ސްޕެއިންގެ ފުޓުބޯޅަ ފެޑެރޭޝަންގެ ރައީސް ލުއިސް ރުބިއާލޭސްއާ ދެކޮޅަށް އެ ޤައުމުގެ ސީނިއާ ފިިރިހެން ޓީމުގެ ކުޅުންތެރިން ވެސް ތެދުވެއްޖެ އެވެ.
ރުބިއާލޭސްގެ މައްސަލަ ހޫނުވެ، އޭނާ އަށް ފާޑުކިޔުންތައް އަމާޒުވަމުން ދަނީ، ފީފާ އަންހެން ވޯލްޑް ކަޕްގެ ފައިނަލަށް ފަހު، ޤައުމީ އަންހެން ޓީމުގެ ކުޅުންތެރިޔަކަށް ބޮސްދިން މައްސަލައިގަ އެވެ. އެ މައްސަލައިގައި ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ރުބިއާލޭސް ސަސްޕެންޑު ކޮށްފައިވާއިރު، އެ ޤައުމުގެ ސަރުކާރުން ވެސް ވަނީ ރުބިއާލޭސްގެ އަމަލާމެދު ކަންބޮޑުވުން ފާޅުކޮށްފަ އެވެ. އެ ހުރިހާ ޕްރެޝަރަކާއެކު ވެސް އޭނާ ވަނީ އިސްތިއުފާ ދިނުމަށް ދެކޮޅު ހައްދަވައިފަ އެވެ.
އެކަމާ ގުޅިގެން ސްޕެއިންގެ ޤައުމީ ފިރިހެން ޓީމުގެ ކެޕްޓަން އަލްވާރޯ މޮރާޓާ ބުނީ، ހިނގައިގެން އުޅޭ ހާދިސާއާއެކު ކުޅުންތެރިންގެ ފަރާތުން ވާހަކަ ދައްކަން ބޭނުންވާ ކަމަށެވެ. އޭނާ ބުނީ، ރުބިއާލޭސްގެ އަމަލަކީ މުޅި ސްޕެއިންގެ ފުޓުބޯޅަ އަށް ހުތުރު ނަމެއް ގެނުވި ކަމެއް ކަމަށެވެ. އޭނާ ބުނީ، ރުބިއާލޭސް ތަމްސީލު ކުރަމުން އައި އިދާރާގެ ހައިސިއްޔަތުން ބެލި ނަމަވެސް، އެ އަމަލަކީ އެއްވެސް ގޮތަކަށް ބަލައިގަނެވޭނެ އަމަލެއް ނޫން ކަމަށެވެ. އޭނާ ބުނީ ފިރިހެން ޓީމުގެ އެންމެހައި ކުޅުންތެރިން ތިބީ، ކުޅިވަރުން ރަމްޒުކޮށްދޭ އަސާސްތަކުގެ މަތީގައި ކަމަށެވެ. މޮރާޓާ ފާހަގަ ކުރި ގޮތުގައި ފުޓުބޯޅަ އަކީ، އަދި ޚާއްސަކޮށް ސްޕެއިންގެ ފުޓުބޯޅަ އަކީ އެކަކު އަނެކަކަށް އިހުތިރާމްކޮށް، ޤަދަރު ކުރަން ޖެހޭ އެއްޗެއް ކަމަށެވެ. އޭނާ ވަނީ އެފަދަ ކަމެއް ސްޕެއިންގެ ކުޅިވަރުގައި ހިނގިޔަ ނުދިނުމާއި، އަންހެން ކުޅުންތެރިންނަސް ރައްކާތެެރިކަން ކަށަވަރު ކޮށްުދިނުމަށް އިދާރާތަކަށް ގޮވާލައިފަ އެވެ.
މީގެ އިތުރުން މޮރާޓާ ވަނީ އަންހެން ވޯލްޑް ކަޕް ކާމިޔާބު ކުރި ސްޕެއިންގެ ކުޅުންތެރިންނަށް މަރުހަބާ ކިޔައިފަ އެވެ. އޭނާ ބުނީ އެއީ ސްޕެއިންގެ ކުޅިވަރުގައި އަދި ފުޓުބޯޅައިގައި ވަރަށް ބޮޑު ތާރީޚީ ކާމިޔާބެއް ކަމަށެވެ.
