ސްކޭމްގެ މައްސަލަތަކާއި ގުޅިގެން މި އަހަރުގެ މިހާތަނަށް 300 އެކައުންޓް ބަންދުކޮށްފައިވާ ކަމަށް ބޭންކް އޮފް މޯލްޑިވްސް، ބީއެމްއެލް އިން ބުނެފިއެވެ.
ބޭންކް އޮފް މޯލްޑިވްސް އިން އެފަދައިން ބުނެފައި ވަނީ ރައްޔިތުންގެ މަޖިލީހުގެ އެސްއޯއީ ކޮމިޓީގައި ވާހަކަދައްކަވަމުންނެވެ.
ބޭންކް އޮފް މޯލްޑިވްސްގެ ޑިރެކްޓަރ އޮފް ރީޓެއިލް، ބިޒްނަސް އަދި އެސްއެމްއީ ބެންކިން މޫސާ ނިމާލް ވިދާޅުވީ އެކަކު ގުޅާފަ އެކައުންޓެއް ބޭނުންކޮށްގެން ސްކޭމެއް ހިންގާކަމަށް ބުނި ނަމަވެސް ފިޔަވަޅު ނާޅާ ކަމަށެވެ. އެހެންނަމަވެސް ތަކުރާރުކޮށް އެފަދަ މުއާމަލާތުތައް ހިނގާ ނަމަ އެކަން ބަލާ ފިޔަވަޅު އަޅާ ކަމަށާއި ކާޑު މެދުވެރިކޮށް ފްރޯޑްގެ އަމަލެއް ހިންގާ ނަމަ އެ މައްސަލަ ބެލުމަށް ފަހުގައި ފިޔަވަޅު އަޅާ ކަމަށް އޭނާ ވިދާޅުވިއެވެ. އަދި ކާޑު ނެޓްވޯރކްތަކުން ލިބޭ މައުލޫމާތުތަކުގެ އަލީގައި މައްސަލަ ދިމާވެދާނެ ފަދަ ކާޑުތައް ވެސް ބްލޮކްކުރުމަށް ފަހު ކަސްޓަމަރުންނަށް އަލުން ކާޑު ހަދާދޭ ކަމަށް އޭނާ ވިދާޅުވިއެވެ.
![](https://dyncz33htw1ec.cloudfront.net/posts/a0285828-1171-4858-ace6-4d970839b37b.png)
ނިމާލް ވިދާޅުވީ ބޭންކްއިން މީހަކު މޮނިޓަރިން އަށް ލަނީ ސްކޭމްތަކާއި ގުޅިގެން ނޫން ކަމަށެވެ. އެއީ މަނީ ލައުންޑަރކުރުމުގެ ޤާނޫނުގެ ދަށުން ކުރާ ކަމެއް ކަމަށް އޭނާ ވަނީ ވިދާޅުވެފައެވެ. ކަސްޓަމަރުންގެ މައުލޫމާތު ނުވަތަ އިންކަމް ޑިކްލަރޭޝަން އަކީ ސީދާ ސްކޭމަކާއި ގުޅިގެން އެއްކުރާ މައުލޫމާތެއް ނޫން ކަމަށް އޭނާ ވިދާޅުވިއެވެ. ސްކޭމް އެއްކަން ދެނެގަންނަން އޮންނަ ގޮތަކީ އެފަދަ ކަމެއް އެނގުމުން ކަސްޓަމަރަކު ގުޅާފަ އެކަން ބޭންކަށް އެންގުމުން ކަމަށް ވެސް އޭނާ ވިދާޅުވިއެވެ. ބީއެމްއެލްއިން ބުނީ ވަކިވަކި ކޭސްތަކާއި ގުޅޭ ގޮތުން ފުލުހުންނާއި އެކު ބައްދަލުުވުންތައް ބާއްވަމުންދާ ކަމަށާއި އެކަމުގެ ސަބަބުން ސްކޭމްގެ މައްސަލަތައް ހުއްޓުވުމަށް ކުރިއެރުންތަކެއް ލިބެމުންދާ ކަމަށެވެ. އަދި އެފަދަ މައްސަލަތައް ފެންމަތި ވުމުން ބީއެމްއެލްއަކީ ތަހުގީގީ އިދާރާއެއް ކަމަށް ނުވާތީ ބޭންކުން އެކަން ތަހުގީގުނުކުރެވޭކަން ބީއެމްއެލްއިން ފާހަގަކުރެއެވެ. އެހެންކަމުން މައްސަލަ ވީހާވެސް އަވަހަށް ފުލުހުންނަށް ހުށަހެޅުމަށް އާއްމުންނަށް އިރުޝާދުދޭ ކަމަށް ބީއެމްއެލްއިން ވަނީ ބުނެފައެވެ.
ވަކި ކަހަލަ ޖޭމަރ ސިސްޓަމެއް ބޭނުންކޮށްގެން ޖަލުގައި ސްކޭމް ހިންގުން މަދުކުރަން ކުރެވޭ މަސައްކަތްތަކާއި ގުޅޭ ގޮތުން އެސްއޯއީ ކޮމިޓީގައި ކަރެކްޝަންސް ސަރވިސް އާއި ވަނީ ސުވާލުކޮށްފައެވެ. ޑެޕިއުޓީ ކޮމިޝަނަރ އޮފް ޕްރިޒަންސް މުހައްމަދު އާސިފް ވިދާޅުވީ މާފުށީގައި އެންޓެނާ ޤާއިމްކުރުމަށް ފަހު ޚިދުމަތް ދޭން ފަށަން އުޅޭ ހިސާބުން ދިރާގާއި އުރީދޫގެ ފަރާތުން އެ ކަމުގައި ހުރި ޤާނޫނީ މައްސަލަތައް ފާހަގަކުރާ ކަމަށެވެ. އެގޮތުން އެ މައުލޫމާތު ފުލުހުންނަށް ދިނުމުގައި ޤާނޫނީ ގޮތުން ދިމާވާ މައްސަލަތައް ހުރިކަމަށް މުވާސަލާތީ ޚިދުމަތްދޭ ކުންފުނިތަކުން ބުނާ ކަމަށް އޭނާ ވިދާޅުވިއެވެ. އެންޓެނާގެ ބޭނުން މިހާރު ކުރަމުންދާ ކަމަށާއި، އެންޓެނާ ޖެހުމުން ކުރިން ރޭންޖް ނުލިބޭ ބައެއް ގޮޅިތަކަށް ރޭންޖް ލިބޭ ކަމަށް ވެސް އޭނާ ވިދާޅުވިއެވެ. ކަރެކްޝަންސް އިން ވަނީ އެއްވެސް ޖަލެއްގައި ފޯނު ވެއްދުމުގެ މައްސަލަ އަކީ ސައްތައިން ސައްތަ ހައްލުކުރެވިފައިވާ މައްސަލަ އެއް ނޫން ކަމަށް ވިދާޅުވެފައެވެ. މީގެ އިތުރުން އެމްއެމްއޭގެ ފަރާތުން ވަނީ އެ ބައްދަލުވުމުގައި ސްކެމް ސެންޓަރ އާއި ބެހޭ ބައެއް މައުލޫމާތުތައް ވެސް ހިއްސާކޮށްފައެވެ.