ސްޕެއިިންގެ ފުޓުބޯޅަ ފެޑެރޭޝަންގެ ރައީސް ލުއިސް ރުބިއާލެސްގެ އަމަލަކީ އެއްވެސް ހާލަތެއްގައި ބަލައިގަނެވޭނެ ކަމެއް ނޫން ކަމަށް ސާޖިއޯ ރާމޯސް ބުނެފި އެވެ.

ސްޕެއިން ޤައުމީ ޓީމަށް ވެސް ކުޅެފައިވާ އަދި ދުނިޔޭގެ އެންމެ މޮޅު އެއް ޑިފެންޑަރު ރާމޯސް މިހެން ބުނީ، ރުބިއާލެސްގެ އަމަލާ މެދު ގިނަ ބަޔަކު ކަންބޮޑުވުން ފާޅުކުރަމުން ދަނިކޮށެވެ. ރާމޯސް ބުނީ، ފުޓުބޯޅަ ފެޑެރޭޝަނެއްގެ ރައީސްގެ ހައިސިއްޔަތިން އަދި ކުޅިވަރުގައި ޝާމިލުވެ އުޅޭ މީހެއްގެ ހައިސިއްޔަތުން ވެސް، ރުބިއާލެސް އެފަދަ ކަމެއް ކޮށްގެން ނުވާނެ ކަމަށެވެ. އޭނާ ބުނީ އެއީ ރުބިއާލެސް އަށް ހެދުނު ވަރަށް ބޮޑު ގޯހެއް ކަމަށާއި، އެއީ ވަރަށް ސީރިއަސް މައްސަލައެއް ކަމަށެވެ. ރާމޯސް ވަނީ ކަމާ ގުޅުން ހުރި އިދާރާތަކުން އެކަން ބަލައި، ތަހުގީގު ކުރުމަށް ވެސް ގޮވާލައިފަ އެވެ. މީގެ އިތުރުން ކުޅިވަރުގައި އަންހެން ކުޅުންތެރިންނަށް ބޭނުންވާ ރައްކާތެރިކަން ކަށަވަރު ކުރުމަށް އިދާރާތަކަށް ވެސް ގޮވާލައިފަ އެވެ.

މީގެ އިތުރުން ރާމޯސް ވަނީ ފީފާ އަންހެން ވޯލްޑް ކަޕް ކާމިޔާބު ކުރި ސްޕެއިންގެ ޤައުމީ އަންހެން ޓީމަށް މަރުހަބާ ކިޔައިފަ އެވެ. އޭނާ ބުނީ ސްޕެއިން އަކީ އަންހެން އަދި ފިރިހެން ފުޓުބޯޅައިގައި ވެސް ދުނިޔެ ބަލައިގަންނަ ކަހަލަ ވައްޓަފާޅިއެއްގައު ކުޅެމުން އަންނަ ޤައުމެއް ކަމަށެވެ.

ރުބިއާލެސްގެ މައްސަލައާ ގުޅިގެން ފީފާ އިން އޭނާ ސަސްޕެންޑު ކޮށްފައިވާއިރު، އެ ޤައުމުގެ ސަރުކާރުން ވެސް ވަނީ އެކަން ކުށްވެރިކޮށްފަ އެވެ.