އިޓަލީގެ ކުޅިވަރު ނޫސް "ތުއްތޮސްޕޯޓް" އިން ހޮވާ ޔޫރަޕިއަން ގޯލްޑަން ބޯއި އެވޯޑް ބާސެލޯނާއަށް ކުޅެމުން އަންނަ ސްޕެއިނުގެ ޒުވާން ތަރި ޕެޑްރީ ހޯދައިފިއެވެ.

ޔޫރަޕުގެ 21 އަހަރުން ދަށުގެ އެންމެ މޮޅު ފުޓްބޯޅަ ކުޅުންތެރިއާއަށް ދޭ މި އެވޯޑް އުމުރުން 18 އަހަރުގެ ޕެޑްރީ ހޯދީ 318 ޕޮއިންޓާއެކުއެވެ. މި އެވޯޑް ހޮވުމަށް 40 ނޫސްވެރިން ވޯޓުލާއިރު، ދެވަނައަށް ދިޔައީ 199 ވޯޓު ހޯދި ބޮރޫޝިއާ ޑޯޓްމުންޑަށް ކުޅެމުން އަންނަ އިނގިރޭސި މިޑްފީލްޑަރު ޖޫޑް ބެލިންހަމެވެ. ޕެޑްރީއަކީ 2005 ވަނަ އަހަރު ލިއޮނަލް މެސީ ގޯލްޑަން ބޯއިގެ އެވޯޑް ހޯދި ފަހުން، މި ޓްރޮފީ ހޯދި ބާސާގެ ފުރަތަމަ ކުޅުންތެރިޔާއެވެ.

މިދިޔަ ސީޒަނުގައި ޕެޑްރީ ވިދާލިއިރު، އެ އަހަރު އޮގަސްޓް މަހު ލަަސް ޕަލްމާސް ދޫކޮށް ބާސާއަށް ގުޅުމަށް ފަހު ޕެޑްރީ ވަނީ މިދިޔަ ސީޒަނުގައި އެ ޓީމަށް 53 މެޗު ކުޅެދީފައެވެ، އެއާއެކު މިދިޔަ ސީޒަނުގައި ބާސާއަށް އެންމެ ގިނަ މެޗު ކުޅެދިން ކުޅުންތެރިއަކީ ޕެޑްރީއެވެ. އަދި ޕެޑްރީ ވަނީ މިދިޔަ ސީޒަނުގައި ބާސާއާއެކު ސްޕެނިޝް ކަޕް ކާމިޔާބުކޮށްފައެވެ.

މީގެ އިތުރުން މި އަހަރުގެ ޖޫން އަދި ޖުލައި މަހު ކުރިއަށްދިޔަ ޔޫރޯ ފުޓްބޯޅަ މުބާރާތުގައިވެސް ޕެޑްރީ ތަފާތު މޮޅު ކުޅުމެއް ދެއްކިއިރު، އޭނާ ވަނީ ސްޕެއިނާއެކު އެ މުބާރާތުގެ ސެމީ ފައިނަލުގައި ވާދަކޮށްފައެވެ. އަދި އޭގެ ފަހުން ކުރިއަށްދިޔަ އޮލިމްޕިކް ގޭމްސްގެ ފުޓްބޯޅަ އިވެންޓުން ރިހި މެޑަލް ހޯދި ސްޕެއިންގެ 23 އަހަރުން ދަށުގެ ޓީމުގައިވެސް ޕެޑްރީ ވަނީ މުހިންމު ދައުރެއް އަދާކޮށްފައެވެ.

އެއާއެކު ބާސާއިން ދާދި ފަހުން ވަނީ ދިގު މުއްދަތަކަށް ޕެޑްރީގެ އެއްބަސްވުން އާކޮށްފައެވެ. އެގޮތުން 2026 ވަނަ އަހަރުގެ ނިޔަލަށް ޕެޑްރީ އެއްބަސްވުން ހެދިއިރު، އެ އެއްބަސްވުން އުވާލަން ބާސާއިން ވަނީ އެއް ބިލިޔަން ޔޫރޯ ކަނޑައަޅާފައެވެ.

މި އަހަރުގެ ގޯލްޑަން ބޯއި އެވޯޑް ޕެޑްރީ ހޯދިއިރު، މިދިޔަ އަހަރު މި އެވޯޑް ހޯދާފައިވަނީ ޑޯޓްމުންޑަށް ކުޅެމުން އަންނަ ނޯވޭގެ ޒުވާން ތަރި އާލިން ބްރައުޓް ހާލަންޑެވެ. އަދި މި އެވޯޑް ހޯދާފައިވާ ފާހަގަކޮށްލެވޭ ކުޅުންތެރިންގެ ތެރޭގައި މެސީގެ އިތުރުން ވޭން ރޫނީ އާއި، ސެސް ފަބްރެގާސް އާއި، ސާޖިއޯ އަގުއޭރޯ އަދި ކީލިއަން އެމްބާޕޭ ހިމެނެއެވެ.