ރާއްޖެއަށް އެތެރެ ކުރުމަށް ހުއްދަ ލިބިފައިނުވާ ގިނަ ދޫނިތަކެއް މަރާލި މައްސަލާގައި ކަން ހިނގާފައިވާ ގޮތުގެ ރިޕޯޓެއް ހުށަހެޅުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް އަންގަވައިފިއެވެ.

ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ ޤަވާއިދާ ޙިލާފަށް އެތެރެ ކުރި ދޫނިތައް މަރާލުމުގެ މައްސަލައިގައި ކަން ހިނގާފައިވާ ގޮތުގެ ތަފްސީލީ ރިޕޯޓެއް ހަދާ ހުށަހެޅުމަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ އިން ހުށަހެޅުމަށް ރައީސް އަންގަވާފައިވާ ކަމަށެވެ.

މިދޫނިތައް މަރާލާފައިވަނީ ވެލާނާ އިންޓަނޭޝަނަލް އެއާޕޯޓުގެ ޕްލާންޓް އެންޑް އެނިމަލް ޔުނިޓުގައެވެ. މައުލޫމާތު ލިބިފައިވާ ގޮތުގައި ދޫނިތައް މަރާލީ އިންޖެކްޝަން ޖަހައިގެންނެވެ. އެއީ 120 ދޫނި ކަމަށާއި، އޭގެ އަގު 800،000 ރުފިޔާއަށް އަރާ ކަމަށް މައުލޫމާތު ލިބެއެވެ.

މިމައްސަލައާއި ގުޅިގެން ފިޝަރީޒް މިނިސްޓްރީން ބުނީ އެ ދޫނިތަކަކީ, އެތެރެކުރުން ހުއްދަނޫންއިރު ރާއްޖެއަށް އެތެރެ ކުރަން އުޅުމުގެ ތެރޭގައި ހިފަހައްޓާފައިވާ ދޫނިތަކެއް ކަމަށެވެ. އަދި އެދޫނިތައް ހިފަހައްޓާފައި ހުންނަތާ ތިން މަހަށްވުރެ ގިނަ ދުވަސްވެފައިވާނެ ކަމަށާއި، އެ މަރާލާފައިވަނީ އެޓަރނީ ޖެނެރަލް އޮފީހުގެ ލަފާގެ މަތިން ކަމަށެވެ.

ރާއްޖެއަށް އެތެރެކުރަން އުޅެނިކޮށް ހިފެހެއްޓި އެ ދޫނިތައް ނައްތާނުލައި، އެތެރެކުރި ޤައުމަށް ފޮނުވާލުމުގެ ފުރުސަތު ދެވޭކަން ދިވެހިރާއްޖެއަށް ދޫނި އެތެރެކުރުމާއި ބެހޭ ގަވާއިދުގައި ބުނެފައިވާކަމަށް ބަންޑާރަ ނައިބު (އޭޖީ) އޮފީހުން ވަނީ ބުނެފައެވެ. އޭޖީ އޮފީހުން މައުލޫމާތުދޭ ގޮތުގައި އެއީ "ދިވެހިރާއްޖެއަށް އެތެރެކުރުމަށް ހުއްދަ ދެވޭ ދޫނީގެ ބާވަތްތަކުގެ ލިސްޓު"ގައި ނުހިމެނޭ ދޫނިތަކެކެވެ. އެގޮތުން ގަވާއިދާއި ޚިލާފަށް ދޫންޏެއް އެތެރެކުރާ ހާލަތްތަކުގައި އެޅޭނެ ފިޔަވަޅުތަކުގެ ތެރޭގައި, އެ ދޫންޏެއް ނައްތާނުލައި، އެތެރެކުރި ޤައުމަށް ފޮނުވާލުމުގެ ފުރުސަތު ދެވޭކަން ދިވެހިރާއްޖެއަށް ދޫނި އެތެރެކުރުމާއި ބެހޭ ގަވާއިދުގައި ބުނެފައިވެއެވެ.

އެހެން ނަމަވެސް އެގޮތުގެ މަތިން މިނިސްޓްރީން އަމަލުކޮށްފައި ނުވާކަން އޭޖީ އޮފީހުން ވަނީ ބުނެފައެވެ. މީގެއިތުރުން، އެތަކެތި ގެނައި ޤައުމަށް އަނބުރާ ފޮނުވާލުމަށާއި އެތެރެކުރި ދޫނިތައް ނައްތާލުމަށް ދާ ޚަރަދުގެ ޒިންމާ އުފުލަންޖެހޭނީ ދޫނި އެތެރެކުރި ފަރާތުންކަން ޤަވާއިދުގައި ބަޔާންކޮށްފައިވާކަމަށްވެސް އޭޖީ އޮފީހުން ބުނެއެވެ.

އަނިޔާވެރި ގޮތެއްގައި ދޫނިތަކެއް މަރާލީ ކަމަށް ބުނެ، ގިނަ ބައެއްގެ ފާޑު ކިޔުން ފިޝަރީޒް މިނިސްޓްރީއަށް ވަނީ އަމާޒުވެފައެވެ.

ދޫނިތަައް މަރާލުމާއި ގުޅިގެން ރާއްޖެއެމްވީއަށް އެންވަޔަރަންމެންޓަލް ޕްރޮޓެކްޝަން އެޖެންސީގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވީ, މިމައްސަލަ ސަމާލުކަމަށް އައިސްފައިވާ ކަމަށެވެ. ގަވާއިދާ ޚިލާފަށް ރާއްޖެއަށް އެތެރެ ކުރާ ދޫނިތައް މަރާލުމަކީ އަބަދުވެސް އަމަލު ކުރަމުން އަންނަ އުސޫލު ކަމަށާއި، ނަމަވެސް އެނޫން ގޮތެއް މިކަމުގައި ހޯދަން ޖެހޭ ކަމަށެވެ. އެހެންކަމުން މަރާނުލައި ކަންކަން ކުރާނެ ގޮތެއް ނިންމައި ޤާނޫނާއި ޤަވާއިދު ބަދަލުކުރަން ޖެހޭ ކަމަށް ނައީމް ވިދާޅުވިއެވެ.