އިނގިރޭސި ޕްރިމިއާ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުން މޮޅުވެ މެންޗެސްޓަރ ޔުނައިޓެޑުން ލީގު ތާވަލްގެ ތިން ވަނަ އަށް ޖެހިލައިފި އެވެ.

ފޮރެސްޓުގެ ދަނޑުގައި އާދިއްތަ ދުވަހުގެ ރޭ ކުޅުނު މެޗު ޔުނައިޓެޑުން ކާމިޔާބު ކުރީ 2-0 އިންނެވެ. ޔުނައިޓެޑުން މެޗަށް ނިކުތީ އަނިޔާގެ ސަބަބުން ގިނަ ކުޅުންތެރިން ނުހިމަނަ އެވެ. އޭގެ ތެރޭގައި މިފަހުން އެންމެ މޮޅު ކުޅުމެއް ދައްކަމުން އައި މާކަސް ރަޝްފޯޑު، ލޫކް ޝޯ، ލިސަންދްރޯ މާޓިނޭޒް އަދި އަލެހަންދްރޯ ގަނާޗޯ ހިމެނެ އެވެ. މެޗުގައި ޔުނައިޓެޑުން ލަނޑު ޖަހައި ލީޑު ނަގާފައި ވަނީ 32 ވަނަ މިނެޓުގަ އެވެ. އެއީ ފޮރެސްޓުގެ އޭރިޔާ ތެރެއިން ޔުނައިޓެޑުގެ އެންތަނީ މާޝިއަލް ފޮނުވާލި ބޯޅަ އެ ޓީމުގެ ގޯލް ކީޕަރު ކޭލޯ ނަވާސްގެ އަތުގައި ޖެހި ރީބައުންސަށް ނިކުތްބޯޅަ ގޯލަށް ފޮނުވާލައިގެން އެންޓޮނީ ޖަަަހައިދިން ލަނޑުންނެވެ. ޔުނައިޓެޑުގެ ދެ ވަނަ ލަނޑު ފެނުނީ މެޗުގެ ދެ ވަނަ ހާފުގަ އެވެ. އެއީ އެންޓޮނީ ޖައްސާލި ބޯޅަ ކީޕަރު ނަވާސް ކައިރިން ގޯލަށް ފޮނުވާލައިގެން ޑިއޯގޯ ޑަލޮޓް ޖަހައިދިން ލަނޑެކެވެ.

މޮޅާއެކު ޔުނައިޓެޑުން ތިން ވަނަ އަށް ޖެހިލީ 30 މެޗުން 59 ޕޮއިންޓާއެކު އެވެ. ހަމަ އެ އަދަދަށް މެޗު ކޫޅެގެން ހަތަރު ވަނައިގައި ނިއުކާސަލް ޔުނައިޓެޑު އޮތީ 56 ޕޮއިންޓާއެކު އެވެ. ދެ ވަނައިގައި މެންޗެސްޓަރ ސިޓީ 70 ޕޮއިންޓާއެކު އޮތްއިރު، އެއް ވަނައިގައި އާސެނަލް އޮތީ 74 ޕޮއިންޓާއެކު އެވެ.