ދިވެހރާއްޖޭގެ މަސްވެރިން ބާނާ މަހަށް ހަމަ އަގު ހޯދައިދިނުމަށް މިއަދު ކުރަންޖެހިފައި އޮތް އެންމެ މުހިންމު މަސައްކަތަކީ ދިވެހިން ބާނާ މަސް، ދިވެހި ބްރޭންޑެއްގެ ގޮތުގައި ޕްރޮމޯޓްކުރުން ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ މަސްވެރިންގެ ދުވަހުގެ މުނާސަބުތައި ކ. ގާފަރުގައި ކުރިއަށްގެންދާ ޚާއްސަ ޖަލްސާގައި ވާހަކަފުޅުދައްކަވަމުންނެވެ. މިނިސްޓަރ ވިދާޅުވީ ރާއްޖެއަކީ ދުނިޔޭގައި އޮތް އެންމެ މުހިންމު އެންމެ އަގުބޮޑު ބްރޭންޑު ކަމަށެވެ. ރާއްޖެ ނުދަންނަ މީހަކު މިހާރު ނޫޅޭ ކަމަށާއި، އެހެންކަމަށްވާއިރު، "މޯލްޑިވްސް ޓޫނާ" އޭ ބުނީމަ ދިވެހި މަހަށް އެދެވެނީ ވަރަށް ބޮޑު ޕްރޮމޯޝަނެއް ކަމަށް މިނިސްޓަރ ވިދާޅުވިއެވެ.
އެހެންކަމުން މި މަސައްކަތަށް ރައީސުލްޖުމްހުރިއްޔާ މިހާރު ވަނީ ފިޝަރީޒް ޕްރޮމޯޝަން ބޯޑެއް އެކުލަވާލައްވާފައި ކަމަށް މިނިސްޓަރ ވިދާޅުވިއެވެ. އެ ބޯޑުގެ ފުރަތަމަ ޖަލްސާ ބާއްވާފައިވާކަމަށާއި، މިކަން ކުރިއަށްގެންދާނެ ސްޓްރެޓެޖީތަކެއްވެސް ރާވާފައިވާކަމަށް މިނިސްޓަރ ޑރ. ހުސައިން ވިދާޅުވިއެވެ. މި ސްޓްރެޓެޖީތަކާއެކު ދިވެހި މަސްވެރިން ބާނާ މަސް ޕްރޮމޯޓްކުރުމުގެ މަސައްކަތް ކުރިއަށްގެންދާނެ ކަމަށް މިނިސްޓަރ ވަނީ ވިދާޅުވެފައެވެ. މިއީ މަސްވެރިން ބާނާ މަހަށް މަތީ އަގުހޯދޭނެ ގޮތެއް ކަމަށް ވިދާޅުވިއެވެ.
މީގެ އިތުރުން، މިނސްޓަރ. ޑރ. ހުސައިން ވިދާޅުވީ މި ސަރުކާރުން މަސްވެރިކަމުގެ އައު ސިނާއަތެއް ގާއިމްކުރުމަށް މަސައްކަތް ކުރަމުންދާކަމަށެވެ. އެއީ ފާނަ އަދި ހުއިފިލަނޑާގެ މެރިކަލްޗަރ މަސައްކަތްތަކެއް ކަމަށެވެ. މި މަސައްކަތް ގާއިމްކުރުމަށް ކުރަންޖެހޭ އިންވެސްޓްމެންޓް މަސައްކަތްތައް މިހާރު ކުރަމުންދާކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ކުދި ފާނަ އުފެއްދުމުގެ ގާބިލުކަން ރާއްޖޭގައި މިހާރު އެބަހުރި ކަމަށެވެ.
ކުދި ފާނަ އުފެއްދުމުގެ ގާބިލުކަން އަޅުގަނޑުމެންގެ މިހާރު އެބަހުރި. އަޅުގަނޑުމެންގެ ރިސަރޗް ފެސިލިޓީތަކުގައި ކޮންމެ މަހަކު 10،000 ކުދި ފާނަ އުފެއްދޭ. އެތަން ބޮޑުކުރުމުގެ މަސައްކަތް އަޅުގަނޑުމެން މިދަނީ ކުރަމުން. އިރާދަކުރެއްވިއްޔާ މިހާރު މި ކުރިއަށްދާ ޕައިލެޓް ޕްރޮޖެކްޓަށް ބޭނުންވާވަރަށް ކޮންމެ މަހަކު 50،000 ފާނަ އުފެއްދޭ ވަރަށް އަޅުގަނޑުމެން އެތަން ތަރައްގީ ކުރާނަން. އެ މަސައްކަތް އެބަ ކުރިއަށްދޭ.
މިނިސްޓަރ. ޑރ. ހުސައިން ވިދާޅުވީ މަސްވެރިންގެ ދުވަހާ ގުޅިގެން ގާފަރުގައި ކުރިއަށްގެންދިޔަ މަސްވެރިންގެ ފޯރަމްގައި މަސްވެރިންގެ ގިނަ ކަންބޮޑުވުންތަކެއް އަޑުއައްސަވާފައިވާކަމަށެވެ. މަސްވެރިންގެ އެންމެ ބޮޑު ކަންބޮޑުވުމަކީ އަދި ގޮންޖެހުމަކީވެސް އެމީހުން ބާނާ މަހަށް ހަމަ އަގު ނުލިބުން ކަމަށް މިނިސްޓަރ ވިދާޅުވިއެވެ. މަސްވެރިން ބާނާ މަހަށް ހަމައަގު ހޯދައިދިނުމަށް މި ސަރުކާރުން މަަސައްކަތްތަކެއް ކުރަމުންދާކަމަށާއި، އެހެންނަމަވެސް މިއީ ގޮންޖެހުން ބޮޑު މަސައްކަތެއް ކަމަށެވެ.
މިނިސްޓަރ ވިދާޅުވީ މަސްވެރިން ބާނާ މަހަށް ހަމަ އަގު ހޯދައި ދިނުމުގައި ދިމަވާ އެންމެ ބޮޑު ގޮންޖެހުމަކީ މަސް އެކްސްޕޯޓް ކުރާއިރު، ނަގާ ޓެކްސްއާއި، ސީ ފްރައިޓް އަދި އެއަރ ފްރައިޓްގެ އަގު ބޮޑުވުން ކަމަށެވެ. އެހެންނަމަވެސް މިކަމަށް ހައްލު ހޯދައިދިނުމަށް ސަރުކާރުން މަސައްކަތް ކުރަމުންދާކަމަށް މިނިސްޓަރ ވިދާޅުވިއެވެ. އެހެންކަމުން މި ސަރުކާރުން މަސްވެރިކަމަށް އަޅާ ނުލައޭ ބުނާ މީހުން އެ ބުނަނީ ކުށް ވާހަކައެއް ކަމަށް މިނިސްޓަރ ވިދާޅުވިއެވެ.
