ދާދި ފަހުން ލިވަޕޫލަށް ބަދަލުވި ނެދަލެންޑްސްގެ ކޯޑީ ގަކްޕޯ އަށް އެންމެ އެކަށީގެންވާ ވަގުތު ދޭން ޖެހޭނެ ކަމަށް ވާޖިލް ވެން ޑައިކް ބުނެފި އެވެ.
ވެން ޑައިކާއި ގަކްޕޯ އަކީ ޤައުމީ ޓީމުގައި ވެސް ވަރަށް ގާތް ގުޅުމެއް އޮންނަ ދެ ކުޅުންތެރިންނެވެ. ގަކްޕޯ ހޯދުމުގެ ރޭހުގައި މެންޗެސްޓަރ ޔުނައިޓެޑު އޮއްވާ، އޭނާ ލިވަޕޫލަށް ބަދަލުވުމުގައި ވެން ޑައިކްގެ ދައުރު ބޮޑު ކަމަށް ރިޕޯޓުތައް ބުނެ އެވެ. ޕްރިމިއާ ލީގުގައި ލެއިސްޓަރ ސިޓީއާ ދެކޮޅަށް ކުޅުނު މެޗަށްފަހު ވެން ޑައިކް ބުނީ ގަކްޕޯ އަށް އޭނާ އެއްވެސް ކިޔައިދޭން ޖެހޭނެ ކަމަށް ޤަބޫލު ނުކުރާ ކަމަށެވެ. ގަކްޕޯ އަކީ ވަރަށް މޮޅަށް ކުޅޭ ރަނގަޅު ކުޅުންތެރިޔެއްކަން ފާހަގަ ކުރަމުން ވެން ޑައިކް ބުނީ، އޭނާ އަށް ލިވަޕޫލުން ދޭން ޖެހޭނީ ވަގުތު ކަމަށެވެ. އޭނާ ބުނީ ކުލަބާއި، ކުލަބުގެ ސަޕޯޓަރުން ވެސް ގަކްޕޯ އަށް އެންމެ އެކަށީގެންވާ ވަގުތު ދޭނެ ކަމަށް އުންމީދު ކުރާ ކަމަށެވެ. މީގެ އިތުރުން ވެން ޑައިކް ބުނީ ލިވަޕޫލްގައި މިހާރު އޭނާ ކުޅެމުން އަންނަތާ ފަސް އަހަރު ވަނީ ކަމަށެވެ. ވެން ޑައިކް ބުނީ ލިވަޕޫލަށް ކުޅުމަކީ ލިބޭ ވަރަށް ބޮޑު އުފަލެއް އަދި ފަޚުރެއް ކަމަށެވެ.
ޕީއެސްވީ ދޫކޮށް ގަކްޕޯ ލިވަޕޫލަށް ބަދަލުވީ ހަ އަހަރު ދުވަހުގެ އެއްބަސްވުމެއްގެ ދަށުންނެވެ. ރިޕޯޓުތަކުގައިވާ ގޮތުން ޕީއެސްވީން ގަކްޕޯ ހޯދުމަށް ލިވަޕޫލުން ޖުމުލަ 50 މިލިއަން ޕައުންޑު ޚަރަދުކުރި އެވެ. އެކަމާ ގުޅިގެން ޕީއެސްވީގެ ޑިރެކްޓަރު މާސެލް ބްރޭންޑް ވިދާޅުވީ، ޕީއެސްވީން ގަކްޕޯގެ ޓްރާންސްފާ ފީއާ ގުޅޭ އެއްވެސް އެންގުމެއް ހާމަކުރަން ބޭނުންނުވާ ކަމަށެވެ. ނަމަވެސް ގަކްޕޯގެ ޓްރާންސްފާ އަކީ ޕީއެސްވީގެ ރެކޯޑު ޓްރާންސްފާއެއް ކަމަށް ވިދާޅުވި އެވެ.
