މޯލްޑިވްސް އިންޓެގްރޭޓަޑް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)ގެ ފަރާތުން މުޅި ދުނިޔެއަށް ހުޅުވާލައިގެން ކުރިއަށްގެންދާ ޔޮޓް ރެލީ ނިންމާލުމުގެ ގޮތުން, ބުރާސްފަތި ދުވަހު ކ. ގާފަރުގައި ބަނދަރުކޮށްފިއެވެ.

ސަވާދީއްތަ ދަތުރާ ގުޅިގެން ރާއްޖެއެމްވީއަށް މައުލޫމާތުދެއްވަމުން, މި ދަތުރު އިންތިޒާމްކުރާ އެމްއައިޓީޑީސީގެ މެނޭޖިންގ ޑިރެކްޓަރ މުހައްމަދު ރާއިދު ވިދާޅުވީ, ބުރާސްފަތި ދުވަހު ގާފަރުގައި ދަތުރުގެ ބައިވެރިން މަޑުކުރާއިރު ފަރި މޯލްޑިވްސްއަށް ފުރާނީ 19 ވަނަ ދުވަހުގެ ހެނދުނު ކަމަށެވެ. ރާއިދު ވިދާޅުވީ ދަތުރުގެ ތެރެއިން ކަނޑައަޅާފައިވާ ރަށްތަކަށް ދަތުރުކޮށް ނިމިފައިވާކަމަށެވެ.

ގާފަރަކީ ލިސްޓުގައި ނެތް ރަށެއްކަން ފާހަގަކުރައްވައި ރާއިދު ވިދާޅުވީ, ގާފަރަށް މަޑުކުރީ ފަރި މޯލްޑިވްސްއާ ކައިރިވުމުން ކަމަށެވެ. އަދި ކ. ގާފަރު ކައުންސިލާއި ލޯކަލް ޓޫރިޒަމް ފުޅާކުރުމަށް މަސައްކަތް ކުރައްވާ ފަރާތްތަކުން ދިން އެއްބާރުލުމަށް އޭނާ ވަނީ ޝުކުރު އަދާކުރައްވާފައެވެ.

މި މަހުގެ 20 ވަނަ ދުވަހު ފަރި މޯލްޑިވްސްގައި ގާލާ ނައިޓް ބޭއްވުމަށް ހަމަޖެހިފައިވާއިރު އެ އިވެންޓުގެ ތެރެއިން ވަރަށް ޚާއްސަ ދެ ސަޕްރައިޒެއް އިއުލާން ކުރެވިގެންދާނެ ކަމަށް ރާއިދު ވިދާޅުވިއެވެ. ގާލާ ނައިޓްގެ ޝަރަފުވެރި މެހެމާނަކަށް ނާއިބުރައީސް ފައިސަލް ނަސީމް ބައިވެރިވެވަޑައިގަންނަވާނެ ކަމަށާއި އެ ނައިޓްގެ ތެރެއިން ހަނދާނީ ލިޔުމާއި ޕްލާކް ދިނުން އޮންނާނެ ކަމަށް ވިދާޅުވިއެވެ. އަދި ދަތުރުގެ ބައިވެރިން އެމީހުންގެ ޝުއޫރުތައް ފާޅުކުރުމަށް ވެސް ވަނީ ހަމަޖެހިފައެވެ.

ރަށްރަށުގެ ރައްޔިތުންގެ ފަރާތުން މި ދަތުރަށް ވަރަށް ބޮޑު ތަރުހީބެއް ލިބެމުން އަންނަކަން ފާހަގަކުރައްވައި ރާއިދު ވިދާޅުވީ, ރަށްރަށުގައި ދިރިއުޅޭ ރައްޔިތުން ފަތުރުވެރިކަމަށް ބޭނުންވެފައިވާ މިންވަރު މިދަތުރުން ހާމަވާ ކަމަށެވެ. މި ދަތުރުގެ ތެރެއިން ރާއްޖޭގެ ރަށްތައް އިޝްތިހާރުކޮށް އެރަށްތަކުގެ ޚާއްސަ ކަންކަން ފަތުރުވެރިން ދަނީ ބޭރުގެ އެކި ސޯޝަލް މީޑިއާ ޕްލެޓްފޯމްތަކުގައި ހިއްސާކުރަމުންނެވެ.

ރާއްޖޭގެ ފަތުރުވެރިކަން އިޝްތިހާރުކޮށް ކުރިއެރުވުމަށް ބާއްވާ މި ރެލީގައި ޖުމްލަ 9 ޔޮޓެއް ބައިވެރިވިއެވެ. ނަމަވެސް މަގުބޫލު އުޒުރަކާއެކު ދެޔޮޓް ވަނީ ދަތުރާ ވަކިވެފައެވެ. ކާމިޔާބުކަމާއެކު ކުރިއަށް ގެންދާ މި ދަތުރާ ގުޅޭގޮތުން ރާއިދު ވިދާޅުވީ, މިއަށްވުރެ މާ ފުރިހަމަކޮށް މިއަންނަ އަހަރު ވެސް މިރެލީ ކުރިއަށް ގެންދިއުމަށް ނިންމާފައިވާކަމަށެވެ. އަދި އުންމީދަކީ މެދުނުކެނޑި ކޮންމެ އަހަރަކުވެސް ސިލްސިލާކޮށް މިދަތުރުތައް ކުރިއަށް ގެންދެވުން ކަމަށެވެ.