މުސްލިމް ނޫން ނޫސްވެރިއަކު މާތްވެގެންވާ މައްކާގެ ބިމަށް ވެއްދި ސައުދީގެ މީހަކު ހައްޔަރުކޮށްފިއެވެ.
ހުކުރު ދުވަހު ސައުދީ ދުލުހުންގެ ސްޕޯކްސްޕަރސަން ބުނީ އޭނާގެ އަތުގައި އޮތީ އެމެރިކާގެ ޕާސްޕޯޓެއް ކަމަށެވެ.
މި ހަފްތާ ތެރޭގައި އިސްރާއިލްގެ ޗެނަލް 13 ޓީވީ ނިއުސްގެ ނޫސްވެރިއެއް ކަމަށްވާ ގިލް ޓެމެރީ ވަނީ އޭނާ މައްކާ ތެރޭގައި ދަތުރުކުރާ ވީޑިއޯއެއް އާންމުކޮށްފައެވެ. މާތްވެގެންވާ މައްކާގެ ބިމަށް މުސްލިމުން ނޫން މީހުން ވަނުމަކީ މަނާ ކަމެކެވެ.
އޭނާ ވަނީ އަރަފާތު ބިމަށްވެސް ގޮސްފައެވެ. އޭނާގެ ރިޕޯޓު ޕަބްލިޝްކޮށްފައިވަނީ އެނބުރި އިސްރާއީލަށް ދިއުމަށް ފަހުއެވެ. އެ ރިޕޯޓުގައި އޭނާ ބުނެފައިވަނީ މައްކާއަށް ދިއުމަކީ އޭނާ ދެކުނު ހުވަފެނެއް ކަމަށާއި، އޭނާ މައްކާއަށް ގެންދިއުމަށް އެއްބަސްވި މީހާއަށް އެއީ އިސްރާއީލުގެ ނޫސްވެރިއެއް ކަމެއް ނޭނގޭނެ ކަމަށެވެ.
އަންގާރަ ދުވަހު ޓެމެރީ ވަނީ މައާފަށް އެދި ޓްވީޓެއް ކޮށްފައެވެ. އޭނާގެ ޓްވީޓުގައި ބުނެފައިވަނީ އޭނާ މައްކާއަށް ކުރި ދަތުރަކީ މައްކާގެ މުހިންމުކަން ދައްކާލުމަށާއި، އިސްލާމް ދީނުގެ ރީތިކަން ދައްކާލުމަށް ކުރި ދަތުރެއް ކަމަށެވެ.
