މިއަދު ބާއްވާ ލޯކަލް ކައުންސިލް އިންތިހާބު އޮބްޒާވްކުރަން ހަ ގައުމެއްގެ މަންދޫބުން ހަރަކާތްތެރިވަމުން އެބަ ދެއެވެ.

ރާއްޖެ އެމްވީއަށް އެނގިފައިވާ ގޮތުގައި އިންތިހާބު އޮބްޒާވަރަން މަންދޫބުން އައި ގައުމުތަކުގެ ތެރޭގައި ބަންގްލަދޭޝް، ޕާކިސްތާން، ބޫޓާން، ސްރީ ލަންކާ، ބޮސްނިޔާ، އަފްޣާނިސްތާން ހިމެނެ އެވެ.

މިފަހަރުގެ އިންތިހާބު އޮބްޒާވްކުރަން ޔޫރަޕްގެ އެއްވެސް ޖަމާއަތަކުން ނުވަތަ ގައުމަކުން ނާދެއެވެ. މީގެ ކުރީގައި ބޭއްވި އިންތިހާބުތައް އޮބްޒާވްކުރަން  އީޔޫ އާއި، ބޭރުގެ އެހެން ބައެއް ޖަމާއަތްތަކުންނާއި ހުޅަނގުގެ ގައުމުތަކުން ވެސް ރާއްޖެއަށް ޒިޔާރަތްކުރި އެވެ.

ލޯކަލް ކައުންސިލް އިންތިހާބުގައި 422 ވޯޓް ފޮށީ ބަހައްޓާފައިވާއިރު، ވޯޓް ދިނުމުގެ ހައްގު ލިބިގެންވާ ޖުމުލަ މީހުންގެ އަދަދަކީ 255،987 އެވެ. ތިން ވަނަ ލޯކަލް ކައުންސިލް އިންތިހާބު މި ބާއްވަނީ، ތިން ވަނަ ފަހަރަށް ފަސްކުރުމަށް ފަހު އެވެ. ފުރަތަމަ މި އިންތިހާބު ބާއްވަން ތާވަލްކުރީ ޖެނުއަރީ، 14، 2016 ވަނަ ދުވަހު އެވެ. ނަމަވެސް ޕީޕީއެމުން ކޯޓަށް ހުށަހެޅި މައްސަލައަކާ ގުޅިގެން އިންތިހާބު ދެ މަސް ދުވަހަށް ފަސްކުރި އެވެ. އެއަށް ފަހު ދެން އިންތިހާބު ބާއްވަން އުޅުނީ އޭޕްރީލް 8 ގަ އެވެ. އޭގެ ފަހުން ސްކޫލްތައް ނުލިބޭ ކަމަށް ބުނެ އިންތިހާބު އޭޕްރީލް 15 އަށް ފާސްކުރި އެވެ. އަދި މެއި 6 އަށް އިންތިހާބު ފަސްކުރީއެޗްވަންއެންވަން ރޯގާ އާ ގުޅިގެންނެވެ.