އެމްޑީޕީން ވަކިކޮށްލުމުން އިދިކޮޅު ޕީޕީއެމްއާ ގުޅިގެން އެއްޗެހި ކިޔާނެ ހައިސިއްޔަތެއް އެމްޑީޕީ މެމްބަރުންގެ ނެތްކަމަށް އެ ޕާޓީގެ ކުރީގެ ޗެއާޕަރސަން މުސާ މަނިކު (ރީކޯ) ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން މޫސަ ވިދާޅުވީ އެމްޑީޕީން ވަކިކޮށްލުމުން އިދިކޮޅު ޕީޕިއެމްއާ ގުޅިގެން އުޅޭތީ އެކަމާ އެއްޗެހި ކިޔާކަން އެނގޭ ކަމަށެވެ. އަދި މިހާރު އޮތް ބަރުލަމާނީ ބަހުސްގައި އެމްޑީޕީގެ އިހުގެ ވިސްނުމާ ގުޅޭ ވާހަކަތައް ދައްކާތީ ބަސް ބުނާކަންވެސް އެނގޭ ކަމަށެވެ. އެކަމަކު މިއަދު އެމްޑީޕީގެ ހާލަތު އޮތް ގޮތުން އެގޮތަށް އެއްޗެހި ކިޔުމުގެ ހައިސިއްޔަތެއް ނެތްކަމަށް މޫސަ ވިދާޅުވިއެވެ.
މޫސަ ވިދާޅުވީ އެމްޑީޕީ އެންމެ ފުރަތަމަ ފެށިގެން އައީ ރައީސް މައުމޫންގެ އަނިޔާވެރިކަމާ ދެކޮޅަށް ކަމަށެވެ. އެކަމަކު މިއަދު ކޯލިޝަނެއްގެ ނަމުގައި ރައީސް މައުމޫނަށްވެސް ސަނާ ކިޔާ ކަމަށާއި، އެމްޑީޕީގެ ވެރިކަން ވައްޓާލި ބަޣާވާތުގައި ބައިވެރިވި ލީޑަރުންނަށްވެސް ސަނާ ކިޔާ ކަމަށެވެ. އެހެންކަމުން މިއަދު އޭނާ އެކޭ އެމްޑީޕީގެ އެހެން މެމްބަރުންނެކޭ ތަފާތެއް އޮތް ކަމަށް ގަބޫލުނުކުރައްވާ ކަމަށް މޫސަ ވިދާޅުވިއެވެ.
ފާރިސް މައުމޫން ވަޑައިގަންނަވަން ދެން ހަރުގޭގަ ތިޔައީ ޒައީމޭ ޖަހައިގެން ތިބީ ކޮޅަށް. އިހައް ދުވަހަކު. ފާރިސް މައުމޫން ވަޑައިގަތީމަ، އާދެ މަނިކުފާނު ވަޑައިގަންނަވާ. މިއީ އަޅުގަނޑުމެންނަށް އެއްކަލަ އަނިޔާކުރި މީހާގެ ދަރިފުޅޭ. އެސޮރުގެ މައްސަލައެއް ނެތް. އަޅުގަނޑުގެ ވަރަށް ރައްޓެހި ކުއްޖެއް ވަރަށް އިހުތިރާމުވެސް ކުރަން. އެކަމަކު އެވަރަށް އެ ކުދިންނާ ދިމާލަށް މިތިބީ ބޭރުން ޕިއްޒާ ގެނެސްގެން ކައިގެން ބޮޑެތިވެފަ ތިބި މީހުންނޭ ކިޔައިގެން ހަޅޭއްލަވި އެމްޑީޕީ ހަރުގޭގަ ތިޔައީ ޒައީމޭ ޖަހައިގެން އެބަ ތިބެއޭ ފާރިސް ވަޑައިނުގަންނަވައިގެން ޖަލްސާ ނުފެށިފަ. ގާސިމް ބޮޑު ބާޣީ ނައިސްގެން ޖަލްސާ ނުފެށިފަ. ބާޣީގެ އަނބިކަނބަލުން އެތަނަށް ވަޑައިގަތީމަ ސެލިއުޓް ކުރި މީހުން. ދެން އަޅުގަނޑު ގޮސް ވަކި ޕީޕީއެމްގަ އިނދެގެން ކޮބާތޯ ތަފާތެއް މީގަ. ހަމަ އެކައްޗެއް ނޫންތޯ؟މޫސަ
މޫސަ ވިދާޅުވީ އޭނާ ޕާޓީން ވަކިވެވަޑައިގަތީ ނޫން ކަމަށާއި، ބޭރުކޮށްލީ ކަމަށެވެ. އަދި އޭރު ކަން ހިނގައިދިޔަ ގޮތްވެސް ވަނީ ތަފްސީލްކޮށްދެއްވާފައެވެ. އޭނާ ވިދާޅުވީ އެކަން ހިނގައިދިޔައީ، ފަނޑިޔާރުންގެ ގާނޫނަށް އިސްލާހު ގެނައުމުގެ މައްސަލައިގައި، މެމްބަރު ޝަރީފް ހުށަހެޅުއްވި މައްސަލައަކަށް ތާއީދުކޮށްގެން ކަމަށެވެ. އަދި އޭރު ބަޣާވާތުގެ މައްސަލާގައި ރައީސް ނަޝީދު ހުށަހެޅުއްވި މައްސަލައެއް ކުރިއަށްދާތީ، އެ މައްސަލަ ނަގާ ގޮތަށް އުއްތަމަ ފަނޑިޔާރު އެއްބަސްވެއްޖެނަމަ އެމަނިކުފާނު ބަހައްޓަން އެއްބަސްވުމަށް އޭރު ރައީސް ނަޝީދު އެދިވަޑައިގެންނެވި ކަމަށެވެ. އެކަމަކު އޭރު ތިއްބެވި މެމްބަރުންގެ ތެރޭގައި އޭރު އުއްތަމަ ފަނޑިޔާރަކަށް ހުންނެވި އަހުމަދު ފާއިޒު ހުސައިން ބަހައްޓަން ބޭނުންނުވާ ބޭފުޅުން ތިއްބެވި ކަމަށާއި، އެ މެމްބަރުން އެކަމަށް ހިޔާލު ތަފާތުވެ އޭނާ ވަކިކުރާ ގޮތަށް ވޯޓުލީ ކަމަށެވެ.
މޫސަ ވިދާޅުވީ އެ މައްސަލާގައި ވޯޓު ލީ އަނެއް ފަސް މެމްބަރުންނަށް ފިޔަވަޅު އެޅުމަށް ފަހު މޫސަ ޕާޓީން ވަކިކޮށްލީ ކަމަށެވެ. މިއީ ސިޔާސީ މަސައްކަތްތައް ކަމަށާއި އެއް ޕާޓީން ވަކިކޮށްލުމުން ކޮންމެ މީހަކު ވެސް އަނެއް ގޮތް ހޯދާނެކަމަށް ވިދާޅުވިއެވެ.
ދެން އެހެން ކަންތައް ކުރީމަ އަޅުގަނޑެއް ނުދާނެ ނޫންތޯ، ގޮސް ތޮށިގަނޑު މަތީގަ ރައީސް ނަޝީދުގެ ފޮޓޯއެއް ހިފައިގެން އިނދެ 'ކިޔާ ހުވާ ތޭރާ ވާދާ' ކިޔާކަށް. ދެން އަޅުގަނޑު ހަމަ ޕީޕީއެމް އަށްވެސް ދިޔައީ. ސިޔާސީ މަސައްކަތް މިއީ. ދާނެ އެއްނު. މަހަށްދާ މީހަކު އެއް އޮޑިން ބޭލީމަ ވާނެ އެއްޗަކީ އަނެއް އޮޑިއަށްވެސް އަރާނެތާމޫސަ
މޫސަ ވިދާޅުވީ މިއަދު އެމްޑީޕީއާ ކިތަންމެ ދުރުގައި ހުންނެވިޔަސް ދުވަހަކުވެސް އެ ޕާޓީއަށް ދެރައެއް ނޭދޭ ކަމަށެވެ. އެމްޑީޕީ ފަށައިގެން އައި ގޮތާއި އެ ޕާޓީގެ ރޫހު އަބަދުވެސް ހަނދާނުގައި ހުންނާނެ ކަމަށާއި، ޕާޓީއަށް ސޮއިކުރި 9 ވަނަ މީހާގެ ހައިސިއްޔަތުން އަބަދުވެސް އެ ގަދަރު ކުރާނެ ކަމަށެވެ. މިހާރުވެސް ޕާޓީ ބައިބައިވެ ޕާޓީ ތެރޭގެ ކޯޅުންތައް ބޮޑުކަންފާހަގަކުރައްވާ މޫސަ ވިދާޅުވީ އެކަމާ ހިތާމަކުރައްވާ ކަމަށާއި، އެހެން ނުހަދާ ވެރިކަމުގައި އޮތްއިރު އެންމެންވެސް ގުޅިގެން އެއް އަމާޒަކަށް މަސައްކަތްކުރަން ނަސޭހަތްތެރިވާކަމަށެވެ.
އޭނާ ވިދާޅުވީ އެމްޑީޕީގެ ޕީޖީ ގްރޫޕްގެ ތެރެއިން ރައީސް އިބްރާހިމް މުހައްމަދު ސޯލިހުގެ ބާރު ވަރަށް ބޮޑަށް ކަނޑުވާލާފައިވާ ކަމަށާއި އެމަނިކުފާނާ ދޭތެރޭ ކަންކުރަނީ ވަރަށް ދެރަކޮށް ކަމަށެވެ. އެކަމަކު މިއަދު ޕާޓީގެ އެންމެ އިސްވެރިއަކީ އެއީ ކަމަށާއި، އެންމެންވެސް އެކަން ބަލައިގަނެ އެ އަމާޒަށް މަސައްކަތްކުރަން ޖެހޭ ކަމަށެވެ.
