ދެ ލައްކަ އެމެރިކާ ޑޮލަރު ގަތުމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް(ސްޓެލްކޯ) އިން އަމިއްލަ ކުންފުންޏަކަށް ދިން ފައިސާ ގެއްލުނު މައްސަލައިގައި އެންޓި ކޮރަޕްޝަން ކޮމިޝަން(އޭސީސީ) އިން ހިންގި ތަހުގީގު ނިންމާލައިފި އެވެ.

ދެ ލައްކަ އެމެރިކާ ޑޮލަރު ގަތުމަށް ސްޓެލްކޯ އިން ވަނީ ޝަރޫ ލޯންޗް ސާވިސަސް ކިޔާ ކުންފުންޏަކަށް ތިން މިލިއަނަށް ވުރެ ގިނަ ރުފިޔާ ދީފަ އެވެ. ނަމަވެސް، އެ ފައިސާއާ އެ ކުންފުނިން ހަވާލުވުމަށް ފަހު، އެއަށް ވާވަރަށް ޑޮލަރު ވެސް އަދި ޑޮލަރު ގަންނަން ދިން ފައިސާ ވެސް އަނބުރާ ސްޓެލްކޯ އަށް ދީފައިނުވެ އެވެ. ފަހުން އެ ފައިސާއަށް ވީނުވީއެއް ނޭނގުނު ކަމަށް ސްޓެލްކޯ އިން ބުނެފައިވެ އެވެ.

ޝަރޫ ލޯންޗް ސާވިސް އަކީ އެއް މިލިއަން ޑޮލަރު ގަތުމަށް ފެނަކަ ކޯޕަރޭޝަނުން 17 މިލިއަން ރުފިޔާ ދިން ކުންފުންޏެވެ. ފެނަކަ އިން އެ ކުންފުންޏަށް ދިން ފައިސާ ވެސް ގެއްލިފައިވާއިރު، އެ މައްސަލަ ވެސް އޭސީސީ އިން ދަނީ ތަހުގީގު ކުރަމުންނެވެ.

ސްޓެލްކޯ އިން ޑޮލަރު ގަންނަން ދިން ފައިސާ ގެއްލުނު މައްސަލައާ ގުޅޭ ގޮތުން އޭސީސީގެ ރައީސް ހަސަން ލުތުފީ ބުރާސްފަތި ދުވަހު ވިދާޅުވީ އެ މައްސަލައިގައި ތަހުގީގު ނިމިފައިވާ ކަމަށެވެ. ލުތުފީ ވިދާޅުވީ މިހާރު ކުރިއަށް ދަނީ މައްސަލައިގައި ދައުވާ ކުުރުމަށް ފޮނުވުމުގެ ކުރިން ކުރިއަށް ގެންދާ ޑިއުޓީ ޕްރޮސެކިއުޝަން މަރުހަލާ ކަމަށެވެ. 

އޭސީސީން ތަހުގީގު ކުރާ ހުރިހާ މައްސަލަތަކުގައި ވެސް ދައުވާ ކުރުމަށް ފޮނުވުމުގެ ކުރިން ޕްރޮސެކިއުޓާ ޖެނެރަލްގެ ވަކީލުންނާއެކު މަޝްވަރާ ކުރުމުގެ މަރުހަލާއެއް ކުރިއަށް ގެންދެ އެވެ.

ދެ ލައްކަ ޑޮލަރު ދިން ފައިސާ ގެއްލުނު މައްސަލައިގައި ސްޓެލްކޯ އިން ވަނީ ޝަރޫ ލޯންޗް ސާވިސަސްއާ ދެކޮޅަށް ސިވިލް ކޯޓުގައި ދައުވާ ވެސް ކޮށްފަ އެވެ. ސްޓެލްކޯ އިން ސިވިލް ކޯޓަށް ހުށަހަޅާފައިވާ ދައުވާގައި ބުނެފައި ވަނީ ދެ ލައްކަ ޑޮލަރު ގަންނަން ޝަރޫ ލޯންޗް ސާވިސް އަށް ދިން 3،084،000 ރުފިޔާގެ ބަދަލުގައި ދޫކުރި ޑޮލަރު ޗެކް ބައުންސް ވެފައިވާ ކަމަށެވެ. އަދި ޑޮލަރު ގަންނަން ދިން ފައިސާ ވެސް އަނބުރާ ލިބިފައި ނުވާ ކަމަށް ދައުވާގައި ބުނެ އެވެ. 

ސްޓެލްކޯއިން ދައުވާކޮށްފައި ވަނީ ޑޮލަރު ގަންނަން ދިން ހުރިހާ ފައިސާ އެއްފަހަރާ ނަގައިދިނުމަށް އެދި އެވެ.

ފެނަކައާއި ސްޓެލްކޯ އަށް ޑޮލަރު ހޯދުމަށް އެ ދެ ކުންފުނިން 20 އަކަށް މިލިއަނަށް ރުފިޔާ ހަވާލު ކުރި، ޝަރޫ ލޯންޗް ސާވިސް އަކީ ޑޮލަރުގެ މުއާމަލާތް ކުރުމަށް ހުއްދަ ދީފައިވާ ކުންފުންޏެއް ނޫން ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ވަނީ ބުނެފަ އެވެ. 

ރާއްޖޭގައި ބޭރު ފައިސާ ގަނެ ވިއްކުމުގެ މުއާމަލާތް ކުރެވޭނީ އެމްއެމްއޭ އިން އެކަން ކުރުމުގެ ލައިސެންސް ދޫކޮށްފައިވާ ފަރާތްތަކަށް އެކަންޏެވެ. އެމްއެމްއޭގެ ވެބްސައިޓްގައި އާންމުކޮށްފައިވާ ގޮތުން، ބޭރު ފައިސާ ގަނެވިއްކުމުގެ ހުއްދަ ދީފައި ވަނީ 471 ކުންފުންޏަށް ކަމަށްވާ އިރު، އެ ކުންފުނިތަކުގެ ތެރޭގައި ޝަރޫ ލޯންޗް ސާވިސް އެއް ނުހިމެނެ އެވެ.

ނަމަވެސް، ފެނަކައިންނާއި ސްޓެލްކޯ އިން ބުނެފައިވަނީ ޑޮލަރު ގަތުމުގެ އެއްބަސްވުމުގައި ސޮއިކުރި އިރު ޝަރޫ ލޯންޗް ސާވިސަސް އަކީ ޑޮލަރުގެ މުއާމަލާތް ކުރުމުގެ ހުއްދަ ނެތް ކުންފުންޏެއްކަން ނޭނގޭ ކަމަށެވެ.

ޑޮލަރު ގަންނަން ދެ ކުންފުނިން ދިން ފައިސާ ގެއްލުނު މައްސަލައިގައި ޝަރޫ ލޯންޗް ސާވިސަސްގެ މެނޭޖިންގ ޑިރެކްޓަރު ހައްޔަރުކުރި އެވެ. ނަމަވެސް ފަހުން އޭނާ ދޫކޮށްލާފައިވާއިރު އެ ކުންފުނީގެ ޑިރެކްޓަރުންގެ ޕާސްޕޯޓްތައް ވަނީ ހިފަހައްޓާފަ އެވެ.