ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑިއޭންއާރު) ގައި ވެރިކަން ކުރާ ޕާޓީ - ޕީއެންސީ އަށް ވަގު ފޯމު ފުރިތަނުގައި ހޯމް މިނިސްޓަރ އިހްސާނު ހުންނަވަނިކޮށް ނަގާފައިވާ ފޮޓޯތައް ލީކު ކޮށްލި ފަރާތް ހައްޔަރު ކުރަން މަސައްކަތް ފަށައިފި ކަމަށް އިތުބާރު ހުރި މަސްދަރަކުން މި ނޫހަށް މައުލޫމާތު ދީފިއެވެ.
ނަން ނުޖެހުމަށް ޝަރުތުކޮށް މައުލޫމާތު ދިން ފަރާތުން ބުނެފައިވަނީ، އެކަން "ވަރަށް މަތިން އަންގަވައިގެން" މިހާރު ކުރިއަށް ދާ ކަމަށެވެ.
ތުހުމަތު ކުރެވޭ ފަރާތެއް މިހާރު އެބަހުރި ކަމަށާއި، މަސައްކަތް ކުރަނީ "ގޮޅިއަކަށް ފައްތައިގެން އޭނާ ހައްޔަރު ކުރަން" ކަމަށް ވެސް އެފަރާތުން ބުނެފައިވެއެވެ.
މިކަމުގެ މަސްލަހަތު އޮތް ވެރިން ތުހުމަތު ކުރާ ގޮތުގައި ފޮޓޯތައް ލީކުކޮށްލުމުގައި ބައިވެރިވެފައިވަނީ ސިޔާސީ މުވައްޒަފެކެވެ. އޭނާ މި ފޮޓޯތައް ފޯރުކޮށްދީފައިވަނީ މިނިސްޓަރ އިހްސާން އަށް ނުރުހުންވާ ސަރުކާރުގެ އެހެން މިނިސްޓަރަކަށެވެ. ފޮޓޯތައް ސޯޝަލް މީޑިއާ އަށް ލީކު ކޮށްލީ އެ މިނިސްޓަރުގެ އިރުޝާދުގެ ދަށުން ކަމަށްވެސް އޭނާ ބުނެފައިވެއެވެ.
އެތައް އާންމު ރައްޔިތުންގެ ސިއްރު ޒާތީ މައުލޫމާތު ވަގަށް ނަގައިގެން ޕީއެންސީ އަށް މީހުން ވެއްދުމަށް ގިނަ އަދަދެއްގެ ފޯމު ފުރި މައްސަލަ ހޫނުވެ، ގިނަ ބަޔަކު ސޯޝަލް މީޑިއާ ގައި ގެންދަނީ މިނިސްޓަރ އިހްސާނުގެ އިސްތިއުފާ އަށް ގޮވަމުންނެވެ.
މި ހުރިހާ ކަމެއްގެ ޒިންމާ އުފުއްލަވަން ޖެހޭނީ ރައީސުލްޖުމްހޫރިއްޔާ ކަމަށާއި ރައީސުލްޖުމްހޫރިއްޔާއަށް ނޭނގި މިވަރުކަމެއް ނުހިނގާނެ ކަމަށް ކުރީގެ ރައީސް ޔާމީން ވަނީ ވިދާޅުވެފައެވެ. "މިއީ މުއިއްޒު މަގާމުން ދުރަށްދާންޖެހޭ ވަރުގެ ކަމެއް" ކަމަށް ވެސް ކުރީގެ ރައީސް ޔާމީން ވަނީ ވިދާޅުވެފައެވެ.
