ގަތަރުގެ އަލް ދުހައިލްގެ ކޯޗަކަށް ފްރާންސްގެ ކްރިސްޓޮފާ ގަލްޓިއޭ ހަމަޖައްސައިފިއެވެ.
އުމުރުން 57 އަހަރުގެ ގަލްޓިއޭ އެންމެ ފަހުން ހުރީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ގެ ކޯޗަކަށެވެ. އެ މަގާމުން އޭނާ ވަކިކޮށްފައިވަނީ މިއަހަރުގެ ޖުލައި މަހުގެ ތެރޭގައެވެ. އޭގެ ތިން މަސްދުވަސް ފަހުން އޭނާ ދުހައިލްއާ ހަވާލުވީ، ކުރިން އެ މަގާމުގައި ހުރި ހެނާން ކްރެސްޕޯ މަގާމުން ވަކިކުރުމުންނެވެ.
ދުހައިލްގެ ކޯޗުކަމަށް ގަލްޓިއޭ ހަމަޖެއްސި ނަމަވެސް، އޭނާގެ އެއްބަސްވުމާގުޅޭ އެއްވެސް މައުލޫމާތެއް ދުހައިލްއިން ހާމަކޮށްފައެއް ނުވެއެވެ. ޕީއެސްޖީގެ ކޯޗުކަމާ މިދިޔަ އަހަރު ގަލްޓިއޭ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. ނަމަވެސް، އެންމެ ސީޒަނަކަށްފަހު ޕީއެސްޖީން އޭނާ ވަކިކޮށްފައިވަނީ އެ ކުލަބުގެ ނަތީޖާތައް އިންތިހާއަށް ދަށްވުމުންނެވެ. ކޯޗުކަމުގެ މަގާމުން ގަލްޓިއޭ ވަކިކުރުމަށްފަހު، އެ މަގާމަށް ދެން ހަމަޖެއްސީ ސްޕެއިންގެ ތަޖުރިބާކާރު ކޯޗު، ލުއިސް އެންރީކޭއެވެ.
ދުހައިލްއިން އެ ޓީމުގެ ކޯޗުކަމުން ކްރެސްޕޯ ވަކިކުރީވެސް ނަތީޖާތައް ރަނގަޅު ކުރުމަށެވެ. މިދިޔަ ސީޒަނުގައި އޭނާ ވަނީ ދުހައިލްއަށް ގަތަރުގެ ސްޓާސް ލީގުގެ ޗެމްޕިއަންކަން ހޯދައިދީފައެވެ. އެހެން ނަމަވެސް އޭޝިއަން ޗެމްޕިއަންސް ލީގުގެ ގްރޫޕް ސްޓޭޖަށް ކޮލިފައިވުމުގެ އުންމީދު ކުޑަވީ ދާދިފަހުން އީރާނުގެ ޕާސެޕޮލިސް އަތުން ބަލިވުމުންނެވެ.
