ލޯކަލް ކައުންސިލްތަކުގެ އިންތިހާބުގައި ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދު ނިސްބަތްވެވަޑައިގަންނަވާ ދާއިރާއިން ނާކާމިޔާބު ވުމަކީ މަސީހުގެ އިތުބާރު ނެތްކަން ހާމަވާކަމެއް ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު އަހުމަދުމަނިކު ވިދާޅުވެއްޖެ އެވެ.
އާދިއްތަ ދުވަހު އަމީތު ކުރައްވާފައިވާ ޓްވީޓެއްގައި ވިދާޅުވެފައިވަނީ ފުވައްމުލަކު ދެކުނު ދާއިރާއިންނާއި ދިވެހި ރައްޔިތުންވެސް ލޯކަލް ކައުންސިލްތަކުގެ އިންތިހާބުގައި ނިންމާފައިވަނީ މަޖިލީޙުގެ ރައީސް މަސީހުގެ އިތުބާރު ނެތްކަމަށް ކަމަށެވެ. އަދި މަޖިލީހުގެ ރިޔާސަތުން މަސީޙު އިސްތިއުފާ ދެއްވުމަށް އަމީތު ވަނީ ގޮވާލައްވާފަ އެވެ.
Fuvahmulaku Dhekunu dhaairaa ves, Dhivehi Rayyithun ves nimmy Maseeh ge ithubaaru neyykamah. Majlis Riyaasathun isthiufaa dhevvumah govaalan pic.twitter.com/98RyQjgtri
— ᗰᴏʜᴀᴍᴇᴅ ᗩᴍᴇᴇᴛʜ (@MohamedAmeeth) May 7, 2017
މިހާރު ހިނގަމުންދާ 18 ވަނަ ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ ގޮނޑިއަށް މަސީހު ހޮވިވަޑައިގަންނަވާފައިވަނީ ޕީޕީއެމް ޓިކެޓްގައި އެވެ. މަސީހުގެ އިތުބާރު ނެތްކަމަށާއި މަޖިލީހުގެ ރައީސްކަމުގެ މަގާމުން އިސްތިއުފާ ދެއްވުމަށް އަމީތު ގޮވާލައްވާފައި މިވަނީ ގުޅިފައިވާ އިދިކޮޅު ޕާލަމެންޓް ގްރޫޕުން މަޖިލީހުގެ ތެރެއިން މަސީހުގެ އިތުބާރު ނެތްކަމަށް ފާސްކުރުމަށް މަސައްކަތް ކުރަމުންދާ ދަނޑިވަޅެއްގަ އެވެ.
މަޖިލިސް އިންތިހާބަށްފަހު އާއްމު އިންތިހާބެއް ބޭއްވި ފުރަތަމަ ފުރަތަމަ ފަހަރަކީ މިހާރު ކުރިއަށްދާ ލޯކަލް ކައުންސިލްތަކުގެ އިންތިހާބެވެ. މި އިންތިހާބުގެ ވަގުތީ ނަތީޖާ ދައްކާ ގޮތުން ފުވައްމުލަކު ދެކުނު ދާއިރާއިން ކުރީގައި އުޅެނީ އިދިކޮޅު އެމްޑީޕީގެ ކެންޑިޑޭޓް އަބްދުﷲ ފަލާހު ޝަރީފް އެވެ.
މީގެއިތުރުން އަމީތު ވަނީ ހޮނިހިރު ދުވަހުގެ ރޭ ކުއްލި ގޮތަކަށް އާސަންދައިގެ ހިދްމަތަށް ގެނެސްފައިވާ ބަދަލާ ގުޅޭގޮތުންވެސް ކަންބޮޑުވުން ފާޅުކުރައްވާފަ އެވެ.
ސަރުކާރުން ވަނީ އާސަންދައިގެ ހިދްމަތް ޕްރައިވެޓް ހޮސްޕިޓަލުތަކާއި ކްލިނިކްތަކުން ނުލިބޭ ގޮތަށް ހަމަޖައްސާފަ އެވެ. އެހެންކަމުން ދެން އާސަންދައިގެ ހިދްމަތް ލިބޭނީ ސަރުކާރު ހޮސްޕިޓަލުތަކުން އެކަންޏެވެ.
އަމީތު ވިދާޅުވީ މިއީ ރައްޔިތުންނަށް އުފުލަންޖެހޭ ވަރަށް ބޮޑު ތަކުލީފެއް ކަމަށެވެ.
Mireyge dhanvaru kulliakah Aasandhaige khidhumathah sarukaarun migenai badhalu vegendhaany rayuithun ufulan jeheyne v bodu thaklyfakah. #Sad pic.twitter.com/aTotc10A80
— ᗰᴏʜᴀᴍᴇᴅ ᗩᴍᴇᴇᴛʜ (@MohamedAmeeth) May 6, 2017
އަމީތަކީ ޕީޕީއެމް ޓިކެޓްގަިއ މަޖިލީހަށް ހޮވިވަޑައިގެންނެވި މެމްބަރެކެވެ. ނަމަވެސް ޕީޕީއެމް ދެ ފެކްޝަނަށް ބެހިގެންދިޔައިރު، ކުރިން ރައީސް ޔާމީން ފެކްޝަނުގަިއ ހުންނެވުމަށް ފަހު، ފަހުން ވަނީ ރައީސް މައުމޫންގެ ފެކްޝަނަށް ބަދަލުވެވަޑާއިގަންނަވާފަ އެވެ. އަދި މިހާރު މަސައްކަތް ކުރައްވަމުން ގެންދަވަނީ ގުޅިފައިވާ އިދިކޮޅު ޕާޓީތަކާއެކުގަ އެވެ.
