މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ 56 ވަނަ އަހަރީ ދުވަސް ފާހަގަކޮށްފިއެވެ.
އެމްއޭސީއެލްގެ އަހަރީ ދުވަހާއި ގުޅިގެން އަންގާރަ ދުވަހުގެ ހެނދުނު ވެލާނާ އިންޓަރނޭޝަނަލް އެއަރޕޯޓުގައި ދިދަ ނެގުމުގެ ޚާއްސަ ރަސްމިއްޔާތެއް ބާއްވާފައިވެއެވެ. މި ރަސްމިއްޔާތު ޝަރަފުވެރިކޮށްދެއްވާފައިވަނީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރ އިބްރާހިމް ތޯހާއެވެ. އަދި އެމްއޭސީއެލްގެ މެނޭޖްމަންޓުގެ އިސްވެރިން މި ރަސްމިއްޔާތުގައި ބައިވެރިވެފައިވެއެވެ.
މި ރަސްމިއްޔާތުގައި ވާހަކަދައްކަވަމުން ތޯހާ ވަނީ އެމްއޭސީއެލްގެ މުވައްޒަފުން ކުރާ ބުރަ މަސައްކަތް ފާހަގަކުރައްވައި ޝުކުރު އަދާކުރައްވާފައެވެ. ވަކިން ޚާއްސަކޮށް ކޮވިޑް-19 ގެ ހާލަތުގައި އެމްއޭސީއެލްގެ މުވައްޒަފުން ކުރި ބުރަ މަސައްކަތް ފާހަގަކުރެއްވިއެވެ.
ވެލާނާ އިންތަރނޭޝަނަލް އެއާޕޯޓް(ވީއައިއޭ) އިތުރަށް ތަރައްގީކުރުމަށް ކުރަމުންދާ މަސައްކަތްތަކަށް އަލިއަޅުވާލައްވައި ތޯހާ ވިދާޅުވީ މިއަހަރުގެ ދެވަނަ ކުއާޓަރުގައި ދުނިޔޭގައި މިހާތަނަށް ގާއިމުކޮށްފައިވާ އެންމެ ބޮޑު ސީޕްލޭން ޓާރމިނަލް އޮޕަރޭޝަންއަށް ގެނެވޭނެ ކަމަށެވެ. އަދި މިއަހަރުގެ ތިންވަނަ ކުއާޓަރުގައި އައު ރަންވޭއާއި ފަޔަރ ސްޓޭޝަން ޚިދުމަތަށް ގެނެވޭނެ ކަމަށް ތޯހާ ވިދާޅުވިއެވެ. އެއަރޕޯޓުގެ ވީއައިޕީ ބިލްޑިންގގެ ފުރަތަމަ ފިޔަވަހީގެ މަސަައްކަތް ނިންމައި މިހާރު ޚިދުމަތް ދެމުންދާ ކަމަށާއި، ދެވަނަ ފިޔަވަހީގެ މަސައްކަތް މިހާރު ފަށާފައިވާކަމަށް ތޯހާ ވިދާޅުވިއެވެ.
މީގެ އިތުރުން އައު ރަންވޭ ވަގުތީގޮތުން ބޭނުންކުރަން ފަށާފައިވާކަން ފާހަގަކުރައްވައި ތޯހާ ވިދާޅުވީ މި މަސައްކަތް ފެށުމާއެކު އެއަރޕޯޓުގެ އޮޕަރޭޝަންތަކަށް އިތުރު ފަސޭހައެއް ވެގެންގޮސްފައިވާކަމަށެވެ.
އެއަރޕޯޓުގެ ތަރައްގީއަށް މަސައްކަތްކުރުމުގެ އިތުރުން އެމްއޭސީއެލްގެ މުވައްޒަފުންނަކީ ފެންވަރު ރަނގަޅު ޚިދުމަތްތަކެއް ދެވޭނެ ވަރުގެ ބަޔަކަށް ހެދުމަށް މަސައްކަތްތަކެއް ކުރެވެމުންދާކަމަށް ތޯހާ ވިދާޅުވިއެވެ. މީގެ ތެރެއިން އިތުރަށް ކިޔެވުމުގެ ފުރުސަތުތައް ފަހިކޮށްދިނުމާއި، މުވައްޒަފުންގެ މުސާރައަށް ހެޔޮ ބަދަލުތަކެއް ގެނައުން ހިމެނޭކަމަށް އޭނާ ވިދާޅުވިއެވެ.
ތޯހާ ވިދާޅުވީ މި ހުރިހާ މަސައްކަތަކުންވެސް އެއަރޕޯޓުން ދެމުންދާ ޚިދުމަތްތައް އިތުރަށް ރަނގަޅުވެގެންދާނެ ކަމަށެވެ. އަދި ކުރިއަށްއޮތްތަނުގައި މިއަށްވުރެ ފެންވަރުރަގަޅު ޚިދުމަތްތަކެއް ދެވިގެންދާނެ ކަމަށް ތޯހާ ވިދާޅުވިއެވެ.
