އެމްއައިޓީޑީސީގެ ފަރާތުން މުޅި ދުނިޔެއަށް ހުޅުވާލައިގެން ކުރިއަށްގެންދާ ޔޮޓް ރެލީގެ ބައިވެރިންނަށް ހދ. ނޮޅިވަރަންފަރުން ސަގާފީ މަރުހަބާއެއް ކިޔައިފިއެވެ.
މި ދަތުރަކީ ރާއްޖޭގައި ސަގާފީ ފަތުރުވެރިކަން ކުރިއަރުވައި, ފަތުރުވެރިންނަށް އެ ތަޖުރިބާކޮށްލުމަށް އެމްއައިޓީޑީސީން ފަށާފައިވާ ރެލީއެކެވެ. މިދަތުރަށް "ސަވާދީއްތަ ދަތުރު"ގެ ނަން ދެވިފައިވަނީ، ދިވެހިރާއްޖޭގެ ގައުމީ ބަތަލު، އައްސުލްތާނު ޣާޒީ މުހައްމަދު ތަކުރުފާނު އަލްއައުޒަމް ސިރީ ސަވާދީއްތަ މަހާރަދުންނާ ގުޅުވައިގެންނެވެ.
ބުރާސްފަތި ދުވަހު ހދ. ނޮޅިވަރަންފަރަށް ދަތުރުގެ ބައިވެރިން ދިއުމުން އެ ރަށުން ވަނީ ދަތުރުގެ ބައިވެރިންނަށް ދިވެހިންގެ ސަގާފީ ކަންކަން ދައްކާލާފައެވެ. އެގޮތުން ކުރީޒަމާނުގައި ދިވެހިންގެ އާދަކާދަތައް ހުންނަ ގޮތާއި ކޮށްއުޅުނު މަސައްކަތުގެ އިތުރުން ދިވެހިންގެ ދިރިއުޅެމުން އައި ގޮތް ދައްކާލާފައިވެއެވެ.
ދަތުރުގެ ތެރެއިން 50 އަށްވުރެ ގިނަ ހަރަކާތް ހިންގުމަށް ހަމަޖެހިފައިވެއެވެ. މި ދަތުރުގައި ރާއްޖޭގެ މަޝްހޫރު އެތައް ތާރީޚީ ބިނާތަކާއި، ދިވެހިންގެ ރަށްފުށު ދިރިއުޅުމާއި، ރާއްޖޭގެ ރީތި ކަނޑުއަޑީގެ މަންޒަރު ބަލާލުމުގެ ފުރުސަތު ބައިވެރިންނަށް ލިބިގެންދާނެއެވެ.
ސަވާދީއްތަ ދަތުރަކީ އެމްއައިޓީޑީސީގެ ފަރާތުން މުޅި ދުނިޔެއަށް ހުޅުވާލައިގެން ކުރިއަށްގެންދާ ރެލީއެކެވެ. އެމްއައިޓީޑީސީގެ ފަރާތުން މި ހަރަކާތް ކުރިއަށް ގެންދިޔުމަށް ގަސްތުކޮށްފައިވަނީ ލޯކަލް ޓޫރިޒަމް، ހެރިޓޭޖް ޓޫރިޒަމް, އަދި ރޫރަލް ޓޫރިޒަމް ހިމެނޭ ގޮތުންނެވެ.
