ނަސްލީ ތަފާތުކުރިކަމުގެ ތުހުމަތުގައި ޕެރިސް ސެއިންޓް ޖާމަން (ޕީއެސްޖީ)ގެ ކޯޗު ކްރިސްޓޮފް ގަލްޓިއާ އާއި އޭނާގެ ދަރިފުޅު ފުލުހުންގެ ބެލުމުގެ ދަށަށް ގެންގޮސްފިއެވެ.
ރިޕޯޓުތައް ބުނާގޮތުން ގަލްޓިއާ ހިފަހައްޓާފައި ވަނީ އޭނާގެ ކުރީގެ ކުލަބެއްގައި ނަސްލީ ތަފާތުކުރުމުގެ ތުހުމަތުތަކެއް ކުރެވޭ މައްސަލައިގެ ތަހުގީގަށެވެ. އެކަމާ ގުޅިގެން ސުވާލުކުރުމަށް ގަލްޓިއާ އާއި އޭނާގެ ދަރިފުޅު ޖޯން ވަލޮވިޗް ގަލްޓިއާ ފުލުހުންގެ ބެލުމުގެ ދަށަށް ގެންގޮސްފައިވަނީ ހުކުރު ދުވަހުގެ ހެނދުނުގެ ވަގުތެއްގައެވެ.
ޕީއެސްޖީއިން ނުކުންނަން ނިންމާފައިވީނަމަވެސް އަދިވެސް ކޮންޓްރެކްޓްގައި ހުރި ގަލްޓިއާ ވަނީ ނީސްގެ ކޯޗުކަމުގައި ހުރި އިރު ނަސްލީ އަދި މުސްލިމުންނާ ދެކޮޅު ވާހަކަތަކެއް ދެއްކި ކަމަށް ދެކެވޭ ވާހަކަތައް ދޮގުކޮށްފައެވެ.
އާރްއެމްސީ ސްޕޯޓްސް އާއި ފްރާންސްގެ އެހެން މީޑިއާތަކުން ވަނީ ނީސްގެ ކުރީގެ ޑައިރެކްޓާ އޮފް ފުޓްބޯލް ޖޫލިއަން ފޯނިއާ އެ ކުލަބުގެ ވެރިންނަށް ލީކުކޮށްލި އީމެއިލްއާ ހަވާލާދީ ރިޕޯޓްތައް ޝާއިއުކޮށްފައެވެ. އެ ރިޕޯޓުތަކުގައި ބުނާގޮތުން ގަލްޓިއާ ވަނީ ޓީމުގައި މާ ގިނަ ކަޅު ނަސްލުގެ މީހުނާއި މުސްލިމުން އުޅޭ ކަމަށް ބުނެފައެވެ.
ފްރާންސްގެ މީޑިއާތަކަށް އޭނާގެ ގާނޫނީ ވަކީލު ނެރުނު ބަޔާނެއްގައި ބުނެފައިވަނީ އިހާނެތިކޮށް އަބުރު ކަތިލާ ރިޕޯޓެއް ލިބުމުން ހައިރާންވާ ކަމަށެވެ.
