ޓެނިސް އެސޯސިއޭޝަން އޮފް މޯލްޑިވްސް އަދި އަލިބޭ މޯލްޑިވްސް ގުޅިގެން ކުރިއަށް ގެންދާ، އަލިބޭ ޓްރެއިނިން ކޭމްޕުގައި މިއަހަރު ބައިވެރިވާ ކުޅުންތެރިން އިއުލާން ކޮށްފި އެވެ.

މިއަހަރުގެ ކޭމްޕު ކުރިއަށް ގެންދިޔުމަށް ހަމަޖެހިފައި ވަނީ ތުރުކީގެ އަންތަލްޔާގަ އެވެ. މެއި މަހުގެ ދެ ވަނަ ދުވަހުން ފެށިގެން ނުވަ ވަނަ ދުވަހުގެ ނިޔަލަށް ކުރިއަށް ގެންދާ މި ކޭމްޕުގައި މިއަހަރު ބައިވެރި ވަނީ 12 ކުޅުންތެރިންނެވެ. ކޭމްޕުގައި ބައިވެރިވާ ކުޅުންތެރިން އިއުލާން ކުރުމަށް ވަނީ ޚާއްސަ ރަސްމިއްޔާތެއް ވެސް ބާއްވައިފަ އެވެ. އެ ރަސްމިއްޔާތުގައި ޓެނިސް އެސޯސިއޭޝަންގެ ރައީސް އަޙުމަދު ނަޒީރުގެ އިތުރުން، އަލިބޭ މޯލްޑިވްސްގެ އިސްވެރިން ވެސް ވަނީ ބައިވެރިވެފަ އެވެ.

މި ޓްރެއިނިން ކޭމްޕްގެ މަޤުސަދަކީ ރާއްޖޭގައި ތިބި ޒުވާން ޓެނިސް ކުޅުންތެރިންގެ ހުނަރު އިތުރަށް ފުޅާ ކުރުމުގެ ފުރުޞަތު ހޯދައި ދިނުމުގެ އިތުރުން، އެ ކުޅުންތެރިންގެ ތަޖުރިބާ އިތުރު ކުރުމެވެ. މި ކޭމްޕުގައި ތަޖުރިބާކާރު ކޯޗުންނާއި ޓްރެއިނަރުންގެ ޓީމަކުން ކޮންމެ ކުޅުންތެރިއަކަށް ވެސް ވަކި ވަކިން ސަމާލުކަން ދިނުމާއި، ކުޅުން ރަނގަޅު ކުރުމަށް އެހީތެރިވެދޭނެ އެވެ.

މިއީ ޓެނިސް އެސޯސިއޭޝަން އަދި އަލިބޭ މޯލްޑިވްސްއާ ދެމެދު 2017 ވަނަ އަހަރު ސޮއި ކުރެވުނު އެއްބަސްވުމެއްގެ ދަށުން ކުރިއަށް ގެންދާ ކޭމްޕެކެވެ. މިއީ މި ކޭމްޕު ކުރިއަށް ގެންދާ ހަ ވަނަ އަހަރެވެ. މި ކޭމްޕުގެ ހުރިހާ ޚަރަދެއް ކުރުމަށް ހަމަޖެހިފައި ވަނީ އަލިބޭ މޯލްޑިވްސްގެ ފަރާތުންނެވެ.