ސްރީލަންކާއިން ރާއްޖެއާ ގުޅިގެން ކްރިމިނަލް އިންވެސްޓިގޭޝަންގެ މަސައްކަތްތަކެއް ކުރަން ނިންމައިފިއެވެ.

ލަންކާގެ ޖަސްޓިސް މިނިސްޓަރ ވިޖެޔާދަސާ ރާޖަޕަކްސަ ވަނީ އެގައުމުން ރާއްޖެއާ ގުޅިގެން ކްރިމިނަލް އިންވެސްޓިގޭޝަންތައް ކުރުމަށް ބޭނުންވާތީ މިކަމަށް އެދި ޕްރޮޕޯސަލެއް ތައްޔާރުކޮށްފައެވެ.

ބުރާސްފަތި ދުވަހު އެގައުމުގެ ކެބިނެޓު މިނިސްޓަރުންގެ މެދުގައި ބޭއްވި ބައްދަލުވުމުގައި މި ޕްރޮޕޯސަލް ވަނީ އެޕްރޫވްކޮށްފައެވެ.

ލަންކާ ސަރުކާރުން ބުނީ މި ޕްރޮޕޯސަލްގައި ހިމަނާފައިވާ ކަންކަމުގެ ތެރޭގައި ދެގައުމުން ކުރިއަށްގެންދާ އޮޕަރޭޝަންތަކުގައި ދިމާވާ ގޮންޖެހުންތައް ކުޑަކުރުމާއި، ދެގައުމުގެ ގުޅުން ބަދަހިކުރުން ހިމެނޭ ކަމަށެވެ.

މިކަމާއި ގުޅޭ އެއްވެސް މައުލޫމާތެއް ދިވެހި ސަރުކާރުން މިހާތަނަށް ހިއްސާކޮށްފައެއް ނުވެއެވެ.