މިހާރު ކުރިއަށްދާ ކޮމަންވެލްތު ގޭމްސްގެ ބެޑްމިންޓަން މިކްސް އިވެންޓުން ރާއްޖެ ކަޓައިފިއެވެ.

ގްރޫޕް ސްޓޭޖުން ރާއްޖެ ކެޓީ ކުޅުނު ތިން މެޗުން ވެސް ބަލިވުމުންނެވެ. ފުރަތަަމަ މެޗުގައި ރާއްޖެ ބަލިވީ، ސްކޮޓްލެންޑު އަތުން 5-0 ންނެވެ. ދެވަނަ މެޗުގައި ރާއްޖެ 5-0 ން ކެނެޑާ އަތުން ބަލިވީއިރު، ފަހު މެޗުގައި ހޮނިހިރު ދުވަހުގެ ރޭ ބަލިވީ ޔޫގާންޑާ އަތުން 4-1 ންނެވެ.

ޔޫގާންޑާ އަތުން ރާއްޖެ ބަލިވި މެޗުގައި ފުރަތަމަ ކުޅެން އެރީ، ފިރިހެން ސިންގަލްސްގައި ޒަޔާން ޒަކީއެވެ. ޒަޔާންއާ ދެކޮޅަށް ނިކުމެ ޔޫގާންޑާގެ ބްރަޔާން ކަސީރްޔޭ ވަނީ 21-4 އަދި 21-4 ން ފުރަތަމަ ގޭމުން މޮޅުވެފައެވެ. ދެވަނަ ގޭމުގައި އަންހެން ސިންގަލްސްގައި ރާއްޖޭގެ ނަބީހާ ނުކުތީ ޔޫގާންޑާގެ ފާދިލާ ޝާމިކާ ދެކޮޅަށެވެ. އެ ގޭމުގެ ސެޓުތައް ފާދިލާ ޝާމިކާ ގެންދިޔައީ 22-20 އަދި 21-17 ންނެވެ. ތިން ވަނަ ގޭމުގައި ފިރިހެން ޑަބަލްސްގައި ރާއްޖޭގެ އަޖުފާން އަދި ނިބާލް ނުކުތީ ޔޫގާންޑާގެ ބްރިއާން އަދި ޑެނިއަލްގެ ޕެއާއާ ދެކޮޅަށެވެ. ގޭމުގެ ފުރަތަމަ ސެޓު 21-14 ން ޔޫގާންޑާއިން ހޯދި ނަމަވެސް، ރާއްޖެއިން ވަނީ ދެވަނަ ސެޓު 21-14 ން ހޯދާފައެވެ. ނަމަވެސް ތިންވަނަ ސެޓު 21-15 ން ހޯދާ ޔޫގާންޑާއިން ވަނީ ގޭމު ހޯދާފައެވެ.

ހަތަރު ވަނަ ގޭމުގައިި އަންހެން ޑަބްލްސްގައި ރާއްޖޭގެ ނަބީހާ އަދި ނަބާހާ ނުކުތީ ޔޫގާންޑާގެ ހުސީނާ ކޮބުގާބޭ އަދި ފާދިލާގެ ޕެއާ އާ ދެކޮޅަށެވެ. ޔޫގާންޑާއިން މި ގޭމު ކާމިޔާބުކުރީ 21-17 އަދި 21-17 ންނެވެ. ފަހު ގޭމުގައި މިކްސް ޑަބަލްސްގައި ރާއްޖޭގެ ނަބާހާ އަދި ޒަޔާން ނުކުތީ ޔޫގާންޑާގެ ޑެނިއަލް އަދި ހުސީނާއާ ދެކޮޅަށެވެ. މި ގޭމުގައި ރާއްޖެއިން ވަނީ ޔޫގާންޑާ ބަލިކޮށްފައެވެ. އެއީ 21-18 ން ޔޫގާންޑާ ފުރަތަމަ ސެޓު ހޯދާފައި ވަނިކޮށް، ޖެހިގެން އައި ދެ ސެޓު ކާމިޔާބުކޮށްގެންނެވެ. އެ ދެ ސެޓު ރާއްޖެއިން ހޯދީ 21-14 އަދި 21-14 ންނެވެ.

ބެޑްމިންޓަންގެ އޯޕަން ބައިގެ މެޗުތައް ފަށާނީ ބުދަ ދުވަހުއެވެ.