ވޯލްޑް ވެބް ޗެސްއިން އިންތިޒާމުކޮށްގެން ބޭއްވި ފުރަތަމަ "އިންޑިއަން އޯޝަން ޗެސް ބްލިޓްޒް ޓޯނަމެންޓް" ގައި ރާއްޖެއިން ކާމިޔާބީ ވަނަތަކެއް ހޯދައިފިއެވެ.

މި މުބާރާތަކީ އިންޑިއަން އޯޝަންގެ ޤައުމުތަކުގެ ކުޅުންތެރިންނަށް ހުޅުވާލައިގެން، 60 ކުޅުންތެރިންގެ މެދުގައި ކުރިއަށްދިޔަ ބްލިޓްޒް މުބާރާތެކެވެ. އާދިއްތަ ދުވަހު ކުރިއަށްދިޔަ މި މުބާރާތުގައި ބައިވެރިވި ޤައުމުތަކުގެ ތެރޭގައި ދިވެހިރާއްޖެ އާއި، އިންޑިއާ އާއި، ސިންގަޕޫރާއި، ދެކުނު އެފަރިކާ އާއި، މަޑަގަސްކަރަ އާއި، ސީޝެލްސް އަދި ޔުނައިޓެޑް އަރަބި އެމިރޭޓްސް (ޔޫއޭއީ) ފަދަ ޤައުމުތަކުގެ ކުޅުންތެރިން ހިމެނެއެވެ.

މި މުބާރާތް ބާއްވާފައިވަނީ މި ވަގުތު ދުނިޔޭގައި ކުޅިވަރުތައް ހުއްޓިފައިވުމުން، ޗެސްއިން ތަޢާރަފުކޮށްފައިވާ އޮންލައިން ޕްލެޓްފޯމްތަކުގެ ތެރެއިން، ލައިޗެސް މެދުވެރިކޮށެވެ. ރާއްޖޭގެ ޤައުމީ އަންހެން އަދި ފިރިހެން ޓީމުން 10 ކުޅުންތެރިން ވަނީ މި މުބާރާތުގައި ވާދަކޮށްފައެވެ. ޗެެސްގެ ސަރަޙައްދީ ޤައުމުތަކާ ދެކޮޅަށް ވާދަވެރި ކުޅުމެއް ދެއްމި މި މުބާރާތުގެ އެއްވަނަ އަދި ތިންވަނަ، ދިވެހި ޤައުމީ ޓީމުގެ ކުޅުންތެރިން ވަނީ ހޯދާފައެވެ. އެގޮތުން މުޅި މުބާރާތުން އެއްވަނައަށް ހޯދައިފައިވަނީ ރާއްޖޭގެ މުޙައްމަދު ޝުއާއުއެވެ. އަދި ދެވަނަ ހޯދައިފައިވަނީ ނޫރު ފާރޫގެވެ.

މިއީ ސަރަހައްދީ މުބާރާތެއްގައި ރާޒުވާއިން ރާއްޖޭގެ ކުޅުންތެރިއަކު ރަން މެޑަލް ހޯދި ދެވަނަ ފަހަރެވެ. އެގޮތުން މިދިޔަ އަހަރުގެ ނޮވެމްބަރު މަހުގައި އޭޝިއަން ޗެސް ކައުންސިލުން އިންތިޒާމުކޮށްގެން ބޭއްވި ސަރަޙައްދީ މުބާރާތެއް ކަމުގައިވާ "ސައުތު އޭޝިއަން ޗެސް ފެސްޓިވަލް ފޯ ކެޑޭޓްސް، ޔޫތު އެންޑް ޑިސޭބަލްޑް ޖޫނިއާސް 2020" މުބާރަތުންވެސް ރާއްޖޭގެ ކުޅުންތެރިންތަކެއް ވަނީ ފަޚުރުވެރި ވަނަތަކެއް ހޯދާފައެވެ.