ރޯދަ މަހު މުދާ ވިއްކާ ތަންތަން ހުޅުވާފައި ބެހެއްޓޭނީ މެންދަމު އެކެއް ޖަހަންދެން ކަމަށް އިކޮނޮމިކް މިނިސްޓްރީން ބުނެފިއެވެ.

އެ މިނިސްޓްރީން ބުނީ މި މަހުގެ 20 ވަނަ ދުވަހުން ފެށިގެން އަދި ރަމަޟާން މަހާއި ޝައްވާލް މަހުގެ ފުރަތަމަ 7 ދުވަހާއި ހަމައަށް، މުދާ ވިއްކާ ތަންތަން ހުޅުވާފައި ބެހެއްޓޭނީ މެންދަމު 1:00ށް ކަމަށެވެ.

ރޯދަ މަހުގެ ރޭ ތަކުގައި ކެއިން ބުއިމުގެ ޚިދުމަތްދޭ ތަންތަން ހުޅުވާފައި ބެހެއްޓޭ ގަޑިއެއްގެ ގޮތުގައި އިކޮނޮމިކް މިނިސްޓްރީން ކަނޑައަޅާފައި ވަނީ ހަވީރު 5:30ން މެންދަމު 3:00އާ ދެމެދު އެވެ. އަދި ޝައްވާލް މަހުގެ ފުރަތަމަ 7 ދުވަހު ކެއިން ބުއިމުގެ ޚިދުމަތްދޭ ތަންތަން ހުޅުވާފައި ބަހައްޓަންވާނީ ފަތިހު 4:30ން މެންދަމު 3:00އާ ދެމެދުގައި ކަމަށް އިކޮނޮމިކް މިނިސްޓްރީން ވަނީ ބުނެފައެވެ.

ރަމަޟާން މަހުގެ ފުރަތަމަ ދުވަހަކީ މިއަހަރުގެ އޭޕްރީލް މަހުގެ 2 ވަނަ ދުވަހެވެ.

މިނިސްޓްރީން މިގޮތަށް ނިންމާފައިވާއިރު ކޮވިޑާއި ގުޅިގެން ވަރަށް ގިނަ ވިޔަފާރީތަކަށް ވަނީ ދަތިތަކާއި ކުރިމަތިލާން ޖެހިފައެވެ. ގިނަ ވިޔަފާރީތަކުން ބުނީ ކޮވިޑާއި ގުޅިގެން ލިބުނު ގެއްލުމުން އަރައިގަތުމަށް އެމީހުން އަދިވެސް މަސައްކަތް ކުރަމުން އަންނަކަމަށެވެ.