ކަރަންޓު ބޭނުންކުރެވޭ މިންވަރު ވަގުތުން ބަލައިލެވޭ "ސްމާޓް މީޓަރ" ބޭނުންކުރުމަށްޓަކައި ބޭނުންވާ އެޕްލިކޭޝަން މިއަހަރު ނިމުމުގެ ކުރިން ނިންމައި، ނެރޭނެ ކަމަށް ސްޓެލްކޯއިން ބުނެފިއެވެ.
އެކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ސްޓެލްކޯގެ މީޑިއާ އޮފިޝަލު ވިދާޅުވީ، މާލޭ ސަރަޙައްދުގައި އެންމެ ފުރަތަމަ ސްމާޓް މީޓަރުތައް އިންސްޓޯލްކުރުމަށް ހަމަޖެހިފައިވަނީ ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތަކުގެ އެޕާޓްމަންޓް ތަކުގައި ކަމަަށެވެ. އެގޮތުން މިހާރު ސްމާޓް މީޓަރު ތަޢާރަފުކުރުމަށް ކުރާ މަސައްކަތުގެ ދަށުން ޕައިލެޓް ޕްރޮޖެކްޓެއްގެ ގޮތުގައި ހިޔާ ފްލެޓްތަކުގެ އެޕާޓްމަންޓްތަކުގައި ސްމާޓް މީޓަރު ވަނީ ހަރު ކުރެވިފައެވެ.
އޭގެ އިތުރުން، ސްމާޓް މީޓަރު ބޭނުންކުރުމަށްޓަކައި ބޭނުންވާ އެޕްލިކޭޝަން ޑިޒައިން ކުރުމުގެ މަސައްކަތް މިހާރު ސްޓެލްކޯއިން ގެންދަނީ ކުރަމުންނެވެ. އެ މަސައްކަތް ނިމި، މި އަހަރު ނިމުމުގެ ކުރިން އެޕްލިކޭޝަން ނެރެވޭނެކަމަށް ސްޓެލްކޯއިން މައުލޫމާތު ދެއެވެ.
ސްޓެލްކޯގެ މީޑިއާ އޮފިޝަލު ވިދާޅުވީ، އަންނަ އަހަރުގެ ފުރަތަމަ ކުއާޓަރގައި ސްމާޓް މީޓަރު ގަންނަން ބޭނުންވާ ފަރާތްތަކަށް އެ ފުރުސަތު ހުޅުވާލެވިގެންދާނެ ކަމަށެވެ. އެގޮތުން މި ފުރުސަތު ހުޅުވާލެވޭނީ ސްޓެލްކޯގެ ޚިދުމަތްދޭ 35 ރަށް ވެސް ހިމެނޭގޮތަށްކަން އޭނާ ފާހަގަކުރެއްވިއެވެ.
ސްމާޓް މީޓަރުގެ ޚިދުމަތް ބޭނުންކުރުމަށް ތައްޔާރުވަމުންދާއިރު، މި ޚިދުމަތް ފަސޭހައިން ބޭނުން ކުރެވޭނެގޮތަށް ފަރުމާކުރާ އެޕްލިކޭޝަނަކީ ސްމާޓް މީޓަރާއެކު ތަޢާރަފުކުރާ ޚާއްސަ މޯބައިލް އެޕްލިކޭޝަނެކެވެ.
މި ޚިދުމަތް ތަޢާރަފުކުރުމުން ކަސްޓަމަރުންނަށް އެމީހުންގެ ގޭބިސީތަކުގައި ކަރަންޓް ބޭނުންކުރެވޭ މިންވަރާއި، ބިލަށް އަރާވަރު ކޮންމެތަނެއްގައި ހުރެގެން ވެސް ރިއަލް ޓައިމްކޮށް ބަލައިލެވޭނެއެވެ. އަދި ބިލަށް އެންމެ މަތިން އަރާނެ ޢަދަދެއް ކަނޑައަޅައި، ކަރަންޓް ޔޫސޭޖް އެ ޢަދަދަކާ ގާތްވުމުން ކަސްޓަމަރަށް އެކަން ނޮޓިފައިކޮށްދިނުމާއި، ބޭނުންވާ ވަރަށްވުރެ އިތުރަށް އަރާފައިވާނަމަ ޚިދުމަތް މެދުކަނޑާލަން އެދުންފަދަ ލުއިފަސޭހަތައް ކަސްޓަމަރުންނަށް މި ޚިދުމަތާއެކު ލިބިގެންދާނެއެވެ.
ސްމާޓް މީޓަރުގެ ޚިދުމަތް ތަޢާރަފުކުރުމާއެކު ސްޓެލްކޯގެ މަސައްކަތްތަކަށް ވެސް އިތުރު ލުއިފަސޭހަކަމެއް ލިބިގެންދާނެއެވެ. އެގޮތުން މި ޚިދުމަތް ގިނަ ގޭބިސީތަކަކަށް ތަޢާރަފުކުރެވިއްޖެނަމަ، ކަސްޓަމަރުން އާއްމުކޮށް އެންމެ ގިނައިން ކަރަންޓް ބޭނުންކޮށް އުޅޭ ވަގުތުތަކާއި، ކަރަންޓް ބޭނުންކުރާ މިންވަރު ވަގުތުން ބަލައިލެވޭނެއެވެ.
