ނަމޫނާ ދޯނީގެ ދަތުރު އަނެއްކާވެސް ކުރަންޖެހޭ ހިސާބަށް ޤައުމުގެ ހާލަތު ގޮސްފައިވާ ކަމަށާއި، އެކަމާ ހިތާމަ ކުރައްވާ ކަމަށް އައްޑޫ ސިޓީގެ މޭޔަރު ޢަބްދުﷲ ޞާދިޤު (ސޯބެ) ވިދާޅުވެއްޖެއެވެ.

ލާމަރުޒީ އިންތިޚާބަށް ކެމްޕެއިން ކުރުމުގެ ގޮތުން، ހޯމަ ދުވަހުގެރޭ އައްޑޫ ސިޓީ ހުޅުމީދޫގައި އެމްޑީޕީން ބޭއްވި ޖަލްސާގައި ވާހަކަ ދައްކަވަމުން ސޯބެ ވިދާޅުވީ، ސަރުކާރުން ލާމަރުކަޒީ ނިޒާމުގެ ބާރު ކަނޑުވާލާފައިވާ ކަމަށާއި، ކައުންސިލްތައް ވަނީ ކަފުންކޮށް ވަޅުލާފައި ކަމަށެވެ.

ތަރައްޤީގެ ދުވެލި އަވަސްވާނީ ކައުންސިލްތަކުގެ މެޖޯރިޓީ ސަރުކާރަށް ދިނުމުން ކަމަށް ސަރުކާރުން ބުނާ ބުނުމަށް ރައްދުދެއްވާ ސޯބެ ވިދާޅުވީ، ސަރުކާރުން ތަރައްޤީގެ ގޮތުގައި ސިފަ ކުރާ ތަރައްޤީގެ އެންމެ ބޮޑެތި މަޝްރޫޢުތައް ފެންނަމުންދަނީ ސަރުކާރުގެ މެޖޯރިޓީ ނެތް ކައުންސިލްތައް ނިސްބަތްވާ ތަންތަނުން ކަމަށެވެ.

"މިހާރު، ވެރިކަމަށް އައިތާ އެތައް ދުވަހެއް ފަހުން މިއޮތީ، އަނެއްކާވެސް ރައްޔިތުންގެ ވޯޓާ ހަމަޔަށް އައިއްސަ. ރައްޔިތުން ބަސްބުނާ ހިސާބަށް އައިއްސަ. އައިމަ މިހަފްތާ ތެރޭގަ އެއްކަލަ ތަރައްޤީގެ މަޝްރޫޢުތައް ރަށްރަށުގަ ފަށައިފި. ދެން ފަށައިގެން މި ބުނަނީ ތިމަންނަ މެނަށް މެޖޯރިޓީ ދިނީމައޭ، ތިމަންނަމެންގެ ކައުންސިލެއް އޮތީމައޭ މިރަށުގެ މިކަން އަވަހަށް ކުރެވޭނީ. ދަންނަވަންތޯ މާލޭގަ އޮތީކީ، އެމްޑީޕީގެ ކައުންސިލެއް. އެބޭފުޅުންގެ ކައުންސިލެއް ނޫން. މިހާރު ރާއްޖޭގަ ހިނގާ އެބޭފުޅުން އެ ދަންނަވާ އެންމެ ގިނަ ތަރައްޤީގެ މަޝްރޫޢު ހިނގަނީ މާލޭގަ. ބްރިޖް އަޅާ، އިމާރާތްތައް އަޅާ. ކައުންސިލެއް އޮވެގެނެއް ނޫން. ކައުންސިލްތައް އޮތީ އައިސީޔޫއަށް ލާފަ. ކައުންސިލްތައް އޮތީ ކަފުންކޮށް ވަޅުލާފަ،" ސޯބެ ވިދާޅުވި އެވެ. 

ސޯބެ ވިދާޅުވީ، އައްޑޫ ސިޓީކައުންސިލްގައި އެމްޑީޕީގެ މެންބަރުން ތިބި ދާއިރާތަކަށް ކަންކަން ކޮށްދެވިފައިވާ ކަމަށާ، ކަންކަން ނުވެ ވަނީ އެމްޑީޕީގެ ޓިކެޓުގައި ހޮވި، ޕީޕީއެމްއަށް ބަދަލުވެވަޑައިގަތް ކައުންސިލަރުގެ ދާއިރާގައި ކަމަށެވެ. އަދި ކަން މިހެން އޮއްވައި އެންވަޔަރަމަންޓް މިނިސްޓަރ ޠާރިޤު އިބްރާހިމް އައްޑޫއަށް ވަޑައިގެން، ކައުންސިލަރުންނަކީ ގޮނޑި ހޫނުކުރަން ތިބޭ ބައެއް ކަމަށް ވިދާޅުވުމުން، އެއީ އައްޑޫ ސިޓީ ކައުންސިލްގައި އިންނެވި ޕީޕީއެމްގެ ކައުންސިލަރަށް ކުރެއްވި މަލާމާތެއް ކަމަށް ޤަބޫލުކުރައްވާ ކަމަށްވެސް ސޯބެ ވިދާޅުވިއެވެ.

ސޯބެ ވިދާޅުވީ، ނަމޫނާ ދޯނީގެ ދަތުރު އަލުން ނުކޮށް ރާއްޖެއަށް ފުރިހަމަ ލާމަރުކަޒީ ނިޒާމެއް ހޯދޭނީ ކުރިއަށްއޮތް ލޯކަލް ކައުންސިލް އިންތިޚާބުގައި އެމްޑީޕީގެ ކެނޑިޑޭޓުންނަށް ވޯޓު ދީގެން ކަމަށެވެ.

'ނަމޫނާ' ދޯންޏަކީ 2006 ވަނަ އަހަރުގެ ނޮވެމްބަރު 10 ވަނަ ދުވަހު، އޭރު ރައްޔިތުންގެ ޚާއްސަ މަޖިލީހުގައި ކުރިއަށްދިޔަ ފެހި ޤާނޫނުއަސާސީގެ މަސައްކަތް އަވަސްކުރުމަށް ގޮވާލައި އެމްޑީޕީން މާލޭގައި ކުރާ މުޒާހަރާއެއްގައި ބައިވެރިވުމަށް އައްޑޫން މީހުން ގޮވައިގެން އައި ދޯންޏެވެ. އެ ދޯނި މާލެއަށް އައުމުގެ ކުރިން ދޯނީގައި ތިބި ގިނަ ބަޔަކު ކަނޑުމަތިން ހައްޔަރުކުރި އެވެ.