މުޅި އުންމަތަށް އިސްލާމްދީން ފެތުރިގެންދިޔައީ ރިވެތި އަޚުލާގުގެ ސަބަބުން ކަމަށް ހައްޖު ޚުތުބާގައި ބުނެފިއެވެ.
އަރަފާތު ބިމުގައި ހުންނަ މަސްޖިދް އަލް ނަމީރާގައި އިއްވި ހައްޖު ޚުތުބާގައި ވަނީ އިސްލާމްދީނުގައި އޮންނަ އިންސާނިއްޔަތު ކަމަކީ އެހެން އެއްވެސް ދީނެއްގައި އޮންނަ އިންސާނިއްޔަތު ކަމާ އެއްވަރު ވާނެ ކަމެއް ނޫން ކަމަށް ބުނެފައެވެ. އެއީ ރަސޫލުންނާއި ނަބިއްޔުންނާއި، ސަހާބީން ވަރަށް ތެދުވެރިކަމާއެކު ކުރެއްވި މަސައްކަތުގެ ނަތީޖާ ކަމުގައި ޚުތުބާގައި ފާހަގަކޮށްފައިވެއެވެ.
ޚުތުބާގައި ވަނީ މުސްލިމުން ތައުހީދުގެ މަތީގައި ދެމިތިބުމަށް ވަރަށް ބޮޑަށް ނަސޭހަތްތެރިވެފައެވެ. އަހަރެމެންނާއި، އަހަރެމެންގެ ކުރިން އުފެއްދެވި ބަޔަކުވެސް އުފެއްދެވީ ﷲ ސުބުހާނަހޫ ވަތައާލާއަށް އަޅުކަން ކުރުމަށް ކަމަށާއި، ހުރިހާ ރަސޫލުންނާއި، ނަބިއްޔުންގެ ދައުވަތަކީ ތައުހީދު ކަމަށް ޚުތުބާގައި ބުނެފައިވެއެވެ. ﷲ ފިޔަވާ އެހެން އެއްވެސް އިލާހަކަށް އަޅުކަން ނުކުރުމަށް ކޮންމެ ނަބިއްޔެއްވެސް ގޮވާލއްވާފައިވެއެވެ.
ޚުތުބާގައި ބުނީ ކީރިތި ރަސޫލާ މުހައްމަދު صلى الله عليه وسلم އަޅަމެންގެ މައްޗަށް ގެނެސްދެއްވި ހުރިހާ ކަމެއް ހިތުން ތެދުކޮށް ގަބޫލުކުރަންޖެހޭ ކަމަށެވެ. ސުވަރުގޭގެ އުފާވެރި ޚަބަރު ދެއްވައި، ނަރަކައިގެ ބިރުވެރިކަމުގެ އިންޒާރު ދެއްވާ ބޭކަލެއްގެ ގޮތުގައި އެކަލޭގެފާނު ފޮނުއްވާފައިވާއިރު، އިސްލާމް ދީން ބިނާވެގެންވަނީ މައިގަނޑު 5 ރުކުނެއްގެ މައްޗަށް ކަމަށް ޚުތުބާގައި ބުނެފައިވެއެވެ.
މި ފަސް ރުކުނަށްވެސް މުސްލިމުން ރައްކާތެރިވާންޖެހޭ ކަމަށާއި، ދެވަނަ ރުކުން ކަމުގައިވާ ނަމާދު ގާއިމްކުރުމަކީ ހުތުރުކަން ބޮޑުވެގެންވާ ފާހިޝް އަމަލުތަކާއި މުންކަރާތްތައް ނަހީކުރާ އެއްޗެކެވެ. މީގެ އިތުރުން ކީރިތި ގުރުއާނުގައި ޒަކާތް ދިނުމަށް ގޮވާލައްވާ އަމުރުކުރައްވާފައިވާއިރު މުސްލިމުން އެއްބައިވަންތަ ކުރުވާ ކަންކަމުގެ ތެރޭގައި ޒަކާތް ދީ އޭގެ މުހުތާދުވެރިންނަށް މުހުތާދުތައް ފުއްދައިދިނުން ހިމެނޭ ކަމަށް ޚުތުބާގައި ވަނީ ބުނެފައެވެ. އަދި ކުޅަދާނަކަން ލިބިގެންވާ މީހާ ގެފުޅަށް ގޮސް ހައްޖުވުމަކީ މުސްލިމުންގެ މައްޗަށް ވާޖިބުކުރައްވާފައިވާ ކަމެއް ކަމަށާއި، ދީނުގައި ފަރުޟު ކުރައްވައި، ވާޖިބު ކުރައްވާފައިވާ ކަންކަން އަދާކުރުމަށް ސަމާލުކަން ދޭންޖެހޭ ކަމަށް ޚުތުބާގައި ބުނެފައިވެއެވެ.
އަޅުކަންކުރުމުގައި ﷲ ސުބުހާނަހޫ ވަތައާލާއަށް އިހުސާންތެރިކަމާއެކު އަޅުކަން ކުރަންޖެހެއެވެ. ޚުތުބާގައި ވަނީ ހެޔޮ ކަންތައްތަކުގައި އެކަކު އަނެކަކާ ވާދަކޮށް ކުރިއަރައިގެން ދިއުމަށް ނަސޭހަތްތެރިވެފައެވެ. ދީނުގެ ކަންކަމުގައި ގަދައަޅާ ހިފަންޖެހޭ ކަމަށާއި، އަދި ރިވެތި އަޚުލާގުގެ މަތީގައި ތިބޭ މީހުންނަށް ގިޔާމަތްދުވަހު ލިބޭ ފައިދާ ބޮޑުވެގެންވާނެ ކަމަށް ޚުތުބާގައި ބުނެފައިވެއެވެ.
