މަކަރާއި ހީލަތުން، އޮޅުވާލައިގެންނާއި، އަދިވެސް މިނޫން ގޮތްގޮތަށް މީހުންގެ އަތުން ފައިސާ ހޯދުމަކީ ޒަމާންތަކަކަށް ދެމިގެންގޮސްފައިވާ އިޖުތިމާއީ ބޮޑު މައްސަލައެކެވެ. މިކަން ހައްލުނުވެ މިހެން ދަމުންގޮސް، ބަދަލުވަމުންދާ ޒަމާނާ އެއްގޮތަށް މިކަން ކުރާ ގޮތަށް ނުވަތަ އެކަން ކުރާ މީހުން ގެންގުޅޭ އުކުޅުތަކަށްވެސް ބަދަލުތައް އަންނަމުންދެއެވެ. ސޯޝަލް މީޑިއާ ޕްލެޓްފޯމްތައް މެދުވެރިކޮށް މިކަން ކުރަމުންދެއެވެ. އަދި އޮޅުވާލައިގެން ތަކެތި ވިއްކައިގެން މީހުންގެ އަތުން ބޮޑެތި އަދަދުތަކުން ފައިސާ އަތުލަމުން ދެއެވެ.
މިގޮތުން މި ފަހަކުން ފާހަގަކޮށްލެވުނު ކަމަކީ ބޮލުގައި އިސްތަށި ނުފަޅާ މީހުން ނުވަތަ ބޯ ތަލަވެފައި ހުންނަ މީހުންނަށް އަމާޒުކޮށްގެން އެމީހުންގެ އަތުން ގިނަ އަދަދަކަށް ފައިސާ އަތުލަން އުޅުނު މައްސަލައެވެ. މިކަމުގައި ހަރަކާތްތެރިވަމުންދަނީ ގްރޫޕަކުންނެވެ. އެމީހުން މިކަން ކުރަމުންދާގޮތަކީ ބޮލުގައި އިސްތަށި ފަޅުވާ ބޭހެއް އެމީހުންގެ ރައްޓެއްސަކު ވިއްކާ ކަމަށްބުނެ މީހުން އަތުން ބޮޑެތި އަދަދުތަކުން ފައިސާ ފޭރިގެންނެވެ. އަދި ބައެއް ފަހަރު ކަންމަތީ ފިހާރައަކުން ތެޔޮފުޅިއެއް ގަތުމަށްފަހު 4،000ރ. އަށްވުރެ ބޮޑު އަގަކަށް އެ ތެޔޮފުޅި ވިއްކާލަނީއެވެ.
މި މީހުންނާ ދިމާވެފައިވާ އެކި މީހުން ސޯޝަލް މީޑިއާގައި ހިއްސާކޮށްފައިވާ މައުލޫމާތުތަކުން އެނގޭގޮތުގައި މިކަމުގައި މަގުމަތީގައި ހަރަކާތްތެރިވަމުންދަނީ ދެ ބިދޭސީއެކެވެ. އެ ދެމީހުން އެންމެ ގިނައިން އުޅެނީ އެމްއެމްއޭ ސަރަހައްދުގައެވެ. އެމީހުން ވަނީ އެ ސަރަހައްދުގައި އުޅުނު ފަތުރުވެރިއެއްގެ އަތުންވެސް ފައިސާ ފޭރިގަނެފައެވެ. މިހެންގޮސް އެމީހުން ގެންދަނީ އެތައް ބައެއްގެ އަތުން މަކަރާއި ހީލަތުން ފައިސާ ފޭރެމުންނެވެ.
އެމްއެމްއޭ ސަރަހައްދަކީ ގިނަ އަދަދެއްގެ ފުލުހުންވެސް ހަރަކަތްތެރިވާ ސަރަހައްދެކެވެ. އެހެންނަމަވެސް މިހާތަނަށް އައިއިރުވެސް ފުލުހުންނަށްވެސް މިކަން ހުއްޓުވިފައެއް ނުވެއެވެ. އެހެންނަމަވެސް މިއީ އައު ކަމެއް ނޫނެވެ. އެކި ގޮތްގޮތަށް އެކި އުކުޅުތައް ބޭނުންކޮށްގެން މީހުންގެ އަތުން ފައިސާ ފޭރެމުންދާއިރު، މިހާތަނަށް އެންމެ ބޮޑެތި އަދަދުތަކުން މީހުންގެ އަތުން ފޭރިގަނެފައިވަނީ އެއީ ބީއެމްއެލް ކަމަށް ބުނެއެވެ. މިއީވެސް މިހާތަނަށް އައިރުވެސް ހައްލު ނުވި ކަމެކެވެ. އެހެންނަމަވެސް މިހާރު ގިނަ މީހުންނަކީ މިކަންކަމަށް އަހުލުވެރި މީހުންނެވެ.
އެއް ގޮތަކުން ނުވިއްޔާ އަނެއް ގޮތަކުންވިޔަސް އެމީހުން އެކަން ކުރެއެވެ. މީހުންގެ އަތުން ފައިސާ ފޭރެއެވެ. ބައެއް ފަހަރު މީހުންގެ ހަމްދަރުދީ ލިބޭނެފަދަ ޕޯސްޓުތައް ސޯޝަލް މީޑިއާގައި ޖަހައިގެންނެވެ. މިގޮތަށް ފައިސާ ހޯދުމަށް އެމީހުން ބޭނުންކުރަނީ މީސްމީހުން ބޭސްފަރުވާއަށް އެހީ ހޯދުމަށްއެދި ސޯޝަލް މީޑިއާގައި ކޮށްފައި ހުންނަ ޕޯސްޓުތަކެވެ. އެހެންނަމަވެސް އަސްލު ޕޯސްޓުގައި ޖަހާފައި އިންނަ އެކައުންޓު ނަމްބަރާ އެމީހުން ބޭނުންކުރާ އެކައުންޓް ނަންބަރު ތަފާތެވެ. އަދި އެމީހުންގެ ހުރިހާ ޕޯސްޓެއްގައިވެސް އެއް އެކައުންޓު ނަންބަރެއް ބޭނުންކުރާތީ މިކަންވެސް ރައްޔިތުންގެ ސަމާލުކަމަށް އައީއެވެ. މިހާރު ސޯޝަލް މީޑިއާއިން މިފަދަ ޕޯސްޓުތައް ވަރަށް ނުފެނެއެވެ.
މިހާތަނަށް އައިރު އެނގުނު އެއް ކަމަކީ އެމީހުން ބޭނުންކުރާ އެއް އުކުޅު 'ފެއިލް' ވެއްޖެނަމަ އެހެން އުކުޅެއް ބޭނުންކުރާކަމެވެ. ފައިސާ ފޭރެން އިތުރު ގޮތްތަކެއް ހޯދައެވެ. މިއީ ރައްޔިތުންގެ ބޮޑު ކަންބޮޑުވުމެއް އޮތް ކަމެކެވެ. މި ކަންކަމަށް ރައްޔިތުންގެ ލޯތައް ހުޅުވި، އެކަންކަން ހުއްޓޭއިރު އޮންނަނީ. ގިނަ ބައެއްގެ އަތުން ފައިސާ ފޭރިފައެވެ. އެއް ބަޔަކު އުމުރު ދުވަހު ކުރި މަސައްކަތް ފެނަށް ދެއެވެ.
މިކަމުގައި ރައްޔިތުންގެ ކަންބޮޑުވުމަކީ ރަށުތެރޭގައި ހިނގާ މިފަދަ ކަންކަން ހުއްޓުވަން ތިބޭ ފުލުހުންގެ ފަރާތުން އެދެވޭ ފިޔަވަޅެއް ނާޅާ ކަމެވެ. މިކަން ކުރާ ފަރާތްތައް ދެނެގަނެ އެމީހުންނަށް ދޭންޖެހޭ އަދަބު ނުދެވޭކަމެވެ. މިއީ ހަމަގައިމުވެސް އާދައިގެ މައްސަލައެއް ނޫނެވެ. މިފަދަ އިޖްތިމާއީ ބޮޑެތި މައްސަލަތައް ހައްލު ނުކުރެވި ދިގުލައިގެންދާކަމީ ރައްޔިތުންގެ ކަންބޮޑުވުން އިންތިހާއަށް އޮތް ކަމެކެވެ.
