އޮންލައިން ޖުވާ ކުޅުމަކީ އިޖުތިމާއީ ބޮޑު މައްސަލައެއް ކަމަށާއި، އެގޮތުން ފާހަގަވާ ސައިޓްތައް ބްލޮކް ކުރަމުން ގެންދަވާނެކަމަށް ދާޙިލީ ވަޒީރު އަލީ އިޙްސާން ވިދާޅުވެއްޖެއެވެ.  

ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން އިޙްސާން ވިދާޅުވީ، ޖުވާ ކުޅުމުގެ މައްސަލަތައް ހައްލު ކުރުމަށް ޚާއްސަ އޮޕަރޭޝަނެއް ފަށާފައިވާ ކަމަށެވެ. އެގޮތުން ފާހަގަވެފައިވާ ހުރިހާ ސައިޓުތަކެއް ބްލޮކް ކުރަމުންދާކަން އިޙްސާން ފާހަގަ ކުރެއްވިއެވެ.

އިޙްސާން ވިދާޅުވީ، އެކަންކަމަށް ފުރުސަތު ދެވިގެން ނުވާނެ ކަމަށެވެ.

މިފަދަ މައްސަލަތަކުގެ ސަބަބުން އެތައް ބައެއްގެ ޙައްޤުތައް ގެއްލިގެންދާ ކަމަށާއި، މިއީ ދީނީ ގޮތުން އަދި މުޖުތަމައެއްގެ ގޮތުން ބެލިޔަސް ބަލައިގަނެވޭނެ ކަންކަމެއް ނޫންކަމަށް އިޙްސާން ވިދާޅުވިއެވެ.

އިޙްސާން އިތުރަށް ވިދާޅުވީ، މިއަދު އެތައް ބަޔަކު ޖުވާ ކުޅުމުގެ އަވައިގައި ޖެހެމުންދާ ކަމަށެވެ.

އިޙްސާން ވަނީ މިއީ އިޖުތިމާއީ ބޮޑު މައްސަލައެއްގެ ގޮތުގައި ސިފަ ކުރައްވާފައެވެ.  

އިޙްސާން ވިދާޅުވީ، މި ޤައުމުގައި މި މައްސަލަ އޮތްކަން ޤަބޫލު ކުރައްވާ ކަމަށާއި، މިކަމުގައި ވަކި މީހަކު ނުވަތަ ބަޔަކު އިސްތިސްނާ ނުވާނެ ކަމަށެވެ. އެގޮތުން މިފަދަ މައްސަލަތައް ބެލުމުގައި ޔުނިފޯމް އެޅި މުއައްސަސާއެއްގެ ބަޔަކު ނުވަތަ އާންމުންގެ ބަޔަކު އިސްތިސްނާއެއް ނުވާނެ ކަމަށް އިޙްސާން ވިދާޅުވިއެވެ.

އިޙްސާން ވިދާޅުވީ، ދިވެހި ފުލުހުންގެ ޚިދުމަތުން ރެއިޑް ނުކުރެވޭނެ އެއްވެސް ތަނެއް ނުހުންނާނެ ކަމަށެވެ.

އޮންލައިން ޖުވާ ކުރުމަށް ނުވަތަ ބެޓް ކުރުމަށް ރާއްޖޭގައި ބޭނުން ކުރަމުން އަންނަ އޮންލައިން ސައިޓްތަކުގެ ތެރެއިން ފާހަގަ ކުރެވިފައިވާ ސައިޓްތައް ބްލޮކް ކުރަން ފަށާފައިވާކަމަށް ފުލުހުން ވަނީ ބުނެފައެވެ.

ފުލުހުން ބުނީ، މިހާތަނަށް ފާހަގަ ކުރެވިފައިވާ ހަތަރު ސައިޓެއް ބްލޮކް ކުރުމަށް ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ކޭމް) އަށް ހުށަހަޅާފައިވާނެ ކަމަށެވެ.