ސުޕްރީމް ކޯޓުން ކުރި ޙުކުމާއި ގުޅިގެން ރައްޔިތުންގެ މަޖިލީހުގެ ގޮނޑި ގެއްލުނު، ނިމިދިޔަ 18 ވަރަ ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެންބަރު އަޙްމަދު ނާޒިމް، ބަދަލު ހޯދަން ހުށަހެޅި މައްސަލައަކީ ސިވިލް ކޯޓުން ބޭރުކޮށްލައިފިއެވެ.

ނާޒިމުގެ ގޮނޑި ގެއްލުނީ، މެންބަރުކަމުގައި ހުންނަވަނިކޮށް އޭނާގެ މައްޗަށް 2015 ވަނަ އަހަރު ސާބިތުވި މަކަރާއި ހީލަތް ހެދުމުގެ މައްސަލައިގައި ސުޕްރީމް ކޯޓުން 25 އަހަރު ދުވަހުގެ ޖަލު ޙުކުމެއް އިއްވުމާއި ގުޅިގެންނެވެ. ނަމަވެސް ނާޒިމުގެ ފަރާތުން އެ މައްސަލަ ރިވިއުކުރަން ސުޕްރީމް ކޯޓަށް ހުށައެޅުއްވުމުން ކޯޓުން ވަނީ އޭނާގެ ޙުކުމް ބާޠިލު ކޮށްފައެވެ.

ވުމާއެކު، ޤާނޫނާ ޚިލާފަށް ޖަލު އަދަބު ކަނޑައެޅުމުގެ ސަބަބުން އޭނާގެ އަސާސީ ޙައްޤުތަކާއި މިނިވަންކަން ގެއްލިފައިވާތީ، ގެއްލުމުގެ ބަދަލުގެ ގޮތުގައި، ގޮނޑި ގެއްލުމުގެ ސަބަބުން އެވީ މުއްދަތުގެ ތެރޭގައި ލިބެން ޖެހޭ މުސާރަ އާއި އިނާޔަތްތައް އަދި ޕެންޝަން ފައިސާ ދޭން ކަނޑައަޅައި ދިނުމަށް އެދި ނާޒިމް މައްސަލަ ހުށައެޅުއްވީއެވެ.

ނަމަވެސް ސިވިލް ކޯޓުގެ ރަޖިސްޓްރަރ ވަނީ އޭރު ވަނީ މައްސަލަ ބަލައިނުގަތުމަށް ނިންމަވާފައެވެ.

ރަޖިސްޓްރަރ މިހެން ނިންމެވީ، މަތީ ކޯޓަކުން ނިންމާ މައްސަލަތަކުގައި ބަދަލު ދިނުމުގެ އިހްތިސާސް ސިވިލް ކޯޓަށް ނެތްކަމަށް ބުނެއެވެ. ރަޖިސްޓްރަރގެ ނިންމުން ރިވިއުކޮށްދިނުމަށް އެދި ސިވިލް ކޯޓުގެ އިސް ގާޒީއަށް ހުށައެޅުއްވުމުން، އިސްގާޒީ ނިންމެވީ ރަޖިސްޓްރަރގެ ނިންމުން ރަނގަޅު ކަމަށެވެ.

އެހިސާބުން، ސިވިލް ކޯޓުގެ ރަޖިސްޓްރާރގެ ނިންމެވުމާއި މެދު ހިތްހަމަ ނުޖެހި، 4 އިސްތިއުނާފީ ނުކުތާއަކާއެކު ހައިކޯޓަށް ނާޒިމް  މައްސަލަ ހުށައެޅުއްވިއެވެ. ނަމަވެސް އެ މައްސަލަވެސް ނިމިފައިވަނީ ނާޒިމްއާ ދެކޮޅަށެވެ.

ވުމާއެކު، ނާޒިމްގެ ފަރާތުން ސުޕްރީމް ކޯޓަށް 3 އިސްތިއުނާފީ ނުކުތާއެއް ހުށައަޅައި، އެ ނިންމުން އިސްތިއުނާފު ކުރީއެވެ.

އެ މައްސަލައިގައި ސުޕްރީމް ކޯޓުން ވަނީ ސިވިލް ކޯޓުގެ ނިންމުމާއި، އެ ނިންމުމަށް ތައީދުކޮށް ހައިކޯޓުން ނިންމާފައިވާ ނިންމުން ޝަރުއީ އަދި ޤާނޫނީ އުސޫލުތަކާ ޚިލާފުކަމަށް ވިދާޅުވެ، އެ ނިންމުންތައް ބާތިލުކަމަށް ވިދާޅުވެފައެވެ.

އަދި މި މައްސަލައަކީ އަލުން ސިވިލް ކޯޓުން ބެލޭނެ މައްސަލައެއްކަމަށާއި، އެގޮތުން 14 ދުވަސް ތެރޭގައި މި މައްސަލަ ހުށައަޅައިފިނަމަ، ސިވިލް ކޯޓުން މި މައްސަލަ އަލުން ބަލައި ގޮތެއް ނިންމަންޖެހޭނެކަމަށް ފެނިލައްވާކަމަށް ފަނޑިޔާރުންގެ އިއްތިފާޤުން ނިންމެވިއެވެ.

އެހެންނަމަވެސް، އޭނާގެ ފަރާތުން މި މައްސަލަ ސިވިލް ކޯޓަށް ހުށައެޅީ ސުޕްރީމް ކޯޓުގެ ޙުކުމުގައި ބުނެފައިވާ 14 ދުވަސް ހަމަވި ފަހުންކަމަށް ބަޔާންކޮށް ސިވިލް ކޯޓުން ވަނީ މި މައްސަލަ ބޭރުކޮށްލާފައެވެ.