ތުރުކީގެ އަސްކަރީ ސިފައިން ރާއްޖޭގައި ބޭތިއްބުމަށް މަޝްވަރާ ކުރެވެމުންދާކަމަށް ބުނެ ބޭރުގެ ނޫސްތަކުން ފަތުރަނީ ދޮގު ޚަބަރެއްކަމަށް ދިވެހި ސަރުކާރުން ބުނެފިއެވެ.
ތުރުކީގެ އަސްކަރިއްޔާގެ އެނަލިސްޓެއްކަމަށްވާ ސެލިމް އަކޮނޫލްއާ ޙަވާލާދީ ނޫސްތަކުން ރިޕޯޓު ކޮށްފައިވާ ގޮތުގައި ރާއްޖޭގައި ލިމިޓެޑްކޮށް ނަމަވެސް އަސްކަރީ 'ޕްރެޒެންސްއެއް' ގާއިމްކުރުމަކީ، ތުރުކީއަށް ލިބޭނެ ބޮޑު ސްޓްރެޓެޖިކް ކާމިޔާބީއެކެވެ.
އަދި މިއީ އިންޑިއާ ކަނޑުގެ ސަރަޙައްދުގައި ދާއިމީ ގޮތެއްގައި ފައިތިލަ ސާބިތު ކުރުމަށް ތުރުކީއަށް ކޮށިގެންދާ މަގެއްކަމަށްވެސް އޭނާ ވިދާޅުވެފައިވެއެވެ.
އޭގެ އިތުރުން، މިކަންކަމާ ގުޅޭގޮތުން މަޝްވަރާ ކުރެވެމުންދާކަމަށްވެސް ބައިނަލްއަޤުވާމީ ނޫސްތަކުން ވަނީ ރިޕޯޓު ކޮށްފައެވެ.
ރާއްޖޭގައި އެއްވެސް ޤައުމެއްގެ ސިފައިން ޤާއިމުވެ ނުތިބޭނެކަމަށް ސަރުކާރުން ވައުދުވެފައިވާއިރު، މިތަނުގައި ތުރުކީ ސިފައިން ޤާއިމު ކުރުމަށް މަޝްވަރާ ކުރެވިފައިވާކަމަށް ބޭރުގެ ނޫސްތަކުން ރިޕޯޓު ކޮށްފައިވާތީ އެކަމާ ގުޅިގެން ރައީސް އޮފީހާ ސުވާލު ކުރުމުން ރައީސް އޮފީހުން ވަނީ އެވާހަކަތައް ދޮގުކޮށްފައެވެ.
ރާއްޖެއެމްވީން ސުވާލުކުރުމުން ރައީސް އޮފީހުގެ މިނިސްޓަރ އިބްރާހީމް ޚަލީލް ވިދާޅުވީ، ބޭރު އެއްވެސް ޤައުމެއްގެ މިލިޓަރީ ސިފައިން ރާއްޖޭގައި ޤާއިމްވެ ނުތިބޭނެ ކަމަށެވެ.
އަދި ބޭރު ޤައުމެއްގެ މިލިޓަރީ ސިފައިން ރާއްޖޭގައި ޤާއިމްކޮށް ބޭތިއްބުމަށް އެއްވެސް ބަޔަކާ އެކު އެއްވެސް މަޝްވަރާއެއްވެސް ނުކުރެވޭކަމަށް ޚަލީލް ވިދާޅުވިއެވެ.
ޚާރިޖީ މަސްދަރުތަކާއި ތަޖުރިބާކާރުންނާ ޙަވާލާދީ ބޭރުގެ ބައެއް ނޫސްތަކުން ރިޕޯޓު ކޮށްފައިވާ ގޮތުގައި ކުރިއަށް އޮތް ތަނުގައި އަސްކަރީ ގޮތުން ތުރުކީއާއި ރާއްޖެއާ ދެމެދު ގުޅުން ބަދަހި ކުރުމަށް ވަނީ މަޝްވަރާ ކުރެވިފައެވެ. އެގޮތުން ރާއްޖެ އާއި ތުރުކީއާ ދެމެދު ވެފައިވާ އެއްބަސްވުންތައް މެދުވެރިކޮށް، އިންޑިއާ ކަނޑުގެ ސަރަހައްދުގައި ތުރުކީގެ ރޭވުންތެރިކަން އިތުރުކޮށް ފުޅާކުރަމުންދާ ކަމަށާއި، ރާއްޖޭގައި ތުރުކީގެ ސިފައިން ޤާއިމު ކުރުމަށް މަޝްވަރާ ކުރެވެމުންދާކަމަށް "ޑިރެކްޓަސް" އިން ރިޕޯޓުކޮށްފައިވެއެވެ.
ތާރީޚީ ގޮތުން ބަލާއިރު ތުރުކީގެ ޚާރިޖީ ސިޔާސަތު ބައްޓަންވަމުން އައިސްފައިވަނީ އަވައްޓެރި ގައުމުތަކާއި ގުޅުން ބަދަހި ކުރުމަށް ކަމުގައިވީނަމަވެސް، އުރުދުޣާންގެ ވެރިކަމުގައި މަޑުމަޑުން އެ ސިޔާސަތު އަންނަނީ ބަދަލުވަމުންނެވެ. އޭގެ ތެރެއިން އިންޑިއާ ކަނޑުގައިވާ ޤައުމުތަކަށް އިސްކަން ދިނުން ވެސް ހިމެނޭއިރު، ރާއްޖެއާއި ތުރުކީއާ ވެސް ދަނީ އެ ގުޅުން ބަދަހިކުރަމުންނެވެ.
