ބުޅާތަކަށް ގޯނާކުރުން ހުއްޓާލަން އެގްރިކަލްޗާ މިނިސްޓްރީން އަންގައިފި އެވެ.
އެގްރިކަލްޗާ މިނިސްޓްރީން އަންގާރަ ދުވަހު ނެރުނު ބަޔާނެއްގައި ބުނީ މިހާރަކަށް އައިސް ރާާއްޖޭގެ ބައެއް ރަށްރަށުގައި ވީއްލިގެން މަގުމަތީގައި އުޅޭ ބުޅާތަކަށް ގޯނާކޮށް ހާނީއްކަ ކުރުމާއި މެރުމުގެ މައްސަލަތަކެއް ފާހަގަވެފައިވާ ކަމަށެވެ. އަދި މިއީ ޖަނަވާރުންގެ ދުޅަހެޔޮކަމުގެ މިންގަނޑާ ހިލާފު އަމަލަކަށްވާތީ އެކަން ނުކުރަން ވަރަށް ބޮޑަށް އިލްތިމާސްކުރާކަމަށެވެ.
މިނިސްޓްރީން އިތުރަށް ބުނީ ރާއްޖެއިން ބައިވެރިވެފައިވާ ދުނިޔޭގެ ޖަނަވާރުގެ ސިއްހަތާ ބެހޭ ޖަމިއްޔާގެ އެނިމަލް ހެލްތު ކޯޑުގައި ޖަނަވާރުގެ ދުޅަހެޔޮކަމަށް ހާއްސަ އަހައްމިއްޔަތުކަމެއް ދީފައިވާ ކަމަށާއި އޭގެ ތެރޭގައި ދަނޑުވެރިކަމަށާއި މުނިފޫހިފިލުވުމަށާއި އިލްމީ ދިރާާސާކުރުމަށާއި އެ ނޫންވެސް ބޭނުންތަކަށް ޖަނަވާރު ގެންގުޅުމުގައި އެސޮރުމެންގެ ދުޅަހެޔޮކަން ކަށަވަރުކުރުން ހިމެނޭ ކަމަށެވެ.
މިހާރަކަށް އައިސް ބައެއް ރަށްރަށުގައި މަގުމަތީގައި ވީއްލިގެން އުޅޭ ބުޅާތަކަށް ބައެެއް ފަރާތްތަކުން ގޯނާކޮށް، ހާނިއްކަ ކުރުމުގެ އިތުރުން އެސޮރުމެން މަރާކަމުގެ ޝަކުވާތައް މިނިސްޓްރީއަށް ލިބެމުން ދެއެވެ. މިއީ ޖަނަވާރުންގެ ދުޅަހެޔޮކަމުގެ މިންދަނޑުތަކާއި ޚިލާފު ކަމަކަށް ވާތީ މިކަން ނުކުރުމަށް އިލްތިމާސްކުރަމެވެ.އެގްރިކަލްޗާ މިނިސްޓަރީ
މިނިސްޓްރީން ބުނީ ޖަނަވާރަށް ރަހުމްކޮށް އަޅާލައި އެތަކެއްޗަށް އޯގާތެރިވުމަށް އިސްލާމްދީންވެސް ބާރު އަޅާ ކަމަށެވެ.
އިންސާނުންނާއި ޖަނަވާރުންވެސް ދިރިއުޅެއް ލައްވާފައިވާ ތަނަކީ ދުނިޔެ ކަމަށް ވުމުން މި ދުނިޔެއަކީ ޖަނަވާރަށް ރައްކާތެރި ރަނގަޅު ތަނަކަށް ހެދުމަށް ބައިނަލްއަގުވާމީ ފެންވަރުގައި ބާރު އަޅައެވެ.
އެހެންކަމުން އެއްވެސް ޖަނަވާރަކަށް އަނިޔާވެރިނުވެ ޖަނަވާރުންނަށް އަޅާލައި އޯގާތެރިވުމަށް އެ މިނިސްޓަރީގެ ބަޔާނުގައި ވަނީ އިލްތިމާސްކޮށްފަ އެވެ.
ބުޅާ ފަދަ ޖަނަވާރުތަކަށް ގޯނާކުރުމާއި މެރުމަކީ ރާއްޖޭގައި ގާނޫނީ ގޮތުން ކުށެކެވެ.
ބުޅާ މަރައިގެންނާއި އެތަކެއްޗަށް ގޯނާ ކުރިކަމުގެ މައްސަލަތަކެއް މީގެ ކުރިން ވެސް ފެންމަތިވެ، ފުލުހުން ވަނީ އެ މައްސަލަތައް ބަލާފަ އެވެ.
