހާއިރު ކަމަށެވެ. އެކްސިޑެންޓު ހިނގަން މެދުވެރިވީ އައްޑޫގައި ފެން ހިންދާ ނިޒާމު ޤާއިމު ކުރުމަށް މަގު ކޮނެފައިވާ ހިސާބުން ބާރު ސްޕީޑުގައި ދުއްވާފައި ދިޔަ ސައިކަލެއް ކޮންޓްރޯލް ނުވެ ވެލިފުންޏަކަށް އެެރުމުގެ ސަބަބުން ކަމަށެވެ.

މި ޙާދިސާގައި ސައިކަލު ދުއްވި 23 އަހަރުގެ ދިވެހި ފިރިހެން މީހާއަށް އަނިޔާވެގެން އައްޑޫ އިކުއިޓޯރިއަލް ހޮސްޕިޓަލުގައި ފަރުވާ ދީފައިވާއިރު، އިތުރު ފަރުވާއަށް އޭނާ ގެންނަނީ މާލެއަށެވެ.

މި ޙާދިސާއާ ގުޅިގެން ބަލަންޖެހޭ ކަންކަން ދިވެހި ފުލުހުންގެ ޚިދުމަތުން ގެންދަނީ ބަލަމުންނެވެ.