ދުނިޔޭގެ އެކި ހިސާބުތަކުގައި ހަލުވިކަމާއެކު ފެތުރެމުން އަންނަ ކޮވިޑްގެ ޑެލްޓާ ވޭރިއަންޓުގެ ބިރުވެރިކަމާއެކު ޖޯންސަން އެންޑް ޖޯންސަން ވެކްސިން ޖެހި މީހުން ބޫސްޓަރ ޝޮޓް ޖަހަން ޖެހިދާނެ ކަމަށް މާހިރުން ބުނެފިއެވެ.
ބަލިތަކުގެ ތަޖުރިބާކާރުން ބުނާ ގޮތުން، އެމެރިކާގައި ޖޯންސަން ޖެހި މީހުންނަށް ބޫސްޓަރ ޝޮޓްގެ ގޮތުގައި ފައިޒާ ވެކްސިން ނުވަތަ މޮޑާނާ ވެކްސިން ދިނުމުގެ ވިސްނުމެއް ގެންގުޅޭ ކަމަށެވެ. ޖޯންސަން އެންޑް ޖޯންސަން އިން އުފެއްދި ވެކްސިނަކީ ސިންގަލް ނުވަތަ 1 ޑޯޒު ވެކްސިނެކެވެ. ދެވަނަ ޑޯޒެއް ޖަހާކަށް ނުޖެހެއެވެ. ޑެލްޓާ ވޭރިއަންޓުގެ ސަބަބުން ވެކްސިންގެ 1 ޑޯޒް ޖަހާފައި ތިބޭ މީހުންނަށް ބަލީގެ ނުރައްކާ ވަރަށް ބޮޑެވެ. އަދި ވެކްސިންގެ ދެވަނަ ޑޯޒް ޖަހާ މީހުންނަށް ބަލިން ދިފާއުވުމުގެ ފުރުސަތު ބޮޑުކަމަށް ތަޖުރިބާކާރުން ބުނެއެވެ.
މިހާތަނަށް އައި އިރު ޖޯންސަންގެ ވެކްސިން ޖެހި ބައެއް މީހުން ތަފާތު އެހެން ވެކްސިނަކުން ދެވަނަ ޑޯޒް ޖަހާފައިވެއެވެ. މިހާތަނަށް އައި އިރު ތަފާތު 2 ވެކްސިން ޖަހައިގެން އެއިން ކުރާ އަސަރުތައް ދެނެގަނެވިފައެއް ނުވެއެވެ. ނަމަވެސް އެކަމާ ގުޅޭ ދިރާސާތައް އެކި ހިސާބުތަކުގައި މިހާރު ވެސް ކުރެވެމުން އެބަދެއެވެ. އެމެރިކާގައި އަދި މިކަން ކުރުމުގެ ހުއްދަ ދީފައި ނުވި ނަމަވެސް ތަފާތު ދެ ވައްތަރެއްގެ ވެކްސިން ޖަހާކަމުގެ ރިޕޯޓްތަކެއް އަންނަނީ ލިބެމުންނެވެ.
މިހާތަނަށް ލިބިފައި ހުރި މައުލޫމާތުތައް ދައްކާ ގޮތުން ކެނެޑާ އާއި ޔޫރަޕްގެ ބައެއް ގައުމުތަކުގައި އަންނަނީ ތަފާތު ދެ ވައްތަރެއްގެ ވެކްސިން ޖެހުމުގެ ހުއްދަ ދެމުންނެވެ.
ޑެލްޓާ ވޭރިއަންޓް ފުރަތަމަ އިންޑިއާއިން ފެނި، އަދި އެކި ގައުމުތަކުން ވެސް އެ ވޭރިއަންޓް ފެނިފައިވާ ކަމުގެ ރިޕޯޓްތައް ލިބިފައިވާ އިރު، ޖޯންސަން އެންޑް ޖޯންސަން އިން މި ވޭރިއަންޓުން ކިހާ މިންވަރަކަށް ދިފާއުކޮށްދޭތޯ އަންނަނީ ސުވާލު އުފައްދަމުންނެވެ.
