އިނގިރޭސި ޕްރިމިއާ ލީގުގައި ކްރިސްޓަލް ޕެލެސް އަތުން ބަލިވި މެޗުގައި ކުޅުންތެރިން ރަނގަޅަށް ކުޅުނު ކަމަށާއި، އެމީހުން ކުށްވެރި ކުރެވެން ނެތް ކަމަށް މެންޗެސްޓަރ ޔުނައިޓެޑުގެ ކޯޗު އެރިކް ޓެން ހާގް ބުނެފި އެވެ.
މެޗަށްފަހު ވާހަކަ ދައްކަމުން ޓެން ހާގް ބުނީ، އަމިއްލަ ދަނޑުގައި ވިޔަސް ނުވަތަ އެހެން ދަނޑެއްގައި ކުޅުނު ކަމަށް ވިޔަސް، ކްރިސްޓަލް ޕެލެސް އަތުން މޮޅުވާން ޖެހޭނެ ކަމަށެވެ. އޭނާ ބުނީ އިނގިރޭސި ޕްރިމިއާ ލީގުގެ ކޮންމެ މެޗަކީ ވެސް ވަރަށް އުނދަގޫ މެޗުތަކެއް ކަމަށެވެ. އެހެންކަމުން ކޮންމެ މެޗެއް ވެސް ކުޅެން ޖެހޭނީ އެންމެ މޮޅަށް ކަމަށާއި، ނަތީޖާ ނެރެވޭނީ އެގޮތަށް މަސައްކަތް ކޮށްގެން ކަމަށް ޓެން ހާގް ވަނީ ބުނެފަ އެވެ.
އިތުރަށް ޓެން ހާގް ބުނީ އޭނާ އަށް ކުޅުންތެރިން ކުށްވެރި ކުރެވެން ވެސް ނެތް ކަމަށެވެ. ޓެން ހާގް ޤަބޫލު ކުރާ ގޮތުގައި ކުޅުންތެރިން އެމީހުންގެ އެންމެ ރަނގަޅު މަސައްކަތް ކުރި އެވެ. ނަމަވެސް މައްސަލަ ދިމާވަނީ ނިންމާލުމުގައިކަން ފާހަގަކޮށް ޓެން ހާގް ބުނީ، މެޗުގައި ލަނޑު ޖަހާނެ ތިން ފުރުސަތު ލިބުނު ކަމަށެވެ. އެކަމުން ބުނެދެނީ ޔުނައިޓެޑަށް މެޗުގެ ކޮންޓްރޯލް އޮތް ކަމަށާއި، މެޗުގައި ރަނގަޅު ކަންތައްތައް ކުރެވުނު ކަމަށް އޭނާ ބުންޏެވެ. ލިބުނު ފުރުސަތުގެ ބޭނުން ނުހިފި މެޗުން ބަލިވުމަކީ ކަންބޮޑުވާ ކަމެއް ކަމަށް ވެސް އޭނާ ވަނީ ބުނެފަ އެވެ. އެކަން ފާހަގަ ކުރަމުން އޭނާ ބުނީ، އަބަދު ވެސް އެކަންކަން ރަނގަޅު ކުރުމަށް މަސައްކަތް ކުރަން ޖެހޭނެ ކަމަށާއި، ކުރިއަށް އޮތް ތަނުގައި ވެސް އެކަމަށް މަސައްކަތް ކުރާނެ ކަމަށެވެ،.
މީގެ އިތުރުން ޓެން ހާގް ބުނީ، އަމިއްލަ ދަނޑުގައި ކުޅޭއިރު އެކަންކަމަށް ޚާއްސަ ސަމާލުކަމެއް ދޭން ޖެހޭނެ ކަމަށެވެ. ޚާއްސަކޮށް އަމިއްލަ ސަޕޯޓަރުންގެ ކުރިމަތީގައި ކުޅެ، އެމީހުން މާޔޫސްވިޔަ ދީގެން ނުވާނެ ކަމަށް ވެސް އޭނާ ވަނީ ބުނެފަ އެވެ. އަބަދު ވެސް ރަނގަޅު ކުރަން ޖެހޭ ކަންކަން ފާހަގަވުމުން، ފަރިތަކުރުންތަކުގައި އެކަމަށް ޚާއްސަ ސަމާލުކަމެއް ދެމުން އަންނަ ކަމަށާއި، އެއް ދުވަހަށްވުރެ އަނެއް ދުވަހަކު ރަނގަޅު ކުރަން މަސައްކަތް ކުރާ ކަމަށް އޭނާ ވަނީ ބުނެފަ އެވެ.
މި ސީޒަންގެ ޕްރިމިއާ ލީގުގައި މިހާތަނަށް ޔުނައިޓެޑުގެ ފަރާތުން އަދި ފެންނަނީ ދަށް ކުޅުމެކެވެ. ލީގުގައި މިހާތަނަށް ކުޅުނު ހަތް މެޗުން އެ ޓީމު މޮޅުވެފައި ވަނީ އެންމެ ތިން މެޗުންނެވެ. އަނެއް ހަތަރު މެޗުން ވެސް ވަނީ ބަލިވެފަ އެވެ.
