ސްރީލަންކާގެ ރައީސް އެ ޤައުމު ދޫކުރައްވައި ފިއްލަވައިގެން ރާއްޖެ ވަޑައިގެންފިކަމަށް ބޭރުގެ މީޑިއާތަކުން ރިޕޯޓްކޮށްފިއެވެ.
އޭއެފްޕީ ނިިއުސް އެޖެންސީން ލަންކާގެ އޮފިޝަލުންނާ ހަވާލާދީ ބުނެފައިވަނީ އަންގާރަ ދުވަހުގެ ރޭގެ ވަގުތެއްގައި އެމަނިކުފާނު ފިއްލަވައިވަޑައިގެންފައިވާ ކަމަށެވެ. އެމަނިކުފާނު ވަޑައިގަތީ ފްލައިޓުގައި ކަމަށް ބުނި ނަމަވެސް ވަޑައިގަތީ ކޮން ޤައުމަކަށް ކަމެއް ހާމަކޮށްފައެއް ނުވެއެވެ.
އަންގާރަ ދުވަހުގެ ރޭ ދަންވަރުގެ ވަގުތެއްގައި ގޮތަބަޔާ ރާއްޖެ ވަޑައިގެންފައިވާ ކަމަށް ލަންކާއާއި ބޭރުގެ ބައެއް މީޑިއާތަކުން ވަނީ ރިޕޯޓްކޮށްފައެވެ. ނަމަވެސް އެމަނިކުފާނު ރާއްޖެއަށް ވަޑައިގެންނެވިކަން ދިވެހިރާއްޖޭގެ އެއްވެސް އިދާރާއަކުން ކަށަވަރުކޮށްދީފައެއް ނުވެއެވެ.
ލަންކާގެ ހާލަތު ގޯސްވުމުގެ ސަބަބުން ރައީސް ގޮތަބަޔާ 13 ޖުލައިގައި އިސްތިއުފާ ދެއްވާނެ ކަމަށް ވިދާޅުވެ، އިސްތިއުފާގެ ސިޓީފުޅުގައި ސޮއިވެސް ކުރައްވާފައިވާކަމަށާއި އެމަނިކުފާނު ބޭނުންފުޅުވަނީ އިސްތިއުފާ އިއުލާންކުރެއްވުމުގެ ކުރިން ޤައުމު ދޫކޮށް ވަޑައިގަންނަވަން ކަމަށް މީޑިއާތަކުން ރިޕޯޓްކުރެއެވެ.
އަދި އަންގާރަ ދުވަހު ގޮތަބަޔާ ފުރަތަމަ ފިއްލަވައި ވަޑައިގަންނަވަން އުޅުއްވުމުން ލަންކާ އެއަރޕޯޓުން ވަނީ އެމަނިކުފާނު ހުއްޓުވާފައެވެ. އަދި ބައެއް ޤައުމުތަކުން ވަނީ އެމަނިކުފާނަށް އެ ޤައުމުތަކަށް ވަޑައިގަތުމުގެ ހުއްދަ ނުދޭން ވެސް ނިންމާފައެވެ.
