ވ. ފެލިދޫގައި ސްޓެލްކޯއިން އަލަށް ހަދާ އިންޖީނުގޭގެ ބިންގާ އަޅައިފިއެވެ.

ފެލިދޫ އައު އިންޖީނުގޭގެ ބިންގާ އަޅުއްވައި ދެއްވާފައިވަނީ، ރައީސް އޮފީހުގެ މިނިސްޓަރު މުޙައްމަދު ޝިފާޒެވެ. މިކަމަށްޓަަކައި ފެލިދޫއަށް ކުރެއްވި ދަތުރުފުޅުގައި ތޮއްޑޫ ދާއިރާގެ މެންބަރު ހަސަން ޝިޔާންއާއި، މަތިވެރި ދާއިރާގެ މެންބަރު ހަސަން ޒަރީރުގެ އިތުރުން ސްޓެލްކޯގެ މެނޭޖްމަންޓާއި ބޯޑުގެ ބައެއް މެންބަރުން ބައިވެރިވެ ވަޑައިގަންނަވާފައިވެއެވެ.

ބުދަ ދުވަހު ފެލިދޫގައި ބޭއްވި ރަސްމިއްޔާތުގައި ޝިފާޒް ވިދާޅުވެފައިވަނީ އިންޖީނުގެއަކީ އެއްވެސް ގޮތަކަށް ސިޔާސީ ބޭނުމަކަށް ބޭނުންކުރާ ތަނެއް ނޫންކަމަށާއި، އެއީ ރައްޔިތުންނަށް ބޭނުންވާނެ އެންމެ އަސާސީ ޚިދުމަތްކަމަށެވެ. އަދި މި ޚިދުމަތް ދެއްވަން ތިއްބެވި މުވައްޒަފުންނަކީ، ވަރަށް ހަރުދަނާ، ހީވާގި މުވައްޒަފުންތަކެއް ކަމަށް ފާހަގަކުރައްވާ ސްޓެލްކޯގެ މެނޭޖްމަންޓަށާއި މުވައްޒަފުންނަށް ޝުކުރުއަދާކުރައްވާފައިވެއެވެ.

މީގެ އިތުރުން، މިސަރުކާރުގެ ވައުދުތައް ފުއްދެވުމަށްޓަކައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ކުރައްވަމުން ގެންދަވާ މަސައްކަތްޕުޅުގައި މުވައްޒަފުންގެ އެއްބާރުލުން ފުރިހަމައަށް ދެއްވުމަށް ވެސް ޝިފާޒް އެދިވަޑައިގެންނެވިއެވެ.

ފެލިދޫގައި އަލަށް އިމާރާތްކުރާ އިންޖީނުގެއަކީ ޖާގައިގެ ގޮތުން ތަނަވަސް، ރައްކާތެރި، އަޑުމަޑު ތަނަކަށް ވާނެކަމަށް ސްޓެލްކޯއިން މައުލޫމާތުދެއެވެ. އަދި އާ އިންޖީނުގެއާ އެކީގައި، ކަސްޓަމަރ ސާވިސް ޚިދުމަތްދޭނެ އިމާރާތެއް އެޅުމަށް ވެސް ހަމަޖެހިފައިވެއެވެ.

ރާއްޖޭގައި އަޅާ އެންމެ ފެންވަރު ރަނގަޅު އިންޖީނުގެތަކުގެ ތެރޭގައި ހިމެނޭ ފެލިދޫގެ އިންޖީނުގޭގެ ބިންގާ ބުދަދުވަހު އަޅާފައިވާއިރު، މި އިންޖީނުގެއަކީ މުޅިން އާ ޒަމާނީ ވަސީލަތްތަކާއެކު، މުސްތަގުބަލުގައި ފެލިދޫއަށް އަންނާނެ ކުރިއެރުމާއި، ތަރައްގީއަށް އަދި ދުރު މުސްތަގުބަލަށް ވިސްނާ، 4 މެގަވޮޓްގެ ކެޕެސީޓީ ގާއިމް ކުރެވޭ ގޮތަށް އެޅިގެންދާނެ އިންޖީނުގެއެއް ކަމަށް ސްޓެލްކޯއިން ބުނެއެވެ.