ހުރިހާ ފުލުހުންވެސް އެންމެ ބޮޑު އިސްކަމެއް ދެއްވަންވީ އެއް ކަމަކީ، އިތުބާރާއި ޔަޤީންކަން ދެމެހެއްޓުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
34 ވަނަ ޕޮލިސް އިނީޝިއަލް ޓްރެއިނިންގ ކޯހުގެ ދަސްވެނިވެ، ހިނގާލުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުން ރައީސް ޞާލިހް ވިދާޅުވީ ދިވެހި ފުލުހުންނަށް ހުރި ގޮންޖެހުންތައް ވަރަށް ގިނަ ކަމަށެވެ. އޭގެ ތެރެއިންވެސް އެންމެ ބޮޑު އިސްކަމެއް ދެއްވަންވީ، ރައްޔިތުންނަށް ޚިދުމަތް ދިނުމުގައި ފުލުހެއްގެ ހައިސިއްޔަތުން ދަމަހައްޓަންޖެހޭ ޕްރޮފެޝަނަލިޒަމް ދަމަހައްޓަން ކަމަށެވެ.
ތިޔައިން ކޮންމެ ފުލުހެއްގެ ހަނދާނުގައި ބަހައްޓަންވީ ކަމަކީ، ފުލުހުންގެ އިދާރާއަކީ ވެސް ބޮޑު އެއް ޢާއިލާކަން. މި ޢާއިލާގެ ބަދަހިކަމާއި، ރީތި ނަން ދެމެހެއްޓުމަކީ، ތިޔައިން ކޮންމެ ފުލުހެއްގެ ކޮނޑުގައި އެޅިފައިވާ ޒިންމާއެއް.ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް
ރައީސް ވިދާޅުވީ ހަމައެއާއެކު، ފުލުހުން ޤަބޫލުކުރަންޖެހޭ އަނެއް ޙަޤީޤަތަކީ، އެންމެ ފުލުހަކަށް ހެދޭ އެންމެ ގޯހަކުން ވެސް، މުޅި މުއައްސަސާގެ އަގު ވެއްޓިގެން ހިނގައިދާނެކަން ކަމަށެވެ. ފުލުހުންގެ ޚިދުމަތާމެދު ކުރާ އިތުބާރާއި ޔަޤީންކަމަށް ބުރޫއަރާފާނެކަން ކަމަށާއި، ތަމްރީނު ފުރިހަމަ ކުރައްވައިގެން ޚިދުމަތަށް ނުކުންނަވާ ހުރިހާ ފުލުހުންވެސް އެންމެ ބޮޑު އިސްކަމެއް ދެއްވަންވީ އެއް ކަމަކީ، މި އިތުބާރާއި ޔަޤީންކަން ދެމެހެއްޓުން ކަމަށް ރައީސް ވިދާޅުވިއެވެ.
އެނގިވަޑައިގަންނަވާނެ، އަޅުގަނޑުމެން ވަރަށް ދަތި އުނދަގޫތަކެއްގެ ތެރޭގައި، ތިން އަހަރު ވަންދެން އުޅެފިން. މި ދެންނެވީ ކޯވިޑުގެ ބަލިމަޑުކަމުގެ ވާހަކަ. އެ ދަތިކަމުގެ ތެރޭގައި ފުލުހުންގެ މުއައްސަސާއިން ވަރަށް އަގުހުރި، ވަރަށް ބުރަ މަސައްކަތްތަކެއް ދިވެހި ރައްޔިތުންނަށް ފޯރުކޮށްދިން. ކޮމިޝަނަރ އޮފް ޕޮލިސް މުޙައްމަދު ޙަމީދާއި، ކޮމިޝަނަރުގެ ޓީމުން އެ ކުރެއްވި މަސައްކަތްތައް، ދިވެހި ސަރުކާރާއި ދިވެހި ރައްޔިތުންވެސް ހެޔޮހިތުން ބަލައިގަނޭ.ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް
ރައީސް ވިދާޅުވީ ކޮވިޑްގެ ދަތިކަމަށްފަހު މުޅި ރާއްޖެ މިއަދު މިސްރާބު ޖަހާފައި މިވަނީ، ދެމެހެއްޓެނިވި ތަރައްޤީގެ މުޅިން އާ މަންޒިލަކަށް ކަމަށެވެ. ދެމެހެއްޓެނިވި ތަރައްޤީއަކީ މުޖުތަމަޢުގެ ޞުލްޙަޔާއި ހަމަޖެހުމާ އެކުގައި ޙާޞިލުކުރެވޭ ކަމެއް ކަމަށާއި، މުޖުތަމަޢުގެ ޞުލްޙަ މަސަލަސްކަން ދެމެހެއްޓުމުގެ އެންމެ ބޮޑު މަސްއޫލިއްޔަތެއް އުފުލާ ބަޔަކީ ދިވެހި ފުލުހުން ކަމަށް ރައީސް ވިދާޅުވިއެވެ.
އެހެންކަމުން، މުޅި ރާއްޖޭގެ ތަރައްޤީއަށްޓަކައި މިކުރާ މަސައްކަތް ކާމިޔާބު ކުރުމުގައި، ދިވެހި ފުލުހުންގެ ބައިވެރިވުމާއި އެއްބާރުލުން ވަރަށް ފުޅާ ދާއިރާއެއްގައި ޤައުމަށް ބޭނުންވާ ކަމަށް ރައީސް ވިދާޅުވިއެވެ. ކޮންމެ ޤައުމެއްގައިވެސް އިޤްތިޞާދީ ހަމަޖެހުމާއި، ތަރައްޤީގެ އަރުތަ ޙާޞިލުކުރެވެނީ، ހަރުދަނާ ފުލުހުންގެ ޚިދުމަތެއް ޤާއިމުވެ އޮވެގެން ކަމަށެވެ. މިއަދު ތަމްރީނު ފުރިހަމަކުރުމަށްފަހު، އަލަށް ފުލުހުންގެ ޚިދުމަތާ ގުޅޭ ފުލުހުންގެ ސިކުނޑީގައި ވެސް މި މުހިންމު ޒިންމާ އަބަދުވެސް ހަރުލައި ހުރުމަކީ އެމަނިކުފާނު ވަރަށް ބޮޑަށް އެދިވަޑައިގަންނަވާ ކަމެއް ކަމަށް ރައީސް ވިދާޅުވިއެވެ.
