"ބޮލުގައި ރިއްސަންޏާ ބޭސް ގުޅައެއް ކާލީމަ ރަނގަޅުވާނެ"

"ކޮންމެ ފަހަރަކު ބޮލުގައި ރިއްސުން ބަހަނާއަކަށް ނުހަދާ"

"ދެން ތެދުވެ ނޫޅެވޭ ވަރަށް ބޮލުގައެއް ނުރިއްސާނެ"

މިއީ މައިގްރޭން ތަހައްމަލު ކުރާ މީހުންނަށް އާންމުކޮށް އިވޭ ބަސްތަކެކެވެ. ނަމަވެސް މައިގްރޭނަކީ ހަގީގަތުގައި އާދައިގެ ބޮލު ރިހުމަކަށްވުރެ ސީރިއަސް އޭގެ ތަކުލީފު ބޮޑު ހާލަތެއްކަން އެނގޭހެއްޔެވެ؟

އެކި މީހުންނަށް މައިގްރޭން ތަހައްމަލު ކުރަން ޖެހޭ ސަބަބުތައް ތަފާތެވެ. އަދި އެކި މީހުންނަށް މައިގްރޭންގެ އަސަރު ކުރާ މިންވަރާއި ކުރާ ވަގުތުތައްވެސް ތަފާތެވެ. އިންތިހާއަށް ބޮލުގައި ރިއްސުމާއި މޭނުބައި ކުރުމާއި ހުން އައުމުގެ އިތުރުން ތެދުވެ އުޅެން އުނދަގޫވުމާއި ހަރަކާތް ކުރަން އުނދަގޫވުން ފަދަ ކަންކަމަކީ މައިގްރޭން ބަލި މީހުން އެކި ސްޓޭޖުތަކުގައި ތަހައްމަލު ކުރަންޖެހޭ ކަންކަމެވެ.

މާހައުލަށް އަންނަ ބަދަލުތަކުގެ ސަބަބުން ވެސް ބައެއް މީހުންނަށް މައިގްރެއިންގެ ވޭން ތަހައްމަލު ކުރަން ޖެހެއެވެ. އެގޮތުން މޫސުމަށް އަންނަ ކުއްލި ބަދަލުތަކުގެ އަސަރު ހަށިގަނޑަށް ކުރުމުން އޭގެ ސަބަބުންވެސް ބައެއް މީހުންނަށް "މައިގްރޭން އެޓޭކް" ކުރިމަތިވެދާނެއެވެ.

މާބޮޑަށް ހޫނު ގަދަވުމާއި އެމީހަކު އެވަގުތު ހުންނަ މާހައުލެއްގެ ވަށައިގެންވާ އަޑުތައް މާ ގަދަވުމަކީ ވެސް އެޓޭކް އައުން އެކަށީގެންވާ ކަމެއް ކަމަށް ސިއްހީ ތަޖުރިބާކާރުން ބުނެއެވެ.

މީގެ އިތުރުން މާބޮޑަށް އަލި ގަދަވުމަކީވެސް މައިގްރޭންގެ ހާލަތު ގޯސް ކުރުވާ ކަމެއް ކަމަށް މާހިރުން ބުނެއެވެ. އެގޮތުން މައިގްރޭން ގެ ވޭން ތަހައްމަލު ކުރަމުންދާ ދަނޑިވަޅެއް ނަަމަ ގިނަ މީހުންނަށް އެއްވެސް ކަހަލަ އަލިކަމެއް ހުންނަ ތަނެއްގައި މަޑު ކުރުމަކީ އިންތިހާއަށް ވޭންހުރި އަދި ކެތްކުރަން އުނދަގޫ ކަމަކަށް ގިނަ ފަހަރު ވެއެވެ.

މި ސަބަބުތަކުގެ އިތުރުން ބައެއް ކަހަލަ ސެންޓާއި މީރުވަސް ދުއްވަން ގެންގުޅޭ ބައެއް ބާވަތްތަކުގެ ސަބަބުންނާއި އެކިކަހަލަ އެލާރޖީ ހުރުމަކީވެސް މައިގްރޭން ބަލި މީހުންނަށް އެޓޭކް ކުރިމަތިވުން އެކަށީގެންވާ ކަންކަމެވެ.

މައިގްރޭން ތަހައްމަލު ކުރާ މީހުންނަށް އާދަޔާ ޚިލާފަށް ބޮލުގައި ރިއްސުމާއި މޭނުބައި ކުރުން ފަދަ ކަންކަން ކުރިމަތިވެއެވެ. ނަމަވެސް އެ ހާލަތު މެދުވެރިވާ ސަބަބު އެކި މީހުންނަށް ތަފާތެވެ.

ބައެއް ފަހަރު ކެއިން ބުއިމުގެ އާދަތަކުގެ ސަބަބުންވެސް މައިގްރޭން އެޓޭކް އައުން އެކަށީގެންވެއެވެ. ހަކުރުގެ ބާވަތްތަކާއި ގިނައިން ކެފެއިން އެކުލެވޭ ބާވަތްތައް ބޭނުން ކުރުމަކީ މައިގްރޭން ހުންނަ މީހުންނަށް އެޓޭކް މެދުވެރިވާ ސަބަބެއްކަމަށް ވެއެވެ.

އޭގެ އިތުރުން އެލްކޮހޯލް އެކުލެވޭ ބުއިންތަކާއި ޗޮކްލެޓަކީވެސް މައިގްރޭނަށް މެދުވެރިވާ ސަބަބުތަކުގެ ލިސްޓުގެ ކުރީގައި ހިމެނޭ ތަކެއްޗެވެ. ނަމަވެސް ކުރިންވެސް ފާހަގަކުރިހެން މިތަކެތީގެ ސަބަބުން އެކި މީހުންނަށް އަސަރު ކުރާ މިންވަރު ތަފާތެވެ. ދަޅުގައި ބަންދުކުރި މަހާއި ކާކުލައިގެ އިތުރުން ޗީޒްއަކީވެސް ހަމަ މި ލިސްޓުގައި ހިމެނޭ ބާވަތްތަކެވެ.

މި ބާވަތްތައް ބޭނުންކޮށްގެން މައިގްރޭން އެޓޭކް ކުރިމަތިވާނަމަ ރަނގަޅު ގޮތަކީ އެތަކެއްޗާ ދުރުވުން ކަމަށް ސިއްހީ މާހިރުން ބުނެއެވެ.

މައިގްރޭން މެދުވެރިވާ ސަބަބުތަކުގެ ތެރެއިން އެންމެ ގިނަ އަދި އެންމެ އާންމު އެއް ސަބަބަކީ ދިރިއުޅުމުގެ އާދަތައް ކަމަށް ޑޮކްޓަރުން ބުނެއެވެ. ހަމަ ނިދި ނުލިބުމަކީ އޭގެ ތެރެއިންވެސް އެންމެ އާންމު އެއް ސަބަބެވެ.

ހަމައެއާއެކު ނިދުމާއި އެއްވަރަށް ގަޑިން ގަޑިއަށް ނުކެއުމާއި ހަށިގަނޑުގެ ފެން މަދުވުންވެސް މައިގްރޭން މެދުވެރިވާ ސަބަބުތަކުގެ ތެރޭގައި ހިމެނެއެވެ.

އޭގެ އިތުރުން ކަންކަމާ މާ ބޮޑަށް ކަންބޮޑުވުމުގެ ސަބަބުން ބޮލުގައި ރިއްސަން ފެށުމަކީވެސް އާޚިރުގައި އެ ތަދު މައިގްރޭންގެ ތަދަކަށް ބަދަލުވެގެން ދިއުން އެކަށީގެންވާ ކަމެއް ކަމަށް ޑޮކްޓަރުން ބުނެއެވެ. މައިގްރޭން ބަލި މީހުން ކަންކަމާ މާ ބޮޑަށް ވިސްނައި ފިކުރު ކުރަން ފަށައިފިނަމަ މި ހާލަތު މެެދުވެރިވެއެވެ.

ދިރިއުޅުމުގެ އާދަތަކުގެ ތެރެއިން ރުއިމަކީވެސް މައިގްރޭން އެޓޭކް އައުން އެކަށީގެންވާ ކަމެކެވެ. ޚާއްސަ ގޮތެއްގައި ކުއްލި ގޮތަކަށް މީހާ މާ ބޮޑަށް ހިތްދަތިވެ ރޯން ޖެހުމަކީ އޭގެ ސަބަބުން ވަރަށް އަވަހަށް މީހާއަށް މައިގްރޭން އެޓޭކް ކުރިމަތިވުން އެކަށީގެންވާ ކަމެކެވެ. މިކަން ވަރަށް ގިނަ މީހުންނަށް ތަޖުރިބާކުރަންވެސް ޖެހެއެވެ.

މި ސަބަބުތަކުގެ އިތުރުން ހަށިގަނޑުގެ އާންމު ސިއްހަތާ ގުޅުންހުރި އެކި ކަންކަމަކީވެސް މައިގްރޭނަށް މަގުފަހިވާ ކަންކަމެވެ. އެގޮތުން ހޯރމޯން މައްސަލަތަކާއި ލޭގެ ޕްރެޝަރާއި ގުޅުންހުރި ސިއްހީ މައްސަލަތަކާއި ލޭގައި ހަކުރު ހުންނަ މިންވަރު ފަދަ ކަންކަމުންވެސް މައިގްރޭން އެޓޭކެއް އައުން އެކަށީގެންވެއެވެ.

މިއިން ކޮންމެ ސަބަބެއް މެދުވެރިވި ނަމަވެސް މައިގްރޭން ބަލި މީހުންނަށް ތަހައްމަލު ކުރަން ޖެހެނީ އާދައިގެ ވޭނެއް ނޫނެވެ. އާދައިގެ ރިހުމެއް ނޫނެވެ. ބައެއް ފަހަރު މި ވޭން އެތައް ގަޑިއިރެއް ވަންދެން ދެމިގެންދާއިރު ބައެއް މީހުންނަށް ކޮޅަށް ތެދުވެ ހުރެލަންވެސް ނުކުޅެދޭ މިންވަރަށް މި ވޭން ހަށިގަނޑުގައި އަށަގެންފައި ހުރެއެވެ.

ވީމާ މައިގްރޭނަކީ އާދައިގެ ބޮލު ރިހުމެއް ކަމަށް ބެލުން ބަދަލުކުރަން ޖެހެއެވެ.