ވެކްސިންގެ ދެވަނަ ޑޯޒް 12 ހަފުތާއަށްވުރެ ލަސްނުކުރުމަށް ޓެކްނިކަލް އެޑްވައިޒަރީ ގްރޫޕް (ޓެގް)ގައި ހިމެނިވަޑައިގަންނަވާ، ޕީޑިއޮޓްރިކް އިންފެކްޝަންސް އެކްސްޕާޓް، ޑރ. ނަޒްލާ މުސްތަފާ އެދިވަޑައިގެންފިއެވެ.
އަންގާރަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޑރ. ނަޒްލާ ވިދާޅުވީ ވެކްސިންގެ ދެވަނަ ޑޯޒް ނުލިބިގެން ނުޖެހުނަސް ފުރަތަމަ ޑޯޒް އަލުން ޖަހަން ނުޖެހޭނެ ކަމަށެވެ. ވެކްސިންގެ ފުރަތަމަ ޑޯޒް ޖަހާތާ، 14 ނުވަތަ 16 ވަނަ ހަފުތާގައި ވެކްސިންގެ ދެވަނަ ޑޯޒް ޖަހައިފިނަމަ 12 ވަނަ ހަފުތާގައި ލިބުނު ރައްކާތެރިކަމަށްވުރެ އެ ހަފުތާތަކުގައި ލިބޭ ރައްކާތެރިކަން ކުޑަވެގެން ހިނގައިދާނެ ކަމަށެވެ. އަދި ބައްޔަށް މީހާ ހުށަހެޅިއްޖެނަމަ އިންފެކްޓްވުމުގެ ފުރުސަތު ވެސް މަތިވެދާނެ ކަމަށެވެ.
ޑރ. ނަޒްލާ ވިދާޅުވީ ވެކްސިން އުފައްދާ ގައުމުތަކުގައި ކޮވިޑުގެ ބަލިމަޑުކަން އިންތިހާއަށް ފެތެރިއްޖެނަމަ ވެކްސިން ލިބުމަށް އަދި ޓެސްޓްކިޓް ލިބުމަށް ވެސް ދަތިވާ ކަމަށެވެ. ރާއްޖޭގައި ކޮވިޝީލްޑް ވެކްސިންގެ ސްޓޮކް ހުސްވެގެން ވެކްސިން ޖެހުން ވަގުތީ ގޮތުން މެދުކަނޑާލާފައިވާއިރު ކުރިއަށް އޮތް ދެ ހަފުތާއެއްހާ ދުވަހުގެ ތެރޭގައި ކޮވިޝީލްޑް ވެކްސިންގެ އިތުރު ޝިޕްމަންޓެއް ލިބޭނެ ކަަމަށް ސަރުކާރުން ވަނީ ބުނެފައެވެ.
އެސްޓްރަޒެނަކާ ވެކްސިނާއި ކޮވިޝީލްޑް ވެކްސިނަކީ އެއްވައްތަރަކަށް ހަދާފައިވާ ދެ ވެކްސިނަށް ވުމުން އިންޓަރޗޭންޖް ކުރެވިދާނެ ކަމަށް ދުނިޔޭގެ ސިއްހަތު ޖަމިއްޔާއިން ބުނެފައިވާ ކަމަށް ޑރ. ނަޒްލާ ވިދާޅުވިއެވެ. ވެކްސިން އިންޓަރޗޭންޖް ކުރާކަމަށްވާނަމަ ކަންތައްތައް ކުރިއަށް ގެންދާނީ އެކަމުގެ މާހިރުންނާއި ވާހަކަ ދެއްކުމަށްފަހު ކަމަށް ވެސް ޑރ. ނަޒްލާ ވިދާޅުވިއެވެ.
މިއަހަރުގެ ފެބްރުއަރީ މަހުގެ 1 ވަނަ ދުވަހުން ފެށިގެން ރާއްޖޭގައި ވެކްސިނޭޝަން ޕްރޮގްރާމް ކުރިއަށްގެންދާއިރު، ދެވަނަ ޑޯޒު ޖަހަން ފަށާފައި ވަނީ އޭޕްރިލް މަހު ކުރީކޮޅުއެވެ. ދެވަނަ ޑޯޒު ޖަހަނީ ސިނޮފަރމް ވެކްސިންގެއެވެ. މިހާރު ރާއްޖޭގައި ޖުމްލަ ދެ ވެކްސިނެއް އަންނަނީ ބޭނުން ކުރަމުންނެވެ. އެއީ ސިނޮފަރމް ވެކްސިން އަދި ފައިޒާ ވެކްސިނެވެ. އޭގެ ތެރެއިން މިވަގުތު އާންމުންނަށް ފުރަތަމަ ޑޯޒު ޖަހަނީ ސިނޮފަރމްގެ އެކަންޏެވެ. އަދި ފައިޒާ ވެކްސިން ދެނީ ވަކި ޚާއްސަ ހާލަތެއްގައި ތިބޭ މީހުންނަށެވެ. މިހާރު ދެވަނަ ޑޯޒު ޖަހަނީ ސިނޮފާމްގެ އެކަންޏެވެ.
