ޕެރިސް ސެއިންޓް ޖާމަން (ޕީއެސްޖީ)އާ މެދު ހިތްހަމަނުޖެހި ޖެނުއަރީގައި ކުލަބު ދޫކޮށްލަން ކީލިއަން އެމްބާޕޭ އުޅޭ ކަމަށް ދެކެވޭ ވާހަކަތައް އޭނާ ދޮގުކޮށްފިއެވެ.
ދާދި ފަހުން ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުން ޕީއެސްޖީއާއެކު އެމްބާޕޭ ހުރީ ހިތްހަމަނުޖެހިފައެވެ. އެހެންކަމުން އޭނާ ބޭނުންވަނީ ވީއެންމެ އަވަހަކަށް އެ ކުލަބު ދޫކޮށްލަން ކަމަށް ވެސް ރިޕޯޓުތަކުގައި ވަނީ ބުނެފައެވެ. އެގޮތުން ޖެނުއަރީ މަހު ކުލަބް ދޫކޮށްލަން ބޭނުންވާކަން އެމްްބާޕޭ ކުލަބަށް އެންގި ކަމަށް ބައެއް ރިޕޯޓުތަކުގައިވެއެވެ. ނަމަވެސް ޕީއެސްޖީގެ ސްޕޯޑިން ޑިރެކްޓަރު ލުއިސް ކަމްޕޯސް ވަނީ އޭރު އެވާހަކަތައް ދޮގުކޮށްފައެވެ. އޭނާ އޭރު ބުނީ އެމްބާޕޭ އޭނާ ގާތު އެ ބާވަތުގެ އެއްވެސް ވާހަކައެއް ނުދައްކާ ކަމަށެވެ.
ފްރާންސް ލީގުގައި ޕީއެސްޖީން މާސޭ ބަލިކުރި މެޗަށްފަހު އާރުއެމްސީ ސްޕޯޓްސްއަށް އެމްބާޕޭ ބުނީ ޖެނުއަރީ މަހު ޕީއެސްޖީ ދޫކޮށްލަން ބޭނުންވާފަދަ ވާހަކައެއް އޭނާ ދައްކާފައި ނުވާ ކަމަށެވެ. މީގެ އިތުރުން ކުލަބާމެދު މިހާތަނަށް އެއްވެސް ހިތްހަނުޖެހުމެއް ވެސް ނެތް ކަމަށާއި އޭނާއާ ގުޅޭ ގޮތުން ދެކެވޭ ވާހަކަތަކަކީ ދޮގެއް ކަމަށް އެމްބާޕޭ ބުންޏެވެ.
ޖެނުއަރީގައި ޕެރިސް ސެއިންޓް ޖާމަން ދޫކޮށްލަން ބޭނުންވާ ވާހައެއް އަހަރެން ނުބުނަން. ކުލަބާމެދު އަހަރެން މިހުރީ ހިތްހަމަނުޖެހިފައެއް ވެސް ނޫން. އެ ވާހަކަތަކަކީ ތެދެއް ނޫން.ކީލިއަން އެމްބާޕޭ / ޕީއެސްޖީގެ ފޯވާޑް
އެމްބާޕޭގެ އެއްބަސްވުން ޕީއެސްޖީން އައުކުރީ ދާދި ފަހުންނެވެ. އޭނާ ޕީއެސްޖީ ދޫކޮށް ސްޕެއިންގެ ރެއާލް މެޑްރިޑަށް ބަދަލުވާނެ ކަމަށް ވެސް އޮތީ އޭރު ވާހަކަ ފެތުރިފައެވެ. ނަމަވެސް އެމްބާޕޭ ވަނީ 2025 ވަނަ އަހަރާ ހަމައަށް ޕީއެސްޖީގައި މަޑުކުރުމަށް އެއްބަސްވުން އައުކޮށްފައެވެ.
