މެންޗެސްޓަރ ޔުނައިޓެޑުގެ ޖާޒީލުން ޙައްްޤުތޯ ކަށްވަރު ކުރާނީ ކުޅުންތެރިން ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.
ޓެން ހާގް މިހެން ބުނީ އެފްއޭ ކަޕްގެ ސެމީ ފައިނަލްގައި ބްރައިޓަނާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގަ އެވެ. އެ މެޗަށް ނުކުންނައިރު ޔުނައިޓެޑު އޮތީ ޔޫރޮޕާ ލީގުން ކެޓުމުގެ ހިތްދަތިކަން މަތީގަ އެވެ. ސެވިއްޔާގެ ދަނޑުގައި އެ ޓީމު އަތުން ބަލިވެ މުބާރާތުން ކެޓީ ކުޅުންތެރިންނަށް ގިނަ ގޯސްތަކެއް ހެދިގެންނެވެ. ބްރައިޓަން މެޗުގެ ކުރިން ވާހަކަ ދައްކަމުން ޓެން ހާގް ބުނީ ކޮންމެ މެޗަކީ ވެސް އިމްތިހާނެއް ކަމަށެވެ. އޭނާ ޤަބޫލު ކުރާ ގޮތުގައި ޓީމުން ކުޅެނީ މުަސްތަޤުބަލަށް ވިސްނައިގެންނެވެ. އޭނާ ބުނީ ޔުނައިޓެޑުގެ ޖާޒީލުމުގެ ޙައްޤު ހޯދާނީ ނުވަތަ ކަށަވަރު ކުރާނީ އެ ކުޅުންތެރިޔަކު އަމިއްލަ އަށް ކަމަށެވެ. ހަމައެބީދައިން ކޯޗެއްގެ ހައިސިއްޔަތުން އޭނާ އަށް އެކަން އޮންނާނީ އެގޮތުގައި ކަމަށް ޓެން ހާގް ބުންޏެވެ.
ޓެން ހާގް ބުނީ އަދިވެސް ޔުނައިޓެޑު ދަތުރުކުރަމުން ދަނީ "އެއް އޮޑިއެއް" ގައި ކަމަށެވެ. އެ ދަތުރުގެ ތެރެއިން މި ސީޒަންގައި ޔުނައިޓެޑުން ބޮޑު ކުރިއެރުންތަކެއް ހޯދާފައިވާ ކަމަށާއި ޔުނައިޓެޑުގައި ތަޖުރިބާ ވެސް އޮތް ނަމަވެސް، އަދިވެސް ކުރިއަށް ދާން ޖެހޭ ކަމަށެވެ. އޭނާ ބުނީ އާދިއްތަ ދުވަހު ކުޅޭ އެފްއޭ ކަޕްގެ ސެމީ ފައިނަލަކީ ކުރިމަތީގައި އޮތް ރަނގަޅު ކަމެއްގެ ގޮތުގައި ދެކެން ޖެހޭ ކަމަށެވެ. އޭނާ ބުނީ އެ މެޗަށްފަހު ވެސް ކުރިއަށް އެހެން މެޗުތަކެއް އޮތުމާއެކު، މިހާތަނަށް ޔުނައިޓެޑުން ކުރި މަސައްކަތް ކުޅުންތެރިން ސާބިތުކޮށްދޭންވާނެ ކަމަށެވެ. ނަމަވެސް ކުރިއަށް އޮތް ތަނުގައި ރަނގަޅު ކުރަން ޖެހޭ އެތައް ކަމެއް އެބަހުރި ކަމަށެވެ.
ރަނގަޅު ކަމަކީ އާދިއްތަ ދުވަހު މި ކުޅޭ އެފްއޭ ކަޕްގެ ސެމީ ފައިނަލަކީ ބޮޑު ފުރުސަތެއް. އެ މެޗަށްފަހު ވެސް ކުރިއަށް އެތައް މެޗުތަކެއް އެބަހުރި. ރަނގަޅު މެޗުތަކެއް، ރަނގަޅު ކުރަން ޖެހޭ ކަންކަން ވެސް އެބަހުރި.އެރިކް ޓެން ހާގް / މެންޗެސްޓަރ ޔުނައިޓެޑުގެ ކޯޗު
މި ސީޒަންގެ ކަރަބޯ ކަޕް ކާމިޔާބު ކުރެވިފައި އޮތުމުން، އެފްއޭ ކަޕް ކާމިޔާބުކޮށް ކާމިޔާބު ސީޒަނެއް ނިންމާލަން ބޭނުންވާކަން ފާހަގަކުރަމުން ޓެން ހާގް ބުނީ، އެކަން ކުރެވިއްޖެނަމަ އެއީ ހިތްހަމަޖެހުމަކަށް ވާނެ ކަމަށެވެ. ޓެން ހާގް ބުނީ މެންޗެސްޓަރ ޔުނައިޓެޑުގައި އަބަދު ވެސް އުންމީދުތައް ހުންނާނީ އުހުގައި ކަމަށާއި، އެހެން ކަމުން ކުރިއަށް ދާން ޖެހޭނީ އެކަންކަމަށް ސަމާލުވެގެން ކަމަށެވެ. އަދި ކުޅުންތެރިންނާއި، ކޯޗިން މުވައްޒަފުން ގުޅިގެން ކުރެވޭ މަސައްކަތުގައި ކުލަބުގެ ވެރިންނާއި، ސަޕޯޓަރުންނަށް ހިނިތުންވުން ގެނެސްދެވޭނެ ކަމަށެވެ.
ބްރައިޓަނާ ދެކޮޅަށް ޔުނައިޓެޑުން ނުކުންނާނީ އާދިއްތަ ދުވަހުގެ ރޭ 20:30 ގަ އެވެ.
