ޑީއާރްޕީ އުވިގެންދިޔަނުދެއްވާނެ ކަމަށާއި، ޕާޓީއަށް މެމްބަރުން ހަމަކުރައްވާނެކަމަށް އެ ޕާޓީގެ ލީޑަރު، ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ރާއްޖޭގައި ގާއިމްކޮށްފައިވާ ސިޔާސީ ޕާޓީތަކުގެ ތެރެއިން 3،000 މެމްބަރުން ހަމަނުވާ 4 ޕާޓީއަކަށް ނޯޓިސް ދޭން ނިންމާފައިވާކަން އިލެކްޝަންސް ކޮމިޝަނުން ހާމަ ކޮށްފައިވާއިރު، އޭގެ ތެރޭގައި ޑީއާރްޕީވެސް ހިމެނެއެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން ޖާބިރު ވިދާޅުވީ، ޕާޓީއަށް މެމްބަރުން ހަމަކުރުމުގެ މަސައްކަތް މިހާރު ކުރިއަށްދާ ކަމަށާާއި، އޭރު މަސައްކަތް މަޑުޖެހިފައި އޮތީ ކޮވިޑް-19 ބަލިމަޑުކަމާއި، ސިއްހީ ކުއްލި ނުރައްކަލުގެ ހާލަތުގެ ސަބަބުން ކަމަށެވެ.
ރާއްޖޭގެ ސިޔާސީ ޕާޓީތަކުގެ ގާނޫނުގައި ވާގޮތުން ކޮންމެ ޕާޓީއެއްގައިވެސް މަދުވެގެން 3،000 މެމްބަރުން ހަމަވާންޖެހެއެވެ. މެމްބަރުން ހަމަނުވާނަމަ އެ އަދަދު ހަމަކުރުމަށް ވަކި މުއްދަތެއް ދެވެއެވެ. އެ މުއްދަތުގެ ތެރޭގައި މެމްބަރުން ހަމަނުކުރާނަމަ އެ ޕާޓީއެއް އުވިގެންދާނެއެވެ.
އެހެންނަމަވެސް ސިއްހީ ކުއްލި ނުރައްކަލުގެ ހާލަތާ ގުޅިގެން މިގޮތަށް މެމްބަރުން ހަމަކުރުމަށް މުއްދަތު ދިނުމާއި، ޕާޓީ އުވާލުން އޭރު އޮތީ މެދުކަނޑާލާފައެވެ.
ނަމަވެސް ސިއްހީ ކުއްލި ނުރައްކަލުގެ ހާލަތު ނިމުމާއެކު, ގާނޫނާ އެއްގޮތްވާގޮތުގެމަތިން 3،000 މެމްބަރުން ހަމަނުވާ ޕާޓީތަކަށް މެމްބަރުން ހަމަކުރުމަށް މުއްދަތު ދޭން މިހާރު އީސީން ވަނީ ނިންމާފައެވެ. އެގޮތުން 3،000 މެމްބަރުން ހަމަނުވާ 4 ޕާޓީއަކަށް, ގާނޫނުގައިވާ ގޮތުގެމަތިން، 3 މަސްދުވަހުގެ ނޯޓިސް ދޭން ނިންމާފައިވާކަމަށް އީސީން ވަނީ ހާމަ ކޮށްފައެވެ.
ޖާބިރު ވިދާޅުވާ ގޮތުގައި, 3 މަސް ފުރިހަމަ ވުމުގެ ކުރިން ޕާޓީއަށް މެމްބަރުން ހަމަކުރުމަށް ޕާޓީން މިހާރު ގެންދަނީ މަސައްކަތް ކުރަމުންނެވެ. އަދި ޓާގެޓަކީ 20،000 މެމްބަރުން ހަމަކުރުން ކަމަށްވެސް ޖާބިރު ފާހަގަ ކުރެއްވިއެވެ. ޖާބިރު ވިދާޅުވީ ޑީއާރްޕީ އުވިގެން ދިޔަ ނުދެއްވާނެ ކަމަށެވެ.
މިހާރު ޑީއާރްޕީގައި ތިބީ 2700 އެއްހާ މެމްބަރުންކަން ޖާބިރު ފާހަގަ ކުރެއްވިއެވެ.
ޖާބިރު ޑީއާރްޕީއާ ޙަވާލުވެވަޑައިގެންނެވީ 23 ޖުލައި 2019 ވީ އަންގާރަ ދުވަހުގެރޭ އެ ޕާޓީގެ ކައުންސިލް ބައްދަލުވުމުގައި ބައިވެރިވި މެންބަރުންގެ އިއްތިފާގުންނެވެ.
ޑީއާރްޕީގެ އިތުރުން ދެން އެ ލިސްޓުގައި ހިމެނެނީ މޯލްޑިވްސް ރިފޯމް މޫވްމަންޓް (އެމްއާރްއެމް)އާއި، މޯލްޑިވްސް ލޭބަރ އެންޑް ސޯޝަލް ޑިމޮކްރަޓިކް ޕާޓީ (އެމްއެލްއެސްޑީޕީ)އާއި، މޯލްޑިވްސް ތަރޑްވޭ ޑިމޮކްރެޓްސް (އެމްޓީޑީ)އެވެ.
