ދިވެހިން ހޯދައިގެން މި ތިބި ޑިމޮކްރަސީގެ ނިޒާމުގައި ބާރުތައް އޮތީ ވަކިކޮށްފަ އެވެ. ވެރިކަން ކުރުމުގެ ބާރާއި، ޤާނޫނު ހެދުމުގެ ބާރު އަދި އަދުލު އިންސާފު ޤާއިމު ކުރުމުގެ ބާރެވެ. އެއް ބާރުން އަނެއް ބާރަށް ފާރަވެރި ވާން ޖެހޭއިރު، އެއް ބާރު އަނެއް ބާރުގެ މައްޗަށް ވެރިވެ ގަތުމެއް ނޯވެ އެވެ. މި ނިޒާމުގެ ތެރެއިން މިނިވަން މުއައްސަސާތަކެއް އުފައްދައި، އެ ތަންތަނަށް ބޭފުޅުން އައްޔަން ކޮށްފައި ތިބެނީ ރައްޔިތުންގެ ފައިސާ އިން މުސާރާ ދޭ ގޮތަށެވެ. އެއީ ވެސް ރައްޔިތުންނަށް ޚިދުމަތް ކުރަން ތިބި ބައެކެވެ.
ދުނިޔޭގެ ކުރިއަރާފައިވާ ޤައުމުތަކުގައި އެފަދަ މުއައްސަސާތައް ހުންނައިރު، ރާއްޖޭގައި އެބަ ހުއްޓެވެ. އެ މުއައްސަސާތަކުގައި ތިބޭ މީހުން އިސްކުރަން ޖެހޭނީ ރައްޔިތުންގެ މަސްލަޙަތެވެ. ވެރިކަމުގައި ކޮންމެ ބަޔަކު ތިބި ނަމަވެސް، ރައްޔިތުންނަށް ގެއްލުންވާ ކަމެއް ހިނގާ ނަމަ، އެކަމާ ދެކޮޅަށް އެ މުއައްސަސާތަކުން ތެދުވަން ޖެހޭނެ އެވެ. އޭސީސީއެއް، ފުލުހުންނެއް ނުވަތަ އެހެން މުއައްސަސާއެއް ކިޔާނެ ކަމެއް ނެތެވެ. އެފަދަ ޙާލަތެއްގައި ރައްޔިތުންގެ ޙައްްގުގައި ނުތެދުވެވޭ ނަމަ، އެ މުއައްސަސާތަކުގެ ބޭނުމެއް ނެތެވެ.
މިފަހުން ވެސް ފެނުނީ އެކަހަލަ މަންޒަރެކެވެ. ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހިންގާލި ވައްކަމާއި، ކޮރަޕްޝަންގެ ޖަރީމާ އެވެ. އެ ކުންފުނީގެ އޭރުގެ މެނޭޖިން ޑިރެކްޓަރު، އޭނާގެ ބޭބެ އަށް މަންފާވާ ގޮތަށް ހިންގާލި ކޮރަޕްޝަންގެ ކަންތައް ގަނޑެކެވެ. އެ ކަންތައް ގަނޑުގެ ތެރެއިން ފެންމަތިވެގެން އައި، ހުޅުމާލޭގެ ބިންތަކާއި، ފްލެޓުތަކުގެ ކޮރަޕްޝަންގެ ވާހަކަ އެވެ. އެ ވާހަކަތައް ދައްކާ ކޮޅުން ނުލާހާ ގިނަ ވައްކަމާއި، ކޮރަޕްޝަންގެ ވާހަކަ އެވެ.
އެކަންތައް ފެންމަތިވެގެން ދިޔުމާއެކު، ފުލުހުންގެ ފަރާތުން ނޫސްވެރިންގެ ބައްދަލުވުމެއް ބޭއްވި އެވެ. އެ ނޫސްވެރިންގެ ބައްދަލުވުން ބެލި ކޮންމެ ރައްޔިތެއްގެ ހިތުގައި ފުލުހުންގެ މުއައްސަސާ އަށް އޮތް އިތުބާރު ގެއްލިގެން ދިޔަ ބައްދަލުވުމެވެ. ސަރުކާރުން ވައްކަމުގެ ބޮޑު ޖަރީމާއެއް ހިންގާލައިގެން އުޅުނުއިރު، ފުލުހުން އަރައި ގޯސް ކުރީ މިދިޔަ ސަރުކާރެވެ. ސީދާ ފުލުހުންގެ މުއައްސަސާ އަށް ސިޔާސީ ނުފޫޒު ފޯރާފައި އޮތް މިންވަރު ފެނުނެވެ. މިދިޔަ ސަރުކާރޭ ބުނާއިރު، މިދިޔަ ސަރުކާރުން ހިންގި ކަމެއް ނަމަ، މި ސަރުކާރުގެ އެމްޑީ އާއި މި ސަރުކާރުން ލާފައި އޮތް ބޯޑެއް ސަސްޕެންޑު ކުރީ ކީއްވެ ހެއްޔެވެ؟
ދެން އޭގެ ފަހުން ފުލުހުން ބުނީ، އެ ތަހުގީގަށް ބޭނުންވާ މައުލޫމާތު އާންމުން ހިއްސާ ކުރުމަށެވެ. އަދި އެ ހިއްސާ ކުރާ މައުލޫމާތާއި، އެ މައުލޫމާތު ހިއްސާ ކުރާ ފަރާތެއް ރައްކާތެރިކޮށްދޭނެ ކަމުގެ ޔަގީންކަން ދޭ ވާހަކަ އެވެ. މި ވާހަކަތައް ޤަބޫލު ކުރާނީ ކިހިނެއް ހެއްޔެވެ؟ ތަހުގީގުގައި ފުލުހުން ސުވާލު ކުރާ މީހާ ދެއްކި ވާހަކަ، ނޫސްވެރިންގެ ބައްދަލުވުމުގައި ވެސް ބުނެފި އެވެ. ދެން އިތުބާރު ކުރާނީ ކިހިނެއް ހެއްޔެވެ؟ މިއަދު، ފުލުހުންނަށް އެ މައްސަލައިގައި އިންސާފުވެރި ތަހުގީގެއް ކުރެވޭނެ ކަމަށް ޤަބޫލު ކުރާ މީހަކު ވެސް މަދު ވާނެ އެވެ.
ހަމަ އެ މައްސަލައިގައި އޭސީސީ އަށް ހިލަމެއްވީ ވެސް، ޕީޖީން ފާޑެއްގެ އަމުރެއް ކުރި ފަހުންނެވެ. އޭގެ ފަހުން އޭސީސީގެ ކަހާތަން ހިރުވައި ވެސް ނުލި އެވެ. ރައްޔިތުންގެ މިފަދަ ބޮޑު މައްސަލައެއްގައި އޭސީސީ ނުވަތަ އެ ނޫން ވެސް މިނިވަން މުއައްސަސާތަކުން ތެދުވަން ޖެހޭނީ ވަކި ފަރާތަކުން އަމުރު ކުރީމަ ހެއްޔެވެ؟ ނުވަތަ ވަކި ފަރާތެއް ބޭނުންވީމަ ހެއްޔެވެ؟ އެހެން ވިޔަސް އެންމެ ރަނގަޅެވެ. މިނިވަން މުއައްސަސާތަކަށް ރައްޔިތުން ކުރަމުން އައި އިތުބާރު ގެއްލެނީ އެވެ.
