ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ގައިޑްލައިންތަކާ ޚިލާފަށް މާލެއިން ވ. އަންބަރާއަށް ދިޔަ 95 މީހަކު ޖޫރިމަނާ ކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ، އެމީހުން ޖޫރިމަނާ ކޮށްފައިވަނީ ބުރާސްފަތި ދުވަހުގެ ރޭގެ ވަގުތެއްގައި ކަމަށެވެ. އެގޮތުން ހުއްދަ ނުނަގައި، އެޗްޕީއޭގެ ގައިޑްލައިންތަކާ ޚިލާފަށް މާލެއިން ވ. އަންބަރާއަށް އެމީހުން ދަތުރު ކޮށްފައިވާކަމަށް ފުލުހުން ބުނެއެވެ.
އޭގެ އިތުރުން ފުލުހުން ވަނީ އެ ދަތުރަށް ބޭނުންކުރި އުޅަނދުގެ ޖާގައަށްވުރެ ގިނައިން މީހުން ގޮވައިގެން ދަތުރު ކޮށްފައިވާތީ އެކަންވެސް ފާހަގަކޮށްފައެވެ. އެގޮތުން ފުލުހުން ބުނީ، އެކަންވެސް އިތުރަށް ތަހުޤީޤު ކުރުމަށްފަހު، އަޅަންޖެހޭ ފިޔަވަޅުތައް އަޅާނެ ކަމަށެވެ. އަދި ކުރިއަށް އޮތް ތަނުގައިވެސް ކޮވިޑް-19 އާ ގުޅިގެން އަޅާފައިވާ ފިޔަވަޅުތަކަށް ބޯލެނބުމަށް ފުލުހުން ވަނީ އިލްތިމާސް ކޮށްފައެވެ.
ކޮވިޑް-19 ގެ މި ޙާލަތުގައި އެޗްޕީއޭއިން ވެސް ގެންދަނީ މާސްކް އެޅުމާއި އިޖުތިމާއީ ގައިދުރުކަން ދެމެހެއްޓުމަށް އަޅަންޖެހޭ ފިޔަވަޅުތައް އެޅުމަށް ރައްޔިތުންނަށް އިލްތިމާސް ކުރަމުންނެވެ.
