ލޯކަލް ކައުންސިލް އިންތިހާބު 2017 ގައި އިންތިޚާބުވި ކައުންސިލަރުން ހުވާކުރާނީ ޖޫންމަހުގެ 3 ވަނަ ދުވަހުގައި ކަމަށް ލޯކަލް ގަވަރމަންޓް އޮތޯރިޓީ(އެލްޖީއޭ) އިން ބުނެފިއެވެ.
އެލްޖީއޭގެ ޑިރެކްޓަރ ޖެނެރަލް އާދަމް ޝަރީފް ރާއްޖެއެމްވީއަށް ވިދާޅުވީ ޖޫންމަހުގެ 3 ވަނަ ދުވަހު ކައުންސިލަރުން ހުވާކުރެއްވުމަށް ތައްޔާރުވަމުން ދާއިރު އެއްދުވަހެއްގައި ހުރިހާ ކައުންސިލަރުން ހުވާކުރެއްވުމުގެ މަސައްކަތް ކުރިއަށްގެންދާނެކަމަށެވެ.
ކައުންސިލަރުން ހުވާކުރައްވަން ޖެހޭނީ ފަނޑިޔާރެއްގެ ކުރިފުޅުމަތީގައެވެ. އެހެން ކަމުން މިހާރު ޖުޑީޝަލް ސާވިސް ކަމިޝަންގައި ފަނޑިޔާރުން ހަމަޖައްސައިދިނުމަށް އެދިފައިވާނެކަމަށް އޭނާ ވިދާޅުވިއެވެ. މީގެ އިތުރުން ފަނޑިޔަރުން ހަމަޖައްސައިދެވޭނެ ގަޑިތަކާއި އުސޫލުތައް ބުނެދިނުމަށް އެދިފައިވާނެކަމަށާއި އޭރުން މެޖިސްޓްރޭޓުން ނެތް ރަށްރަށުގެ ކައުންސިލަރުން ހުވާ ކުރުމަށް އެހެން ގަޑިތައް ހަމަޖައްސޭނެ ކަމަށް އޭނާ ވިދާޅުވިއެވެ.
މިފަހަރުގެ ކައުންސިލް އިންތިޚާބުގައި އިންތިޚާބުކުރާނީ 664 މީހުންނެ. އިލެކްޝަންސް ކަމިޝަނުން އަންގާރަދުވަހުގައި ވަނީ އިންތިޚާބުގެ ވަގުތީ ނަތީޖާ އިއުލާން ކުރަން ފަށާފައެވެ. ވަގުތީ ނަތީޖާއިން ދައްކާ ގޮތުގައި ކުރީގައި އުޅެނީ އެމްޑީޕީ އެވެ.
