އައު ސީޕްލޭން ޓަރމިނަލްގައި ކުރިއަށްގެންދާ ޓްރަޔަލްތައް ނިމުމުން، ސީޕްލޭންގެ ހުރިހާ އޮޕަރޭޝަންތަކެއް އައު ޓަރމިނަލަށް ބަދަލުކުރެވޭނެކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޑެޕިއުޓީ މެނޭޖިންގ ޑިރެކްޓަރ އިބްރާހީމް ތޯހާ ވިދާޅުވެއްޖެއެވެ.
އައު ސީޕްލޭން ޓަރމިނަލްގެ މަސައްކަތްތައް ދައްކާލުމަށް ނޫސްވެރިންނާއެކު ބޭއްވި ޓުއަރގައި ނޫސްވެރިންގެ ސުވާލުތަކަށް ޖަވާބުދެއްވަމުން ތޯހާ ވިދާޅުވީ، ސީޕްލޭން ޓަރމިނަލްގެ މަސައްކަތް ނިމިފައިވާކަމަށެވެ. އަދި ޓްރަޔަލްގައި އައު ސީޕްލޭން ޓަރމިނަލް ބޭނުންކުރަމުންދާކަމަށް ތޯހާ ވިދާޅުވިއެވެ. އޭނާ ވިދާޅުވީ މިހާތަނަށް 14 ވަރަކަށް ޓްރަޔަލް ހިންގާފައިވާކަމަށެވެ.
ދުނިޔޭގެ އެންމެ ބޮޑު ކޮމަރޝަލް ސީޕްލޭން ޓަރމިނަލް އޮޕަރޭޝަން މިއޮތީ ރާއްޖޭގަ. އެހެންވީމަ ސީޕްލޭން ބޭނުންކުރާ ފަސިންޖަރުންވެސް ގާތްގަޑަކަށް އެވްރެޖްކޮށް މިއުޅެނީ 4500އާ 600އާ ދެމެދުގެ އަދަދެއްގަ. ފްލައިޓް މޫވްމަންޓްސްއަށް ބަލާނަމަ އެވްރެޖްކޮށް ލޯ ސީޒަންގަ 300 ފްލައިޓް މޫވްމަންޓް އެބަ އޮޕަރޭޓްކުރޭ. އަދި ހައި ސީޒަންގަ 600 ވަރަކަށް މޫވްމެންޓް އޮޕަރޭޓް ކުރާނެ. އަޅުގަނޑުމެން މި ޓަރމިނަލް މި ހަދާ ނިންމާލިއިރު، ޑިޒައިންކުރިއިރު އަޅުގަނޑުމެން ވަރަށް ބޮޑަށް ބެލިން އެންމެ ޒަމާނީ އަދި ދިވެހި ވަންތަ ޚިދުމަތެއް މިތަނުން ފޯރުކޮށްދެވޭތޯ. އޭގެ އިތުރުން އަޅުގަނޑުމެން ވަރަށް ބޮޑަށް ބަލާފަ ހުންނާނެ ފަސިންޖަރުންގެ އެކްސްޕީރިއަންސް.އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރ އިބްރާހީމް ތޯހާ
ތޯހާ ވިދާޅުވީ އެމްއޭސީއެލުން މަސައްކަތްކުރަނީ ފަތުރުވެރިންގެ ގޮތުގައި ރާއްޖެ އަންނަ ހައިއެންޑް ފަރާތްތައް ރިސޯޓްތަކަށް ދާއިރު ލިބޭ އެކްސްޕީރިއަންސް ސީޕްލޭން ޓަރމިނަލުންވެސް ދެވޭތޯކަމަށެވެ.
އަދި 100އެއްހާ ދިވެހި ސްޓާފުން ވައްދައި އެމީހުން ރެކްރޫޓްކޮށް ނިމިފައިވާކަމަށާއި، 100އެއްހާ ދިވެހި ޒުވާނުންނަށް ވަޒީފާ ދީ، ސީޕްލޭން ޓަރމިނަލްގެ އެކިއެކި ޚިދުމަތްތަކަށް ނެރުމަކީ ލިބިގެންދާ ވަރަށް ބޮޑު ހިތްފުޅުހަމަޖެހުމެއް ކަމަށެވެ. ތޯހާ ވިދާޅުވީ ޓަރމިނަލްގައި 50އެއްހާ ރިސޯޓް ލައުންޖް ހުންނާނެ ކަމަށެވެ. އަދި އެ ލައުންޖުތަކުންނާއި، އެމްއޭސީއެލްގެ 2 ލައުންޖް ކަމަށްވާ ކޮމަން ލައުންޖު އަދި ބިޒްނަސް ލައުންޖުން އެންމެ ޒަމާނީ ދިވެހިވަންތަ ޚިދުމަތްތަކެއް ލިބިގެންދާނެކަމަށެވެ.
ނޫސްވެރިންނާ ވާހަކަދައްކަވަމުން އެމްއޭސީއެލްގެ ޗީފް ޑިވަލަޕްމަންޓް އޮފިސަރ މުހައްމަދު ސޮލާހު ވިދާޅުވީ، ބައު ސީޕްލޭން ޓާމިނަލްގައި ހުރި ހުރިހާތަނެއް ރިލޮކޭޓެއް ނުކުރެވޭ ކަމަށެވެ. ނަމަވެސް ހޭންގަރ ރިލޮކޭޓް ކުރެވިފައިވާ ކަމަށާއި، އެ ހޭންގަރ ބޭނުންކުރަމުންދާ ކަމަށެވެ. އަދި ޓީއެމްއޭއިން އޮޕަރޭޓްކުރަމުން ގެންދާ ޓަރމިނަލް، އޭ، ބީ، އަދި ސީ، އައު ޓަރމިނަލް ފުރިހަމައަށް އޮޕަރޭޝަނަށް ގެނެވުމުން ބަދަލުކުރެވޭނެކަމަށެވެ.
ޗައިނާގެ ބީޔޫސީޖީ ކުންފުންޏާ ހަވާލުކޮށްގެން ކުރިއަށްގެންދިޔަ މި މަޝްރޫއުގެ އަގަކީ 55 މިލިއަން ޑޮލަރު (848.1 މިލިއަން ރުފިޔާ)އެވެ. މި ޓަރނަލް އިމާރާތް އެޅުމަށް ހުޅުލޭ އިރުމަތީ ފަރާތުން 2.3 ހެކްޓަރުގެ ބިން ވަނީ ހިއްކާފައެވެ. އައު ޓަރމިނަލާއެކު އޮންނަ ފަޅުގެ ސަރަހައްދަކީ އެ ތަނުގައި އެއްފަހަރާ 100 ބޯޓަށް ޚިދުމަތް ދެވޭނެ ޖާގައިގެ ތަނަވަސްކަން ހުރި ތަނެކެވެ.
އައު ސީޕްލޭން ޓަރމިނަލެއް ހަދާފައި މިވަނީ، ޓީއެމްއޭއިން މިހާރު ބޭނުންކުރާ ސީޕްލޭން ޓަރމިނަލްގެ ސަބަބުން، އެއަރޕޯޓުގައި އަލަށް ހަދާފައިވާ ރަންވޭ ބޭނުން ނުކުރެވޭތީއެވެ. އައު ރަންވޭ ބޭނުން ކުރެވެން އަންނަނީ ސީޕްލޭން ޓަރމިނަލް ނަގައި އެ ސަރަހައްދު ސާފުކުރުުމުންނެވެ. އައު ރަންވޭ ބޭނުންކުރަން ފެށުމުން އެއަރޕޯޓުގެ ތޮއްޖެހުމުގެ މައްސަލައަށް ލުއި ލިބޭނެކަމަށް ލަފާކުރެވެއެވެ.
